Daxili Qoşunların zabitlərinə yeni mənzillərin orderləri təqdim edilmişdir

Martın 10-da Daxili İşlər Nazirliyinin Daxili Qoşunlarının (DQ) Nərimanov rayonunda yerləşən "N" saylı hərbi hissəsində zabitlər üçün yeni inşa edilmiş yaşayış binası istifadəyə verilmişdir.

Bu münasibətlə keçirilmiş mərasimdə daxili işlər naziri, general-polkovnik Ramil Usubov iştirak etmişdir.

Daxili Qoşunların komandanı, general-leytenant Zakir Həsənov bildirmişdir ki, açılışına toplaşdığımız zabit yataqxanası Azərbaycan Prezidenti, Silahlı Qüvvələrin Ali Baş Komandanı İlham Əliyevin Daxili Qoşunların maddi-texniki bazasının möhkəmləndirilməsinə göstərdiyi yüksək diqqət və qayğının bariz nümunəsidir. Natiq dövlətimizin başçısının tapşırığı ilə son illər şəxsi heyətin sosial problemlərinin həlli istiqamətində mühüm işlərin görüldüyünü, Daxili Qoşunlar üçün müxtəlif təyinatlı obyektlərin tikilib istifadəyə verildiyini nəzərə çarpdırmışdır.

Göstərilən diqqət və qayğıya görə şəxsi heyət adından dövlətimizin başçısına minnətdarlığını bildirən komandan söyləmişdir ki, Daxili Qoşunların əsgər və zabitləri bundan sonra da öz xidmətlərini yüksək səviyyədə təşkil edəcək, dövlət və dövlətçilik naminə hər an bütün əmrləri yerinə yetirməyə hazır olacaqlar.

Yeni mənzil alanlardan mayor Zöhrab Əsgərov, zabit ailəsinin üzvü Səbinə Əliyeva çıxış edərək hərbi qulluqçulara və onların ailələrinin sosial problemlərinin həllinə göstərdiyi diqqət və qayğıya görə Azərbaycan Prezidenti, Silahlı Qüvvələrin Ali Baş Komandanı İlham Əliyevə dərin minnətdarlıqlarını bildirmişlər. Bu diqqət və qayğıya əməli işləri ilə cavab verəcəklərini, bundan sonra da xidməti vəzifə borclarını ləyaqətlə, şərəflə yerinə yetirəcəklərini vurğulamışlar.

Prezident İlham Əliyevin təbriklərini zabitlərə çatdıran daxili işlər naziri, general-polkovnik Ramil Usubov yeni binanın istifadəyə verilməsinin Daxili Qoşunların həyatında çox əlamətdar hadisə olduğunu bildirmiş, şəxsi heyətə xidmətdə uğurlar arzulamışdır.

Nazir demişdir ki, Azərbaycan Silahlı Qüvvələrinə, daxili işlər orqanlarının, onun ayrılmaz hissəsi olan Daxili Qoşunların sosial problemlərinin həllinə daim diqqət yetirən Prezident İlham Əliyev hər il bu istiqamətdə çox mühüm addımlar atır. Bu binanın istifadəyə verilməsi bir daha sübut edir ki, hərbçilərin sosial problemlərinin həlli, onların yaxşı yaşamasına əlverişli şəraitin yaradılması ölkəmizin başçısının daim diqqətindədir.

Nazir Ramil Usubov, eyni zamanda, Daxili Qoşunların şəxsi heyətinin həmişə dövlətçiliyə sədaqətlə xidmət etdiyini xüsusi vurğulamışdır. Bildirmişdir ki, Daxili Qoşunlarda peşəkar, mənəvi psixoloji hazırlıq ildən-ilə inkişaf edir. Bu gün Daxili İşlər Nazirliyinin Daxili Qoşunlarının şəxsi heyəti, onun əsgərləri, gizirləri, zabitləri Vətənə, xalqa sədaqətlə, vicdanla xidmət edir. Biz əminik ki, Daxili Qoşunların şəxsi heyəti bundan sonra da ölkəmizdə əmin-amanlığın, ictimai asayişin qorunmasında, cinayətkarlığa qarşı mübarizədə fərqlənəcəkdir.

General-polkovnik Ramil Usubov zabitlərə yeni mənzillərin orderlərini təqdim etmişdir.

Məlumat verilmişdir ki, beş mərtəbədən ibarət olan bina 60 mənzillidir. Mənzillərin 20-si bir, 32-si iki, 8-i isə üçotaqlıdır. Mənzillər bütün lazımi avadanlıqla təmin edilmişdir. Binanın su, elektrik, istilik sistemi və qazanxanası vardır.

Açılışı bildirən qırmızı lent kəsildikdən sonra mərasim iştirakçıları mənzillərə baxmış, burada yaradılan şəraitlə tanış olmuşlar.

AzərTAc

Azərbaycan.- 2010.- 11 mart.- S. 3.