İslam ölkələrindən olan Müşavirlər Federasiyası Baş Assambleyasının 24-cü iclası keçirilmişdir

İyunun 21-də İslam İnkişaf Bankının İslam maliyyəçiliyinə dair 5-ci Qlobal Forumu çərçivəsində İslam ölkələrindən olan Müşavirlər Federasıyası Baş Assambleyasının 24-cü iclası keçirilmişdir.

Federasiyanin prezidenti İzzət Səcdi qurumun 2009-cu ildə İstanbulda keçirilmiş 23-cü iclasından ötən müddət ərzində görülmüş işlər barədə məlumat vermişdir.

Müxtəlif regionların nümayəndələrinin hesabatları dinlənilmişdir.

Təşkilati məsələyə baxılmış, Misir nümayəndəsi Həsən Sadiqi yeni yaradılmış 9-cu region üzrə federasiyanın vitse-prezidenti seçilmişdir.

Federasiyada ölkəmizi təmsil edən Azərbaycan Xüsusi Layihə Araşdırmaları Şirkətinin direktoru İbrahim Məmmədzadə AzərTAc-ın müxbirinə demişdir ki, Müşavirlər Federasiyası İslam İnkişaf Bankının vacib qurumlarından biridir. Ölkəmiz İslam İnkişaf Bankından infrastruktur layihələri üçün çoxlu maliyyə vəsaiti alır. Bankın şərtləri yüngüldür. Bu gün su təsərrüfatı və yol layihələrində İslam İnkişaf Bankının rolu böyükdür. Bu işdə federasiya da mühüm rol oynayır. Federasiyada təmsil olunan Türkiyə, İran və Pakistan şirkətləri əsasən Azərbaycanda çalışırlar. Bəzi yol layihələrində ərəb şirkətləri də vardır. Mən on iki ildən artıqdır ki, federasiyada ölkəmizin Xüsusi Layihə Araşdırma şirkətinin nümayəndəsiyəm. İslam İnkişaf Bankı, onun Müşavirlər Federasiyası vasitəsilə Azərbaycana layihələrin icrası üçün lazım olan yeni texnologiyalar, yeni yanaşmalar, yeni idarəetmə prinsipləri gətirmişik.

Azərbaycan.- 2010.-22 iyun- S. 2.