Azərbaycan enerji təhlükəsizliyi məsələlərində NATO-nun etibarlı tərəfdaşıdır

Rumıniyanın Azərbaycandakı səfiri, Şimali Atlantika Alyansının (NATO) ölkəmizdəki əlaqələndiricisi Nikolaye Ureke mayın 4-də NATO-nun Bakıda keçirilən konfransında Azərbaycanın Alyansa daxil olmaq imkanları barədə fikirlərini söyləmişdir.

Diplomat demişdir: "Məqsədimiz Azərbaycanı NATO standartlarına optimal yaxınlaşdırmaqdır".

O vurğulamışdır ki, Azərbaycan NATO ilə əməkdaşlıq dövründə Alyansa inteqrasiya istiqamətində böyük uğurlar qazanmışdır: "Azərbaycan Şimali Atlantika strukturuna inteqrasiyaya sadiq olduğunu dəfələrlə bəyan etmişdir. Biz Əfqanıstan, İraq və digər regionlarda sabitliyin yaradılmasına Azərbaycanın verdiyi töhfəni qiymətləndiririk".

Konfransda çıxış edən Norveçin Azərbaycandakı səfiri Yon Romberq bildirmişdir ki, bu ilin noyabrında Lissabonda, NATO-nun növbəti sammitində qurumun əsas konsepsiyasını qəbul etmək planlaşdırılır.

Diplomat demişdir: "Bu konsepsiya əvvəllər 19 dövləti əhatə edirdisə, indi həmin siyahı 28 dövlətə qədər genişlənəcəkdir".

Y.Romberq vurğulamışdır ki, Azərbaycan enerji təhlükəsizliyi, habelə Əfqanıstanda və digər regionlarda birgə əməliyyatların keçirilməsi məsələlərində NATO-nun etibarlı tərəfdaşıdır.

Diplomat demişdir: "NATO-ya üzv olmaq Azərbaycanın öz istəyindən asılıdır. Hər halda, biz bu ölkə ilə əməkdaşlığı davam etdirəcəyik. Azərbaycan Alyansın üzvü olmaq istəsə, biz ona bu məsələdə kömək etməyə hazırıq".

AzərTAc

Azərbaycan.- 2010.- 5 may.- S. 1