Azərbaycan yeni informasiya məkanında ulu öndər Heydər Əliyevin müəyyənləşdirdiyi prinsiplər əsasında möhkəmlənir

İnformasiya-kommunikasiya texnologiyalarının sürətli inkişafı sayəsində yaşadığımız dünyada yeni reallıqlar yaranmış, dövlətlər arasında sərhədlər "silinmiş", xalqlar arasında məsafə xeyli "kiçilmişdir". Peyk və internet şəbəkəsi fərdlərin, xalqların, dövlətlərin əlaqələrinin intensivləşməsində, keyfiyyətcə yaxşılaşmasında geniş imkanlar açmışdır. Hazırda Yer kürəsi vahid informasiya məkanına çevrilməkdədir.

Dövlətimizin dünya birliyinə inteqrasiyası sürətləndikcə, iqtisadi qüdrəti artdıqca "Azərbaycan" kəlməsi müxtəlif ölkələrin KİV-lərində daha tez-tez işlənir. Lakin inteqrasiya, iqtisadi qüdrət asanlıqla əldə edilməmişdir. Bundan ötrü, ilk növbədə, dövlətçilik bərqərar olunmalı, möhkəmləndirilməli idi.

Ölkəmizin inkişafının strateji xəttini müasir müstəqil Azərbaycan dövlətinin banisi, ulu öndər Heydər Əliyev müəyyənləşdirmişdir. Hamımızın yaxşı yadındadır: ilk dövrlərdə milli ideoloji xəttimizin müəyyən edilməsi zamanı müxtəlif təkliflər eşidilirdi. Türkçülüyə istinad etmək, dinə söykənmək və digər prinsipləri qəbul etmək təklifi ilə çıxış edənlər var idi. Amma bu təkliflərin hər biri yarımçıq idi, mükəmməl deyildi. Hansısa elementin çatışmaması və yarımçıq tezis inkişafa, ideoloji xəttə əngəl olardı. Bu prinsipləri tamamlamaq, inkişaf etdirmək və mütləqləşdirmək lazım idi. Bunu məhz ümummilli lider Heydər Əliyev etdi və Azərbaycanın ideoloji xəttinin aşağıdakı təməl prinsiplərini müəyyənləşdirdi: birincisi, dövlətçilik. Yeni Azərbaycan Partiyasının yaranmasının 6 illiyi ilə bağlı keçirilən tədbirdə çıxış edən ulu öndər dövlətçiliyin nə olduğunu və nəyə görə ideologiyamızda bu amilə birinci yer verildiyini çox aydın şəkildə ifadə etmişdir: xalq üçün birinci onun dövlətidir, əgər dövlət yoxdursa, hansı ideologiya və prinsipdən danışmaq olar?

Ümummilli lider təməl prinsiplərində sonrakı yerdə qanunçuluğu müəyyən etmişdir: dövlət varsa, qanun olmalıdır. Əgər qanun yoxdursa, dövlət mövcud olmayacaq. Dövlət qanuna söykənməlidir. Dövlətin söykəndiyi qanun onun idarə edilməsinin əsas xətlərini və prinsiplərini müəyyən edir. Bu qanunlar olmasa, idarəçilik olmayacaq. İdarəçiliksiz isə dövlətin gələcəyi təhlükə altına düşər.

Müdrik siyasət xadiminin müəyyən etdiyi təməl prinsiplərindən biri də varislikdir. Varislik dövlətin idarəçiliyində, siyasətdə, iqtisadiyyatda və ideologiyada prinsipial olaraq əldə edilənlərin gələcək nəsillərə ötürülməsidir. Varislik mexaniki deyil, yaradıcı şəkildə, təkamül yolu ilə baş verir. Yaradıcı varislik nəticəsində biz bu gün ümummilli liderimizin müəyyən etdiyi təməl üzərində Azərbaycanı irəliyə aparmaqdayıq. Yaradıcı varisliyin nəticəsidir ki, Azərbaycan özünün ideologiyasında, iqtisadiyyatında keçmişə söykənərək, gələcəyə doğru inkişaf etməkdədir. Bəzən varislik deyəndə kimlərsə hakimiyyət varisliyini önə çəkmək istəyir. Ancaq bu, hakimiyyət varisliyi, fərdi şəkildə varislik deyildir. Bu, hakimiyyətin ideoloji, siyasi, iqtisadi baxımdan gələcək nəsillərə ötürülməsidir.

Heydər Əliyevin müəyyən etdiyi digər prinsip azərbaycançılıqdır. Ümummilli lider deyirdi ki, azərbaycançılıq söykəndiyimiz təməl prinsiplərinin əsasıdır. Hələ 1992-ci ildə YAP-ın proqramı qəbul edilərkən Heydər Əliyev azərbaycançılığı vacib məram kimi göstərmişdir. İndi dünyada yaşayan 50 milyon azərbaycanlını vahid ideya - azərbaycançılıq ideyası birləşdirir. Bu ideya bütün dünya azərbaycanlılarının, Azərbaycanda yaşayan bütün xalqların və Azərbaycan dövlətinin söykəndiyi təməl prinsiplərindən biridir. Ölkəmizə düşmən olan Ermənistan bütün dünya ermənilərini erməni kilsəsi ətrafında birləşdiribdir. Biz isə bütün dünyada olan azərbaycanlıları azərbaycançılıq ideyası altında birləşdirmişik.

Azərbaycan dövlətinin çox vacib təməl prinsiplərindən biri də vətəndaş həmrəyliyidir. Məhz Heydər Əliyevin siyasi hakimiyyətə qayıdışı ilə Azərbaycanda vətəndaş sülhünə nail olunmuşdur. Onun ölkədə vətəndaş qarşıdurmasını aradan qaldırmaq istiqamətində gördüyü tədbirlər, dövlət çevrilişi cəhdlərinin qarşısını alması, silahlı yolla hakimiyyətə gəlmək ənənəsinə birdəfəlik son qoyması və s. vətəndaş sülhünə yol açmışdır. Vətəndaş həmrəyliyi ölkəmiz üçün daimi prinsipdir. Çünki bu bizim hamımızı birləşdirən amillərdən biridir.

Heydər Əliyevin müəyyən etdiyi digər bir prinsip isə sosial ədalətdir. Cəmiyyətdə sosial ədalət olmasa, qarşıdurma qaçılmazdır. Bütün cəmiyyətlərin tarixi göstərir ki, ədalət prinsipi pozulduqda qarşıdurma meyilləri güclənir. Bu isə xaosa və anarxiyaya gətirib çıxara bilər. Qədim müdriklərdən biri deyirdi ki, ən yaxşı dövlət o dövlətdir ki, orada nə yoxsul, nə də həddən artıq varlı vətəndaşlar var. Ədalət prinsipinin təmin olunması islahatlardan keçir. Davamlı islahatlar, sürətli inkişaf yolu, cəmiyyətdə insanların rifah halının yaxşılaşdırılması fonunda sosial ədalətin təmin olunması siyasi və iqtisadi vasitələrlə ölkəmizdə uğurla gerçəkləşir.

Müasir müstəqil Azərbaycan yeni informasiya məkanında məhz bu meyarlar əsasında möhkəmlənir, nüfuz qazanır, beynəlxalq münasibətlərə töhfələr verir.

Ümummilli lider həmişə vurğulayırdı ki, milli ideologiyamız tarixi keçmişimizə, adət-ənənələrimizə, xalqımızın mentalitetinə söykənməlidir. Bu, həqiqətən də belədir. Görkəmli filosof alim, akademik Ramiz Mehdiyev əsərlərində bu prinsipi tarixi reallıq kontekstində əsaslandırır, ulu öndərin irəli sürdüyü məramlar əsasında yeni istiqamətlər müəyyənləşdirir. Azərbaycan xalqı məhz bu prinsiplərə söykənərək gələcəyə doğru inamla addımlayır, dövlətimiz inkişaf edir. Heç bir qüvvə ümummilli prinsiplərə zidd getməməlidir. Kimsə dini qabardıb fundamentalizmi ölkəmizə gətirmək, kimsə azərbaycançılığı kənara sıxışdırmaq istəyirsə, onun qarşısı mütləq alınmalıdır. Akademik Ramiz Mehdiyevin vurğuladığı kimi, Azərbaycanda Heydər Əliyevin müəyyən etdiyi ideoloji prinsiplərdən kənarlaşmaq qeyri-mümkündür. Necə ki, Türkiyədə heç bir siyasi dairə Atatürkün müəyyənləşdirdiyi prinsiplərdən imtina edə bilməz, ABŞ öz banilərinin müəyyən etdiyi Konstitusiya prinsiplərindən uzaqlaşa bilməz, Böyük Britaniya tarixi ənənələrinin ziddinə gedə bilməz, Yaponiya tarixi ənənələrindən kənara çıxaraq ölkəni başqa istiqamətə yönəldə bilməz, Azərbaycanda da Heydər Əliyevin müəyyən etdiyi təməl prinsiplərindən kənara çıxıla bilməz.

Azərbaycan Prezidenti İlham Əliyev bu prinsiplərə sadiqdir. Məhz bu sadiqlik, ümummilli liderin müəyyənləşdirdiyi siyasətin davam etdirilməsi ölkəmizə uğur qazandırmış, onu dünyanın nüfuzlu KİV-lərinin diqqət obyektinə çevirmişdir. Uğurlarımız xaricdə diqqətlə izlənilir. İnamla demək olar ki, Azərbaycan informasiya blokadasını yararaq, yeniləşmiş dünya informasiya məkanına daxil olmuşdur və erməni təbliğatına qarşı qətiyyətlə mübarizə aparır. Məlumdur ki, erməni təbliğat maşını yalan və iftira üzərində qurulan bir mexanizmdir. Bu gün ermənilər uydurma "erməni soyqırımı" haqqında danışır, Azərbaycan isə müxtəlif vasitələrlə dünya birliyinə Xocalı soyqırımı, azərbaycanlılara qarşı törədilən vəhşiliklər barədə həqiqətləri çatdırır. 1992-ci ildə Xocalıda ermənilər tərəfindən törədilən vəhşiliklərin soyqırımı olması artıq heç kimdə şübhə doğurmur. Bunun etiraf olunması isə başqa məsələdir.

Tam qətiyyətlə deyə bilərik ki, Azərbaycanın yeni informasiya məkanına daxil olması, onun dünyada tanıdılması, ermənilərin güclü təbliğat maşınının və ondan da güclü lobbisinin məkrli səyləri sayəsində düşdüyü informasiya blokadasından çıxarılması məhz Heydər Əliyevin qətiyyəti ilə mümkün olmuşdur. Ulu öndər 1993-cü ildə Prezident kimi özünün ilk xarici səfərini Fransaya etmişdi və bu, təsadüfi deyildi. O, dekabrın 21-də Parisdə mətbuat konfransında demişdir: "Mən burada olarkən daha çox yəqin etdim ki, Azərbaycanla Fransa arasında əlaqələr son dərəcə zəif olmuşdur, Fransada Azərbaycan barəsində məlumat olduqca azdır. Bəzən qeyri-obyektiv məlumat ölkəmiz, Azərbaycan dövlətinin tədbirləri barədə yalan-yanlış təsəvvür yaradır. Buna görə də hesab edirəm ki, Fransaya səfər iki ölkənin rəhbərləri arasında sıx qarşılıqlı əlaqələr, ikitərəfli münasibətlərin inkişafı üçün bünövrə yaratmaqla yanaşı, Fransada Azərbaycanın daha yaxşı təsəvvür olunması mənasında böyük əhəmiyyətə malikdir. Mən belə düşünürəm ki, bu günlər ərzində biz bunu etməyə müvəffəq olduq".

Bununla bağlı, Fransanın ölkəmizdəki ilk səfiri Jan Perrənin 1994-cü il iyulun 14-də AzərTAc-ın müxbirinə müsahibəsində dediyi sözləri də xatırlatmaq istərdim: "Açığını deyim ki, Azərbaycanı Fransaya, sözün əsl mənasında, Heydər Əliyev tanıtdı. Onun Fransaya səfərinə qədər bizim ölkədəki ermənipərəst qüvvələr Azərbaycan əleyhinə təbliğatları ilə müəyyən məqsədlərə çatmağa çalışırdılar... Prezident Heydər Əliyevin Fransaya səfəri hadisələri öz məcrasına yönəltdi. Onun bizim ölkədəki çıxışları, verdiyi bəyanatlar Azərbaycanın siyasətini və regiondakı siyasi vəziyyəti düzgün qiymətləndirməyə imkan yaratdı. Azərbaycan Fransa üçün daha anlaşıqlı, daha yaxın oldu. İndi Fransadakı erməni azlığı bilir ki, qarşıdurma mənasızdır, ərazi dəyişikliyi baş tutan sevda deyil".

Sonralar hətta düşmənlərimiz də etiraf etməyə məcbur olmuşlar ki, Heydər Əliyevin bu sahədə fəaliyyəti öz bəhrəsini vermişdir. Bədnam "Daşnaksütyun" partiyasının liderlərindən biri G.Kirakosyan demişdi ki, Heydər Əliyev Ermənistanla yanaşı, dünyada erməni lobbisini də sarsıtdı.

Həqiqətən də, Heydər Əliyev bu sahədə o vaxt heç kəsin - nə siyasətçilərin, nə təbliğat qurumlarının, nə də kütləvi informasiya vasitələrinin görə bilmədiyi işi gördü. Ümummilli liderin sayəsində Azərbaycan dünya informasiya məkanına, necə deyərlər, daimi qeydiyyata düşmüş və layiqli yerini tutmuşdur.

Bu gün ölkəmizin uğurlarından yazan əcnəbi jurnalistlər yekdilliklə etiraf edirlər ki, əgər Azərbaycan təhlükəsiz bir regionda yerləşsəydi, o, şübhəsiz, daha böyük uğurlar qazanardı. Möhkəm daxili sabitlik və təhlükəsizlik, yüksək səviyyəli dövlət idarəçiliyi, dünyəvi inkişaf xətti və Qərbə inteqrasiya Azərbaycanın uğurlarını təmin edən əsas amillərdir. Bir neçə il ardıcıl surətdə dünyada ən böyük iqtisadi artıma nail olmuş Azərbaycanda son altı ildə 840 min iş yerinin açılması, yoxsulluğun səviyyəsinin sürətlə azalaraq təqribən 49 faizdən 11 faizə düşməsi beynəlxalq mətbuatda dərc olunan materiallarda xüsusi vurğulanır. Eyni zamanda, bildirilir ki, Azərbaycan Qərbin enerji təhlükəsizliyinə böyük töhfə verir.

Təkcə mətbuat deyil, beynəlxalq maliyyə qurumları da Azərbaycanda iqtisadi inkişaf naminə görülən işləri yüksək qiymətləndirir. Dünya iqtisadiyyatına inteqrasiya edən Azərbaycanda hətta böhran ilində - 2009-cu ildə də uğurlar qazanılmış, bütün infrastruktur layihələri, sosial proqramlar icra edilmişdir. Ötən ilin də yekunlarına görə, Azərbaycan dünyada ən sürətlə inkişaf edən ölkələr sırasında olmuşdur. Keçən il Azərbaycanda ümumi daxili məhsul 9,3 faiz, sənaye istehsalı 8,6 faiz, kənd təsərrüfatı 3,5 faiz artmış, inflyasiyanın səviyyəsi 1,5 faiz olmuşdur. Artıq Azərbaycan xaricdən sərmayə alan ölkədən sərmayə yatıran ölkəyə çevrilmişdir. Son bir ildə ölkəmizə 9,2 milyard dollar sərmayə qoyulmuşdur ki, bunun da 7,3 milyardı daxili sərmayələrdir. Hazırda Azərbaycanın valyuta ehtiyatları 20,4 milyard dollara bərabərdir. Bu uğurlar dünya informasiya məkanında inkişafın Azərbaycan modeli kimi qiymətləndirilir, ölkəmizin təcrübəsinin öyrənilməsindən yazılır. Bu baxımdan tanınmış macar iqtisadçısı, İqtisadi Modelləşdirmə və Proqnozlaşdırma Mərkəzinin aparıcı elmi işçisi Jolt Şomloinin fikirləri xüsusi maraq doğurur. Doktor Şomloi fevralın 25-də AzərTAc-ın müxbiri ilə söhbətində demişdir: "Dünya maliyyə-iqtisadi böhranından ciddi zərər çəkmiş Macarıstan üçün Azərbaycanın təcrübəsini öyrənmək çox maraqlıdır. Azərbaycan son il yarımda sənaye cəhətdən inkişaf etmiş ölkələrin demək olar ki, hamısını sarsıtmış çətinliklərdən bacarıqla yan keçmiş və həmin böhrandan daha da bərkimiş halda çıxmışdır. Bu sınaqdan uğurla çıxmış ölkələr azdır və onlardan biri də Azərbaycandır. Bu baxımdan Azərbaycanın təcrübəsini, ölkənizdə aparılan islahatları öyrənmək, uğurlarınızın sirrini aydınlaşdırmaq bizim üçün çox maraqlıdır. Azərbaycanın büdcə siyasətini öyrənmək bizim üçün xüsusilə maraqlıdır. Fikrimcə, bu siyasət çox diqqətlə düşünülmüş və risklərdən qorunmuşdur".

Əcnəbi jurnalistlər ölkəmizdən yazarkən dövlətimizin başçısının şəxsiyyətindən, dövlətçiliyimizin inkişafındakı rolundan da bəhs edirlər. ABŞ-da çıxan "Fortune" qəzeti yazır ki, Prezident İlham Əliyev ölkənin inkişafında, əhalinin təhsil səviyyəsinin yüksəldilməsində, ölkəyə Qərb həyat tərzinin gətirilməsində maraqlıdır. Bu baxımdan Azərbaycanın indiki cavan Prezidenti İlham Əliyevi alqışlamaq olar. İlham Əliyev MDB ölkələrinin liderlərindən üstünlüyünü sübut etmişdir.

Fransanın "La Tribune" qəzetindəki yazıda isə deyilir: "Öz ölkəsini Avropaya tamamilə yaxınlaşdırmaq səylərinə görə İlham Əliyevi alqışlamaq lazımdır. İlham Əliyevin Avropa İttifaqı ilə əməkdaşlıq istiqamətində göstərdiyi səylər öz bəhrəsini vermişdir. Qafqazşünas politoloqların bir çoxu hesab edir ki, Qafqazın və Mərkəzi Asiyanın digər ölkələrinə nisbətən Azərbaycan Aİ-yə daha yaxındır".

Əcnəbi jurnalistlər onu da vurğulayırlar ki, İlham Əliyev ikinci prezidentlik müddətinə seçilməkdə xalqın etimadını qazanmaqla tam mənada tarixi şəxsiyyətə çevrilir, özü də təkcə Qafqaz miqyasında yox. İlham Əliyev hakimiyyətə əsasən aqrar ölkə olan, resursların və potensialların meqapolis və regionlar arasında qeyri-mütənasib bölündüyü, lakin zəngin xammal potensialına malik Azərbaycanı fundamental şəkildə modernləşdirmək ideyaları ilə gəlmişdir.

Yeni informasiya məkanında Azərbaycanın "vətəndaşlıq qazanmasının" əsas səbəblərindən biri iqtisadiyyatının ölçülərinə görə Qafqazda birinci yeri tutmasıdır. İqtisadiyyatın biliyə əsaslandığı şəraitdə informasiya-kommunikasiya texnologiyalarının inkişafı intellektual və elmi potensialın mühüm göstəricilərindən biridir. Eyni zamanda indiki qloballaşan dünyada dövlətlərin rəqabətə davamlılığını, ilk növbədə, informasiya-kommunikasiya texnologiyalarının səmərəli tətbiqi formalaşdırır. Məhz bunu nəzərə alaraq, ümummilli lider Heydər Əliyev 2003-cü ildə "Azərbaycan Respublikasının inkişafı naminə informasiya və kommunikasiya texnologiyaları üzrə Milli Strategiya"nı təsdiq etmişdi. Prezident İlham Əliyev isə "2008-2012-ci illərdə Azərbaycan Respublikasında təhsil sisteminin informatikalaşdırılması üzrə Dövlət Proqramı"nı təsdiqləmişdir. İnformasiya texnologiyalarının inkişaf səviyyəsinə görə Azərbaycan MDB ölkələri arasında liderdir. Dünya İqtisadi Forumu tərəfindən 2007-2008-ci illər üçün hazırlanmış "İnformasiya texnologiyalarının qlobal inkişafı haqqında hesabat"da Azərbaycan dünyanın ən qabaqcıl ölkələri sırasında yer tutur.

Bu ilin yanvarında ABŞ-ın nüfuzlu "Haffinqton Post" internet qəzeti tanınmış amerikalı politoloq, Kaliforniyanın "Tool Shed Group LLC" analitik mərkəzinin eksperti Ceyson Katzın "İncəliklə oynanılan oyun" sərlövhəli məqaləsini dərc etmişdir. Məqalədə bildirilir ki, Şərq-Qərb enerji dəhlizinin fəaliyyətinin təmin edilməsində mühüm rol oynayan Azərbaycanın təşəbbüsü və iştirakı ilə reallaşdırılan enerji layihələri, xüsusilə də Bakı-Tbilisi-Ceyhan neft kəməri Qərb ölkələri üçün çox böyük əhəmiyyət daşıyır. Müəllif qeyd edir ki, dünyəvilik və dözümlülük baxımından nümunə olan, öz siyasətində Qərbə inteqrasiya yolunu tutmuş Azərbaycan istər iqtisadi, istərsə də diplomatik məsələlərdə ABŞ-la müttəfiqlikdən irəli gələn bütün vəzifələri yerinə yetirir. Lakin təəssüf ki, rəsmi Vaşinqton bunu kifayət qədər qiymətləndirmir və Azərbaycana qarşı çox vaxt laqeydlik göstərir. Bu isə Azərbaycanda ABŞ-a qarşı münasibətin soyuqlaşmasına gətirib çıxara bilər. Müəllif vurğulayır ki, Azərbaycan Türkiyə-Ermənistan münasibətlərinin normallaşmasına və iki ölkə arasında bu məqsədlə imzalanmış protokollara qarşı çıxmır. Əslində, Azərbaycan Dağlıq Qarabağ münaqişəsinin həlli istiqamətində Ermənistan ilə dialoq aparır. Azərbaycanı narahat edən əsas məsələ ondan ibarətdir ki, ABŞ siyasətçiləri və diplomatları "normallaşma" prosesinə xüsusi önəm verməklə, regionda real qeyri-sabitlik yaradan əsas məsələni arxa plana keçirirlər. Azərbaycan, sadəcə, Türkiyənin Ermənistanla münasibətlərinin normallaşması prosesinin Dağlıq Qarabağ münaqişəsinin həllində əldə ediləcək irəliləyişdən asılı olacağına əmin olmaq istəyir. Reallıq isə bundan ibarətdir ki, Dağlıq Qarabağ Ermənistan tərəfindən işğal edilmiş Azərbaycan ərazisidir və bu işğal nəticəsində bir milyondan artıq azərbaycanlı doğma yurd-yuvasından didərgin salınmışdır. BMT, Avropa İttifaqı kimi nüfuzlu təşkilatlar, eləcə də ABŞ Dağlıq Qarabağı Azərbaycanın tərkib hissəsi kimi tanıyır. Buna görə də münaqişənin həllinə biganəlik göstərilməməli, əksinə, onun həlli istiqamətində səylər daha da artırılmalıdır.

Məqalədə deyilir ki, Azərbaycan dəfələrlə dünya ictimaiyyətinin diqqətini regiondakı problemlərə biganə münasibət bəslənilməsinin təhlükəli nəticələr doğura biləcəyinə cəlb etməyə çalışsa da, onun bu çağırışları gözlənilən nəticəni vermir. Dağlıq Qarabağ münaqişəsinin həllinin Azərbaycan rəhbərliyi üçün nə dərəcədə əhəmiyyət daşıması da, təəssüflər olsun ki, kifayət qədər qiymətləndirilmir. Müəllif bildirir ki, Azərbaycan haqqında məlumat əldə etmək istəyən hər bir kəs bu ölkənin öz milli maraqlarından çıxış edən olduqca praqmatik bir ölkə olduğunu öyrənər. ABŞ siyasətçiləri Qafqaz və Avrasiya ilə bağlı xarici siyasətdə strateji yanaşma tətbiq etməli və yaxın deyil, ən azı 20 il sonrakı tarixi nəzərə almalıdırlar. ABŞ-ın regiondakı problemlərin həllinə töhfəsi, şübhəsiz ki, müsbət nəticələr verə bilər. Müəllif xüsusi olaraq vurğulayır ki, Azərbaycan kimi bir dostun itirilməsi ABŞ-ın xarici siyasəti və maraqları üçün böyük zərbə ola bilər.

Azərbaycanın yeni informasiya məkanında öz mövqeyini möhkəmləndirməsində, ölkəmizin üzləşdiyi problemlər barədə həqiqətlərin dünya ictimaiyyətinə çatdırılmasında Bakıda keçirilən beynəlxalq tədbirlərin, bu tədbirlərdə xarici kütləvi informasiya vasitələri nümayəndələrinin iştirakı böyük rol oynayır. Bu mənada Azərbaycanın birinci xanımı, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın və prezidenti olduğu Heydər Əliyev Fondunun təşəbbüsü ilə ölkəmizdə və onun hüdudlarından kənarda keçirilən beynəlxalq tədbirlərdə dünyanın nüfuzlu informasiya qurumlarının nümayəndələrinin iştirakını xüsusi qeyd etmək lazımdır. Fondun təşəbbüsü, YUNESKO-nun və İSESKO-nun dəstəyi ilə keçirilən "Mədəniyyətlərarası dialoqda qadınların rolunun gücləndirilməsi" mövzusunda beynəlxalq forum, "Muğam aləmi" beynəlxalq festivalı və elmi simpozium, Qəbələdə beynəlxalq musiqi festivalı, Brüsseldə Avropa Parlamentinin mənzil-qərargahında "Azərbaycan mədəniyyəti günləri" və s. tədbirlər Azərbaycanın milli informasiya məkanında möhkəmlənməsinə layiqli töhfələr vermişdir. Bu baxımdan yanvarın 22-23-də Bakıda keçirilmiş Humanitar Əməkdaşlıq üzrə Birinci Azərbaycan-Rusiya forumunun əhəmiyyətini xüsusi vurğulamaq istərdim. Təkcə onu demək kifayətdir ki, bu tədbirdə Rusiya Federasiyasının "Kommersant", "İzvestiya", "Komsomolskaya pravda", "Selskaya jizn", "Rossiyskaya qazeta" kimi geniş oxucu auditoriyası olan populyar qəzetlərinin rəhbərləri, aparıcı teleradiokanalların təmsilçiləri iştirak edirdilər. Bu forum Azərbaycan həqiqətlərinin yayılması, qarşılıqlı əməkdaşlığın genişləndirilməsi üçün geniş meydan açmışdır. Qonaqlar Azərbaycan Dövlət Teleqraf Agentliyində - AzərTAc-da keçirilən mətbuat bölməsinin işində də iştirak etmişlər. Rusiya KİV-lərinin görkəmli nümayəndələri agentliyin işi ilə tanış olmuş, əməkdaşlarla söhbət etmiş, müasir jurnalistikanın bir sıra mühüm problemləri barədə fikir mübadiləsi aparmış, forum barədə fikirlərini bölüşmüşlər. Onlar Azərbaycan ilə Rusiya arasında münasibətlərin daha da inkişaf etdirilməsi və dərinləşdirilməsi üçün bu tədbirin çox böyük əhəmiyyətini vurğulamışlar.

Ölkəmizin yeni informasiya məkanında möhkəmlənməsində 2010-cu ilin martında özünün 90 illiyini qeyd edən Azərbaycan Dövlət Teleqraf Agentliyinin də xidmətlərini xatırlamamaq olmaz. Yubiley mərasimində dünyanın nüfuzlu milli informasiya agentliklərinin 40-a yaxın nümayəndəsinin iştirakı Azərbaycanın beynəlxalq informasiya məkanına inteqrasiyasını təsdiq edən faktlardan biridir. Prezident İlham Əliyev yubiley mərasimində iştirak edən nümayəndə heyətlərinin başçılarını qəbul edərkən demişdir ki, ölkələr və xalqlar arasında qarşılıqlı anlaşmaya daha geniş imkanlar açan infromasiya agentliklərinin, kütləvi informasiya vasitələrinin fəaliyyətindən çox şey asılıdır. Həqiqi məlumatın vaxtında verilməsi operativ qərarların qəbulu, proseslərin düzgün şərh edilməsi, ölkələr arasında ikitərəfli və çoxtərəfli əlaqələrin qurulmasında mühüm rol oynayır. Memarı və qurucusu Heydər Əliyev olan müstəqil Azərbaycanın inkişaf strategiyasının Prezident İlham Əliyev tərəfindən müasir dövrün tələblərinə uyğun olaraq yaradıcılıqla davam etdirilməsi nəticəsində respublikamızın dünyanın ən sürətlə inkişaf edən dövlətinə çevrilməsi, mövqeyinin möhkəmlənməsi AzərTAc-ın beynəlxalq əlaqələrinin genişlənməsinə, onun dünya informasiya məkanına inteqrasiyasına müsbət təsir göstərən amillərdən biridir. İndi dünyanın tanınmış xəbər agentlikləri AzərTAc ilə əməkdaşlığa böyük maraq göstərir. Hazırda AzərTAc-ın 90-dan artıq ölkənin informasiya agentlikləri ilə çox səmərəli əlaqələri vardır. Bundan əlavə, AzərTAc Müstəqil Dövlətlər Birliyinin üzvü olan ölkələrin Milli İnformasiya Agentlikləri Assosiasiyasının (ANİA), Türkdilli Xəbər Agentlikləri Birliyinin (TKA), Qara Dəniz İqtisadi Əməkdaşlıq Təşkilatının üzvü olan ölkələrin Milli İnformasiya Agentlikləri Assosiasiyasının (BSANNA) təsisçilərindən biridir. 2004-cü ilin sentyabrında AzərTAc Asiya və Sakit Okean Ölkələri İnformasiya Agentlikləri Təşkilatının (OANA) üzvü olmuşdur. Bunun sayəsində AzərTAc-ın informasiyaları OANA-nın xüsusi saytında yerləşdirilir və onlardan təşkilatın üzvü olan digər 32 ölkənin 39 informasiya agentliyi istifadə edir. 2007-ci il dekabrın 12-də OANA-nın İndoneziyanın paytaxtı Cakartada keçirilən iclasında AzərTAc bu qurumun rəhbər orqanı olan İcraiyyə Komitəsinin büro üzvü seçilmişdir. AzərTAc-ın Avropa Xəbər Agentlikləri Alyansına (EANA) üzv qəbul edilməsi agentliyimizin həyatında ən mühüm hadisələrdən biri kimi qiymətləndirilməlidir. Beləliklə, agentliyimiz postsovet məkanında İTAR-TASS və Ukrinformdan sonra EANA-ya qəbul edilmiş üçüncü informasiya agentliyi və həmin təşkilatın sayca 31-ci üzvü olmuşdur. 2008-ci ildən AzərTAc Asiya Xəbər Agentlikləri Konsorsiumunun ("AsiaPulse") da üzvüdür.

Artıq regional və beynəlxalq əhəmiyyətli tədbirlərə ev sahibliyi edən AzərTAc-ın təşkilatçılığı ilə 2008-ci il aprelin 30-u - mayın 3-də Bakıda Türkdilli Xəbər Agentlikləri Birliyi (TKA) Baş Məclisinin VII iclası keçirilmişdir. Hazırda TKA-da AzərTAc sədrlik edir. 2008-ci il sentyabrın 1-4-də isə AzərTAc-ın ev sahibliyi ilə OANA İcraiyyə Komitəsinin "Qloballaşan dünyada informasiya hamı üçün" mövzusunda 30-cu iclası keçirilmişdir. İlk dəfə idi ki, dünyanın 20-dən çox ölkəsindən ən nüfuzlu xəbər agentliklərinin rəhbərləri və yüksək vəzifəli təmsilçiləri respublikamıza gəlmişdilər. Azərbaycanın ictimai həyatında mühüm hadisə olan bu toplantının əhəmiyyəti həm də onda idi ki, OANA və EANA-nın tarixində ilk dəfə olaraq bu qurumların rəhbərləri tədbirdə birlikdə iştirak edirdilər. Azərbaycan Prezidenti İlham Əliyevin iclas iştirakçılarını qəbul etməsi qonaqlarda çox böyük təəssürat doğurmuşdur.

Müstəqil Azərbaycanın rəsmi informasiya agentliyinin dünya informasiya məkanına çıxması, Azərbaycan reallıqlarının yayılma coğrafiyasının genişləndirilməsi ulu öndər Heydər Əliyevin ən böyük arzularından biri idi. İndi tam məsuliyyətlə deyə bilərik ki, ümummilli liderin bu arzusu da reallığa çevrilmişdir. Azərbaycan qloballaşan dünyanın yeni informasiya məkanında öz yerini tutmuşdur və bunu getdikcə möhkəmləndirir.

Aslan ASLANOV,

Azərbaycan Dövlət Teleqraf

Agentliyinin baş direktoru

Azərbaycan.- 2010.- 5 may.- S. 3.