YUNESKO-da Bakıda keçiriləcək forumla bağlı işçi qrupun yığıncağı olmuşdur

 

Parisdə YUNESKO-nun mənzil-iqamətgahında 2011-ci ildə Bakıda keçiriləcək "Ümumdünya mədəniyyətlərarası dialoq forumu"na həsr olunmuş işçi qrupunun toplantısı olmuşdur. YUNESKO, Avropa Şurası və Sivilizasiyalararası Alyansın nümayəndələrinin iştirak etdiyi yığıncaqda ölkəmizi mədəniyyət və turizm nazirinin müavini Sevda Məmmədəliyeva, Fransadakı səfirliyimizin, YUNESKO və Avropa Şurası yanındakı daimi nümayəndəliklərimizin əməkdaşları təmsil etmişlər.

Toplantıda foruma hazırlıq məsələləri ətrafında müzakirələr zamanı YUNESKO, Avropa Şurası və Sivilizasiyalararası Alyansın nümayəndələri Azərbaycanın xüsusi əhəmiyyət kəsb edən belə bir tədbiri keçirməsini dəstəklədiklərini bəyan etmiş, forumla bağlı hansı movzulardan bəhs olunacağı ilə əlaqədar öz təkliflərini bildirmişlər.

Tədbirdə Azərbaycan tərəfindən mədəniyyətlərarası dialoqa dair xüsusi medalın təsis olunması və forum çərçivəsində Bakının Ümumdünya Dialoq Paytaxtı elan edilməsi ilə bağlı xüsusi proqramın hazırlanması tövsiyə olunmuşdur.

Nazir müavini Sevda Məmmədəliyeva Azərbaycan hökumətinin forumun yüksək səviyyədə keçirilməsi üçün bütün imkanlardan istifadə edəcəyini, bu istiqamətdə konkret addımlar atıldığını diqqətə çatdırmış, Azərbaycanın Xarici İşlər Nazirliyi vasitəsilə Bakıdakı xarici ölkələrin səfirlikləri və respublikamızın xaricdəki diplomatik missiyalarının artıq forum barədə ətraflı məlumatlandırıldığını, tədbirdə iştirak edəcək nümayəndələrin müəyyənləşdirilməsi istiqamətində hazırlıq tədbirlərinin görüldüyünü qeyd etmişdir.

Toplantıda işçi qrupunun növbəti yığıncağının 2010-cu ilin sentyabrında Parisdə keçirilməsi, forumun sənədlərini hazırlayan ekspertlərin iclasa dəvət olunması, həmin vaxt bütün lazımi materialların təqdim edilməsi qərara alınmışdır.

 

 

Əsgər ƏLİYEV,

AzərTAc-ın xüsusi müxbiri

Paris

 

Azərbaycan.- 2010.-  6 may.- S.  5.