Dövlət qayğısı Ağdaşı daha da müasirləşdirir

Azərbaycanda sosial-iqtisadi inkişaf yeni mərhələdə uğurla davam edir. Qəbul edilən layihələr və proqramlar layiqincə yerinə yetirilir. Həyata keçirilən tədbirlər sayəsində ölkəmiz dünya iqtisadi proseslərinə daha inamla və gərəkli tərəfdaş kimi qoşulur. 2009-cu il də belə oldu. Azərbaycan sürətlə inkişaf edən ölkələr arasında yerini qorudu. Halbuki dünyanı bürümüş maliyyə böhranı çox ölkəni sosial-iqtisadi problemlər qarşısında qoyub. Ölkəmiz isə ötən sınaq ilini uğurla başa vuraraq, yüksək inkişaf tempini qoruyub saxlaya bildi. 2009-cu ildə ümumi daxili məhsul 9,3 faiz artıb. Bunu tarixi nailiyyət adlandıran Prezident İlham Əliyev haqlı olaraq qeyd edir ki, ölkənin bütün uğurlarının təməlində düşünülmüş siyasət və düzgün atılmış addımlar durur. Uğurları şərtləndirən amillərdən biri də ölkənin bütün regionlarının inkişaf dinamikasının diqqətdə saxlanılmasıdır. Bu baxımdan ölkə Prezidenti İlham Əliyevin bölgələrə səfərləri, hər bir rayonun sosial-iqtisadi vəziyyəti ilə yerində tanış olması, lazımi tədbirlərin həyata keçirilməsi ilə bağlı tapşırıq və tövsiyələrini verməsi çox əhəmiyyətli məsələdir. Bu, ölkə rəhbəri ilə xalqın canlı ünsiyyəti baxımından da təqdirəlayiq haldır.

Prezident İlham Əliyevin fevralın 12-dəki səfərini də ağdaşlılar ölkə rəhbərinin onlara göstərdiyi diqqət və qayğının təzahürü kimi qəbul edirlər.

Son illər Azərbaycanın inkişaf tempinə uyğun olaraq Ağdaş rayonunda da qazanılan nailiyyətlər göz önündədir. Ötən il rayonda ümumi məhsul istehsalı 1,6 dəfə, sənaye məhsulları istehsalı 4 dəfə, pərakəndə əmtəə dövriyyəsi 10,4 faiz, əhalinin gəlirləri 26,7 faiz, adambaşına düşən gəlirlər 25,2 faiz, orta aylıq əməkhaqqı 25,5 faiz artıb. Əvvəlki illə müqayisədə investisiya qoyuluşu da 2,6 dəfə çoxalıb. Bir il ərzində açılan 1165 yeni iş yerindən 606-sı daimidir.

Rayonda 1103510 kilovoltluq "Ağdaş" elektrik yarımstansiyası tikilib istifadəyə verilib. "Şəmsabad" qazpaylayıcı stansiya işə salınıb, 23 kənd təbii qazla təmin olunub. Bir çox səhiyyə, təhsil, mədəniyyət ocaqları tikilib və ya əsaslı təmir olunub. Rayon əhalisinin sosial rifah halının yaxşılaşdırılması üçün gərəkli tədbirlər görülüb, tədbirlər indi də davam etdirilir.

Ağdaş RİH başçısı Rafiq Niftəliyev bildirdi ki, Prezident İlham Əliyevin rayonda görülən işlərlə bağlı söylədiyi xoş sözlər bütün ağdaşlıları qürurlandırıb, çalışacağıq ki, bundan sonra da cənab Prezidentin tapşırıq və tövsiyələrini vaxtında yerinə yetirək.

Rayonu gəzib-dolaşdıqca, ayrı-ayrı adamlarla söhbətləşdikcə hiss edirsən ki, işgüzarlıq, əhvali-ruhiyyə yüksəldir. Təbiət, humanitar və texniki fənlər təmayüllü gimnaziyanın direktoru Şəhla Hacıbalayevanın sevinci daha hüdudsuzdur: - Mən sevinirəm, qürur duyuram ki, Ağdaş ictimaiyyəti adından möhtərəm Prezident İlham Əliyevi salamlamaq mənə nəsib oldu. Mən bu görüşü heç vaxt unutmayacağam. Təbiətən humanist və səmimi şəxs olan dövlət başçısının insanlarla qayğıkeş rəftarı hər bir ağdaşlının qəlbində xoş duyğular oyadıb. Bizim rayonda bugünkü sosial-iqtisadi tərəqqiyə, davamlı inkişafa əsası ulu öndər Heydər Əliyev tərəfindən qoyulan və cənab İlham Əliyevin uğurla davam etdirdiyi siyasi kurs sayəsində nail olub.

Son 6-7 ildə Ağdaşda 1672 şagird yerlik 6 məktəb binası, 800 şagirdlik 40 sinif otağı tikilib, 4 məktəb əsaslı təmir olunub. Şəhid ailələri və əlillər üçün 48 mənzilli yaşayış binası, Dövlət Sosial Müdafiə Fondunun Ağdaş rayon şöbəsi üçün yeni inzibati bina və 9 saylı Ərazi Vergilər İdarəsinin xidmət terminalı tikilib.

Rayon ictimaiyyətinin nümayəndələri ilə görüşərkən Prezident İlham Əliyev Ağdaşda görülən abadlıq-qurucluluq işləri ilə bağlı deyib: "Mən çox şadam ki, Ağdaşda işlər yaxşı gedir, gözəl obyektlər istifadəyə verilir. Əminəm ki, növbəti illərdə regionların sosial-iqtisadi inkişafı Dövlət Proqramının ikinci mərhələsinin icrası nəticəsində əsas məsələlər, sosial-iqtisadi məsələlər öz həllini tapacaqdır. Bu proqramın 2010-cu ildə başa çatması nəzərdə tutulur. Əminəm ki, o vaxta qədər bütün əsas məsələlər öz həllini tapacaqdır. Biz sizinlə bundan sonra da görüşəcəyik. Əminəm ki, Ağdaşda gözəl açılışlar hələ çox olacaqdır".

Ağdaş Gənclər və İdman İdarəsinin rəisi Azad Gözəlovla da görüşdük. O, təəssüratını bizimlə belə bölüşdü: - Beş il əvvəl möhtərəm Prezident İlham Əliyev Ağdaşda olarkən yeni Olimpiya İdman Kompleksinin tikintisi ilə bağlı ona müraciət olunmuşdu. Çox şadıq ki, ölkə rəhbəri Azərbaycan idmanına müəyyən töhfələr vermiş Ağdaşda möhtəşəm bir Olimpiya İdman Kompleksinin tikilib istifadəyə verilməsi üçün qayğısını əsirgəmədi və onun açılışında şəxsən iştirak etdi. Belə böyük qayğıya görə cənab Prezidentə dərin təşəkkürümüzü bildiririk. Ümidvarıq ki, yaradılan şəraitin müqabilində rayon gəncləri ölkə idmanının şan-şöhrətini artırmaq, Ağdaşın adını ucaltmaq üçün belə möhtəşəm kompleksdən səmərəli istifadə edəcəklər. Bir məqama da toxunmaq istəyirəm. Ölkəmizdə savadlı və bacarıqlı kadrların yüksək vəzifələrə təyin olunmaları üçün hər cür şərait yaradılır. Bu, birbaşa dövlət gənclər siyasətinin tərkib hissəsidir. Ağdaşda gənclərin rayonun ictimai-siyasi həyatında fəal iştirakı, müəyyən vəzifələrə təyin olunması artıq ənənə halını alıb. Gəncliyə göstərilən bu qayğıya və etimada görə də möhtərəm Prezidentimizə minnətdarlığımızı bildiririk.

Ağdaş Humanitar Kollecinin direktoru Tənzilə Şıxıyeva ulu öndər Heydər Əliyevi Azərbaycan rəhbəri kimi sovetlər dönəmində Ağdaşa səfəri zamanı qarşılayanlardan olub. Bu gün ulu öndərin layiqli davamçısı Prezident İlham Əliyevi rayonda qarşılayanlar arasında olduğundan da qürur duyduğunu bildirən T.Şıxıyeva söhbət zamanı xüsusi vurğuladı ki, həm ulu öndər Heydər Əliyevin, həm də Prezident İlham Əliyevin Ağdaşa səfərindən sonra uğurlu işlərə start verilib. Bu gün Azərbaycanın regionlarında abadlıq-tikinti-quruculuq işlərinin görülməsini, müxtəlif sosial layihələrin və proqramların uğurla icra olunmasını, həmçinin Ağdaşda həyata keçirilən yenidənqurma tədbirlərini Tənzilə Şıxıyeva ulu öndər Heydər Əliyevin inkişaf strategiyasının və Prezident İlham Əliyevin uzaqgörənliklə həyata keçirdiyi məqsədyönlü siyasətin təzahürü sayır. "Yeniləşən Azərbaycana yeni məktəb" layihəsindən söz açan Tənzilə Şıxıyeva Heydər Əliyev Fondunun dəstəyi ilə Ağdaşda inşa edilən yeni təhsil və mədəniyyət ocaqlarına, həmçinin rayonun həyatında böyük mədəni hadisəyə çevrilmiş Habil Əliyev adına Ağdaş Musiqi Məktəbinin tikilib istifadəyə verilməsinə görə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevaya təhsil və mədəniyyət işçiləri adından təşəkkürünü bildirdi.

Respublikanın əməkdar müəllimi, rayon ağsaqqalı Akif Hacızadənin də ürək sözlərini dinlədik: - Mən möhtərəm Prezidentin rayonlara səfərini çox yüksək qiymətləndirirəm. Onun hər səfəri müəyyən bir uğurun, nailiyyətin başlanğıcı deməkdir. Ağdaşda həyati əhəmiyyətə malik su məsələsi həll olunmaq üzrədir. Dövlət proqramına uyğun olaraq Ağdaş şəhərinin su təchizatı probleminin həlli məsələsi Asiya İnkişaf Bankının "Azərbaycan Respublikasında kiçik şəhərlərdə su təchizatı və kanalizasiya layihəsi"nə daxil edilib. Olduqca xoşdur ki, Ağdaşda yeni su xəttinin açılışında möhtərəm Prezident İlham Əliyev iştirak etdi, rayon sakinlərinə ürək sözlərini bildirdi, yeni su xəttinin istifadəyə verilməsini Ağdaşın həyatında tarixi hadisə adlandırdı.

Rayonumuzun Kükəl kəndi ərazisində yanvarın əvvəlindən regional elektrik yarımstansiyasının tikintisinə hazırlıq gedirdi. 15 hektarlıq ərazidə 125 MVA-lıq iki transformator yarımstansiyası qurulacaq. Möhtərəm Prezident həmin yarımstansiyanın təməlini özü qoydu. Dediyim odur ki, dövlət başçısı işıqdan, sudan tutmuş hər şeyə qədər qayğı göstərir, bütün bölgələrin inkişafı, həm də hərtərəfli inkişafı üçün yorulmaq bilmədən çalışır.

Prezident İlham Əliyev Ağdaşda rayon mərkəzi xəstəxanasının yeni binasının da təməlini qoyub. 100 çarpayılıq bu xəstəxana üçün 5,3 hektar torpaq sahəsi ayrılıb. Xəstəxananın həkimi Nuru Nuruyev bildirdi ki, iki ilə istifadəyə verilməsi nəzərdə tutulan 6 korpusdan ibarət yeni xəstəxana rayon əhalisinin sağlamlığının qorunmasında, daha yüksək tibbi xidmətin təşkilində mühüm rol oynayacaq.

Bəli, Ağdaş tikilir, qurulur, yeni layihələrin icrasına başlanılır və hər bir tədbir rayon sakinlərinin gün-güzəranının yaxşılaşdırılması, rahatlığı üçün nəzərdə tutulub. Söhbət etdiyimiz ağdaşlılar hərtərəfli qayğıya görə ölkə rəhbərinə dərin təşəkkürlərini bildirməklə yanaşı, üzərlərinə düşən vəzifənin öhdəsindən ləyaqətlə gələcəklərini söylədilər.

Telman NƏZƏRLİ

Azərbaycan.- 2010.- 14 mart.- S. 3.