Prezident İlham Əliyev Cəlilabadda şahmat məktəbinin açılışında iştirak etmişdir

Aprelin 29-da Prezident İlham Əliyev Cəlilabaddakı şahmat məktəbinin açılışında iştirak etmişdir.

Dövlət başçısı açılışı bildirən lenti kəsdi və məktəblə yaxından tanış oldu.

Məktəbdə ümummilli lider Heydər Əliyevin və Prezident İlham Əliyevin ölkəmizdə idmanın, o cümlədən şahmatın inkişafı ilə bağlı xidmətlərinə həsr olunan fotoguşə yaradılmışdır.

Bildirildi ki, Prezident İlham Əliyevin "Azərbaycanda şahmatın inkişaf etdirilməsi haqqında" Sərəncamı və "2009-2014-cü illərdə Azərbaycanda şahmatın inkişaf etdirilməsi Dövlət Proqramı"na uyğun olaraq beynəlxalq standartlar səviyyəsində tikilmiş şahmat məktəbinin ümumi ərazisi 550 kvadratmetrdir. Məktəbin şahmat fiquru olan top şəklində tikilən binası 6 mərtəbəlidir. Hər mərtəbədə yarış, təlim-məşq, xüsusi şahmat proqramları ilə yüklənmiş kompüter zalları vardır. Bütün mərtəbələrdə müasir tipli elektron və maqnit şahmat lövhələri quraşdırılmışdır. Müasir maddi-texniki bazaya malik olan məktəbdə şahmat üzrə müxtəlif səviyyəli yarışların keçirilməsi üçün hər cür şərait yaradılmışdır. Ərazi abadlaşdırılmış, məktəbin girişində şahmat fiqurları quraşdırılmışdır.

Prezident İlham Əliyev burada uşaqlarla şahmat oynadı, onlara idman karyeralarında uğurlar arzuladı.

AzərTAc

Azərbaycan.- 2010.- 1 may.- S. 1.