Gəncədə akademik Siddiqə Məmmədovanın 85 illik yubileyi qeyd edilmişdir

Azərbaycan Dövlət Aqrar Universitetində kənd təsərrüfatı elminin tanınmış simalarından biri, AMEA-nın akademiki, əməkdar elm xadimi Siddiqə Məmmədovanın 85 illik yubileyi qeyd edilmişdir.

Şəhər ziyalılarının iştirakı ilə keçirilən yubiley mərasimində AMEA rəyasət heyətindən, Kənd Təsərrüfatı Nazirliyindən, müxtəlif ölkələrdən yubilyarın ünvanına gəlmiş təbrik teleqramları oxunduqdan sonra görkəmli alimin həyat və fəaliyyətindən bəhs edən məruzələr dinlənilmişdir.

Məruzə və çıxışlarda təkcə ölkəmizdə deyil, keçmiş sovetlər birliyində, eləcə də beynəlxalq miqyasda tanınan Siddiqə Məmmədovanın kənd təsərrüfatı elminə töhfələrindən danışılmışdır. Bildirilmişdir ki, görkəmli alim 45 ildən artıqdır Gəncədə yerləşən Azərbaycan Elmi Tədqiqat Bitki Mühafizəsi İnstitutuna rəhbərlik edir. O, elmi fəaliyyətindəki uğurlara görə "Şərəf nişanı", "Qırmızı Əmək Bayrağı" və "Şöhrət" ordenlərinə layiq görülmüşdür.

Akademik Siddiqə Məmmədova tədbirin təşkilatçılarına və iştirakçılarına minnətdarlığını bildirmişdir.

Tədbir konsert proqramı ilə davam etdirilmişdir.

Azərbaycan.- 2010.-7 mart.- S. 3.