Bədən tərbiyəsi və idmanın inkişafı dövlət siyasətinin əsas istiqamətlərindəndir

Bütün zamanlarda hər bir cəmiyyətin dayağını sağlam bədənli və sağlam ruhlu insanlar təşkil etmişlər. Bədən tərbiyəsi və idman insanın kamilləşməsinə və sağlamlığının möhkəmlənməsinə xidmət edir.

Hər il martın 5-i bütün dünyada Bədən Tərbiyəsi və İdman Günü kimi bayram edilir. Respublika Prezidenti İlham Əliyevin 4 mart 2005-ci il tarixli fərmanına uyğun olaraq, həmin gün ölkəmizdə də qeyd edilir.

Azərbaycan artıq beynəlxalq aləmdə idman ölkəsi kimi tanınır. Bu isə həyata keçirilən uğurlu dövlət siyasətinin məntiqi nəticəsidir. Bir tərəfdən, mövcud idman qurğuları yenidən qurulur, yaxud yeniləri inşa edilir, idmançılar hərtərəfli qayğı ilə əhatə olunur ki, bu da beynəlxalq turnirlərdə daha böyük uğurlar əldə etməyə imkan verir. Digər tərəfdən isə, Azərbaycan tez-tez qitə və dünya miqyaslı idman yarışlarına ev sahibliyi edir.

Qüvvədə olan "Bədən tərbiyəsi və idman haqqında" qanun ölkədə bədən tərbiyəsi və idman sahəsində fəaliyyətin təşkilati-hüquqi, sosial-iqtisadi əsaslarını və dövlət siyasətinin əsas prinsiplərini müəyyən edir, hər kəsin bədən tərbiyəsi və idmanla məşğul olmasına imkan yaradır.

Eyni zamanda idmanın ayrı-ayrı növlərinin inkişafına dair dövlət proqramları qəbul edilmişdir.

Hazırda ölkəmizdə 500 min nəfərə yaxın adam idmanla məşğul olur. Müqayisə üçün, 2005-ci ildə bu rəqəm 376 min nəfər təşkil edirdi.

Eləcə də qazanılan uğurlar ildən-ilə artır. Ötən ilin nailiyyətləri buna bariz misaldır. Belə ki, idmançılarımız 180 dünya, 228 Avropa çempionatı və birinciliyində iştirak etmişlər. Bundan əlavə, 4296 nəfər 358 beynəlxalq turnirdə qüvvəsini sınamışdır. Azərbaycan idmançıları 619 medal qazanmışlar ki, bu da 2008-ci illə müqayisədə 69 medal çoxdur. Olimpiya idman növlərində 37 medal əldə edilmişdir. İlk dəfə olaraq 4 idmançımız dünya çempionu adını qazanmışdır.

Kütləvi yarışlara, tələbələrin spartakiada və universiadasına 20 ali təhsil məktəbi cəlb edilmişdir. Keçən il ölkəmizdə 33 beynəlxalq turnir təşkil olunmuşdur.

Təbii ki, əsas diqqət idmanın maddi-texniki bazasının möhkəmləndirilməsinə yönəldilir. Keçən il paytaxtın Hövsan və Şağan qəsəbələrində, eləcə də Şəmkir, Şərur və İsmayıllı rayonlarında yeni olimpiya kompleksləri tikilib istifadəyə verilmişdir. Hazırda ölkədəki olimpiya komplekslərinin sayı 24-ə çatır.

Yeni ildə idmançılarımızı mötəbər yarışlar gözləyir. Bunların arasında Sinqapurda yeniyetmələrin idman oyunları, Rumıniyada Qara dəniz oyunları, İranda islam oyunlarını və s. qeyd emək olar.

Bu gün yüz minlərlə azərbaycanlının da bayramıdır. Gənclər və İdman Nazirliyi, gənclər təşkilatları, idman klubları və federasiyalar, təhsil müəssisələri bədən tərbiyəsi və idman gününü qeyd edəcək. Bayram münasibətilə Gənclər və İdman Nazirliyi tədbirlər planı hazırlamışdır. Bu gün müxtəlif tədbirlər keçiriləcək, paytaxtın mərkəzində idmançıların nümunəvi çıxışları olacaq. Həmçinin gənc nəslin ən yaxşı nümayəndələri və ən yaxşı idmançılar mükafatlandırılacaqlar.

Rizvan HİLALOĞLU

Azərbaycan.- 2010.- 5 mart.- S. 6.