Neftçilər faşizm üzərində Qələbənin 65 illiyini qeyd edirlər

Faşizm üzərində Qələbənin 65 illiyi münasibətilə ARDNŞ-nin idarə və müəssisələrində rəngarəng tədbirlərin keçirilməsi planlaşdırılıb.

Şirkətin Sosial İnkişaf İdarəsinin nəzdində fəaliyyət göstərən mədəniyyət saraylarında və məktəbəqədər tərbiyə müəssisələrində bu münasibətlə bir sıra mədəni-kütləvi tədbirlər keçiriləcək. "Mərdəkan" Mədəniyyət sarayında "Ümid sənədir ancaq, Azərbaycan əsgəri", Qurban Abbasov adına Mədəniyyət sarayında "Qələbə, qələbə, ancaq qələbə" adlı bədii-musiqili kompozisiyalar hazırlanıb. Əli Əmirov adına Mədəniyyət sarayının bədii kollektivi Bakıda yerləşən "N" saylı hərbi hissənin şəxsi heyəti qarşısında "Qələbənin əsgərləri" adlı konsert proqramı ilə çıxış edəcək. Vaqif Mustafazadə adına Mədəniyyət sarayında "O günlərin xatirəsi əbədidir", Səttar Bəhlulzadə adına Mədəniyyət sarayında "Biz sizdən öyrəndik qəhrəmanlığı" adlı tədbirlərdə müharibə veteranlarının iştirakı nəzərdə tutulur.

II Dünya müharibəsinin veteranları keçdikləri şərəfli döyüş yolu ilə bağlı xatirələrini tədbir iştirakçıları ilə bölüşəcəklər. Adil İsgəndərov adına Mədəniyyət sarayında bədii özfəaliyyət kollektivlərinin iştirakı ilə faşizm üzərində Qələbənin 65 illiyinə həsr olunan geniş konsert proqramı təqdim ediləcək. Sosial İnkişaf İdarəsinin uşaq bağçalarında da Qələbənin 65 illiyi münasibətilə uşaqların çəkdiyi rəsmlərdən, hazırladıqları əl işlərindən ibarət sərgilərin, digər tədbirlərin keçirilməsi nəzərdə tutulur.

Azərbaycan.- 2010.- 6 may.- S. 6.