QIZ QALASI

Qız qalası!

İşığın kölgəsini geyib qaralmısan,

Kürəyini küləyə söykəyib qalmısan.

Günəş ətri gəlir səndən,

Sən bütün əsrlərin,

bəlaların, sirlərin

şahidisən, sönməz ocaqsan.

Səni yaradan xalq kimi

Möhkəm dayanmısan, dayanacaqsan.

Sən bu xalqın

daşa dönmüş qəhrəmanlıq anlarısan.

Sən xalqın külü daşa dönmüş qəhrəmanısan.

Xəzər sənə aşiqdi,

Baxışın dalğaların yolunda işıqdı.

Sinənə çırpılıb

bütün düşmənlərin parçalanıb,

Sənin atəşin yerin nüvəsində qalıb.

Üfuqdə xoşbəxtliyin nurunu görüb

Ruhunda gənclik oyanar.

Sən gəncləşirsən,

Məşəllərində xoşbəxtlik işığı yanır.

Fikrət Qoca

Azərbaycan.- 2010.- 5 may.- S. 11.