Azərbaycanda sosial proqramlar uğurla icra edilir

Cari ilin birinci rübünün makroiqtisadi göstəriciləri bunu deməyə əsas verir

Azərbaycanda hər bir vətəndaşın mənafeyinə cavab verən, təminatlı gələcəyə etibarlı zəmin yaradan təkmil siyasi kursun davam etdirilməsi bugünkü uğurlarımızı şərtləndirir. Son yeddi ildə ictimai-siyasi sabitliyin, davamlı sosial-iqtisadi inkişafın təmin edilməsi, insan və vətəndaş hüquq və azadlıqlarının qorunması sahəsində atılan məqsədyönlü addımlar ölkəmizin beynəlxalq aləmdə nüfuzunu daha da gücləndirmişdir. İqtisadi, siyasi, hüquqi, mədəni, humanitar və digər sahələrdə həlledici uğurlar qazanmış müstəqil respublikamız dünya miqyasında dinamik inkişaf edən ölkə kimi qəbul olunur. Azərbaycanın son illərdəki dövlət büdcəsinə nəzər saldıqda həyata keçirilən iqtisadi strategiyanın milli maraq və mənafe baxımından səmərəliliyi bunu bir daha təsdiq edir.

Qlobal maliyyə böhranına baxmayaraq, 2009-cu ildə ümumi daxili məhsulda, eləcə də qeyri-neft sektorunda artımın müşahidə olunması respublikanın iqtisadi siyasətinin qlobal miqyasda cərəyan edən neqativ təsirlərə müqavimət gücünü nümayiş etdirdi. Dünya maliyyə böhranının Azərbaycana guya ciddi təsir göstərəcəyi ilə bağlı səslənən bəzi fikirlər də özünü doğrultmadı. Ölkəmizdə həyata keçirilən qlobal infrastruktur layihələrinin icrası ötən bir ildə də inamla davam etdirilmiş, vətəndaşların sosial mənafeyinə xidmət edən kompleks tədbirlər sistemi həyata keçirilmiş, bütün bunların da əsasında məhz insan amili, vətəndaşa layiqli xidmət məramı dayanmışdır. Bu sırada Bakı-Oğuz-Qəbələ su kəmərinin, Bakı-Tbilisi-Qars dəmir yolu xəttinin çəkilişini, paytaxtda yeni körpülərin, yol ötürücülərinin, piyada keçidlərinin istifadəyə verilməsi, respublika əhəmiyyətli yollarda əsaslı yenidənqurma işlərinin aparılmasını, regionlarda yeni təhsil, səhiyyə, mədəniyyət, olimpiya-idman komplekslərinin tikintisini xüsusi vurğulamaq olar. Bunların hamısı Azərbaycan vətəndaşlarının firavan, rahat yaşamasına xidmət edən qlobal investisiya layihələridir.

2009-cu ildə ölkə iqtisadiyyatı təxminən 10 faiz artmışdır. Belə bir yüksək göstərici dünya tarixinə böhran ili kimi düşən ildə əldə olunmuşdur. 2010-cu ilin birinci rübündə də iqtisadiyyat 5,4 faiz artmışdır. Artım sənaye istehsalında 5,6 faiz, qeyri-neft sektorunda 2,8 faiz, kənd təsərrüfatında 1,5 faiz olmuşdur. İnflyasiya cəmi 3,8 faiz təşkil etmişdir ki, bu da öz növbəsində sosial məsələlərin həlli üçün əlavə imkanlar yaradır.

Prezident İlham Əliyevin 14 aprel 2009-cu il tarixli fərmanı ilə təsdiq edilmiş "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı" davamlı inkişaf sahəsində ötən illərdə əldə olunmuş nəticələrin uğurla davam etdirilməsi baxımından böyük əhəmiyyət kəsb edən sənəddir. Proqrama əsasən, qarşıdakı müddətdə ölkənin təbii və əmək potensialından səmərəli istifadə etməklə qeyri-neft sektorunun sürətli inkişafının təmini, infrastrukturun yaxşılaşdırılması istiqamətində tədbirlərin davam etdirilməsi, sahibkarlıq mühitinin yaxşılaşdırılması ilə bağlı məqsədyönlü tədbirlərin həyata keçirilməsi, özəl sektorun inkişafının daha da sürətləndirilməsi, ixracyönümlü məhsul istehsalının stimullaşdırılması, müasir tipli infrastruktur obyektlərinin yaradılması, əhalinin kommunal xidmətlərlə təminatının yaxşılaşdırılması, yoxsulluğun səviyyəsinin azaldılması və digər mühüm tədbirlər nəzərdə tutulub. Birinci Dövlət Proqramında olduğu kimi, yeni dövlət proqramında da sosial infrastrukturun inkişaf etdirilməsi, müasir tələblər səviyyəsində yenidən qurulması prioritet vəzifə kimi müəyyənləşdirilmişdir.

Prezident İlham Əliyev Nazirlər Kabinetinin 2010-cu ilin birinci rübünün sosial-iqtisadi inkişafının yekunlarına həsr olunmuş iclasda demişdir: "Əgər güclü iqtisadi siyasət olmasa, heç bir sosial layihəni, sosial proqramı icra etmək mümkün olmayacaqdır. Biz bütün sosial proqramları uğurla icra edirik. Pensiyalar, maaşlar vaxtaşırı artırılır. Bu il də maaşların və pensiyaların artımı nəzərdə tutulur. Ünvanlı sosial proqram uğurla icra edilir. Bütün sosial proqramlar, sosial ödəmələr vaxtında təmin edilir.

Sosial obyektlərin tikintisi istiqamətində çox böyük işlər görülür. Təkcə bu ilin birinci rübündə proqrama dövlət büdcəsində nəzərdə tutulmayan layihələr əlavə edildi. Çünki yerlərdən xahişlər oldu ki, bəzi rayonlarda tibbi xidmətin lazımi səviyyədə olmaması insanları narahat edir. Baxmayaraq, son illərdə demək olar ki, hər bir bölgədə ən müasir tibbi avadanlıqla təchiz edilmiş müasir xəstəxanalar, müalicə diaqnostika kompleksləri tikilmişdir və onlar insanlara gözəl xidmət göstərir".

Son illərdə büdcə zərfində sosialyönümlü xərclərin prioritetliyi iqtisadiyyatda bu sahənin üstünlüyünü bir daha təsdiqləyir. Bu siyasətin real nəticələri isə insanların gündəlik həyatında öz təcəssümünü tapır. Ölkəmizdə ünvanlı sosial yardım proqramının uğurla həyata keçirilməsi, respublikamızda yeni açılan iş yerlərinin sayının 840 mini ötməsi sosial siyasətin praktik nəticələri kimi diqqəti çəkir. Sosial sahəyə qayğının ildən-ilə artırılması ölkə vətəndaşlarının rifah halının yüksəlməsi ilə nəticələnir.

Sosial islahatların əsas istiqamətlərində əhalinin məşğulluğunun təmin edilməsi, yeni iş yerlərinin açılması və paralel olaraq sosial müdafiəsi məsələlərində ünvanlılıq prinsipinə üstünlük verilməsi, aztəminatlı ailələrin, əlillərin, ailə başçısını itirənlərin, şəhid ailələrinin və bu qəbildən olan digər şəxslərin pensiya və müavinət təminatının yaxşılaşdırılması, onların həyat səviyyəsinin yüksəldilməsinə xidmət edir. Prezident İlham Əliyev cari ilin birinci rübünün sosial-iqtisadi yekunlarına həsr olunmuş iclasda bununla bağlı demişdir: "Ölkəmizdə bütövlükdə sosial rifah məsələləri uğurla icra edilir. Birinci rübdə orta əməkhaqqı qalxmışdır. Bu gün orta əməkhaqqı 304 manat, yaxud da ki, 380 dollar təşkil edir. Hesab edirəm ki, bu, yaxşı nəticədir, yaxşı göstəricidir. Ancaq, əlbəttə, ölkə iqtisadiyyatı elə inkişaf etməlidir ki, orta əməkhaqqı da artsın. Ümid edirəm ki, biz həm dövlət tərəfindən görüləcək tədbirlər nəticəsində və özəl sektorun inkişafı sayəsində buna nail olacağıq".

Cari ilin birinci rübündə Sahibkarlığa Kömək Milli Fondunun vəsaitləri hesabına 197 sahibkarlıq subyektinə 19,1 milyon manat güzəştli kreditlər verilmişdir ki, bu da 2009-cu illə müqayisədə 2 dəfə çoxdur. Ötən dövr özəl sahibkarlığın sabit iqtisadi münasibətlər qurması ilə də səciyyəvi olmuş, nəticədə qeyri-dövlət sektorunun vergi daxilolmalarında xüsusui çəkisi 67,6 faizə çatmışdır. Bütün bunlar ölkə rəhbərliyi tərəfindən özəl sektorun inkişafına göstərilən diqqətin parlaq təzahürüdür.

Dünyada maliyyə böhranının nəzərəçarpacaq dərəcədə zəifləməsi, bir çox ölkələrdə iqtisadi artımın bərpa olunması, maliyyə-kredit bazarlarında baş verən canlanma, dünya bazarlarında enerji daşıyıcılarının qiymətlərinin artması 2010-cı ildə də Azərbaycan iqtisadiyyatının inkişafına əlverişli şərait yaradacaqdır.

Başqa sözlə desək, respublikamızın regionda analoqu olmayan inkişaf mərhələsinə qədəm qoyması - ümumi daxili məhsulun artım tempi, büdcə gəlirlərinin ildən-ilə əhəmiyyətli dərəcədə çoxalması iqtisadi sektorda islahatların genişləndirilməsinə, sosial-mədəni modernləşməyə imkan yaratmışdır.

E.HACIALIYEV

Azərbaycan.- 2010.- 2 may.- S. 1.