Azərbaycan Prezidenti İlham Əliyevin Lənkəran və Lerik rayonlarına səfəri

Azərbaycanın bütün bölgələri, o cümlədən Lənkəran böyük sürətlə inkişaf edir

Ümummilli lider Heydər Əliyevin abidəsini ziyarət

Azərbaycan Prezidenti İlham Əliyev iyunun 25-də Lənkəran rayonuna gəlmişdir.

Respublikamızın digər rayonlarında olduğu kimi, Lənkəranda da regionların sosial-iqtisadi inkişafı dövlət proqramlarına uyğun olaraq geniş abadlıq və quruculuq işləri aparılır. Bunun nəticəsidir ki, rayonda ümumi məhsul istehsalının həcmi 2003-cü illə müqayisədə 2009-cu ildə 2,9 dəfə artaraq 175 milyon manatdan çox olmuşdur. Kənd təsərrüfatı məhsulunun həcmi 2,5 dəfə artaraq 77,1 milyon manata çatmış, sənaye məhsulunun həcmi 2 dəfə artmış, əsas kapitala yönəldilən investisiyalar 3,1 dəfə çoxalmışdır. Tikinti-quraşdırma işlərinin həcmi 3,7 dəfə artaraq 22,7 milyon manat təşkil etmişdir.

Rayonda 2003-cü ildən 2010-cu ilin iyununa qədər 14 min 451-i daimi olmaqla, 25 min 790 yeni iş yeri açılmışdır.

Dövlətimizin başçısı Heydər Əliyev adına mədəniyyət və istirahət parkında ulu öndərin abidəsini ziyarət edərək gül dəstəsi qoydu.

Lənkəranlıların sevimli istirahət guşələrindən olan parkda orijinal fəvvarələr yaradılmış, dekorativ gül kolları və ağaclar əkilmiş, çəmənlik salınmış, müasir işıqlandırma sistemi quraşdırılmışdır. Burada uşaqların əylənməsi üçün də gözəl şərait vardır.

AzərTAc

Azərbaycan.- 2010.- 26 iyun- S. 1.