Almaniyalı rəssam Peter Föllerin sərgisində Azərbaycana həsr olunmuş əsərləri də nümayiş etdirilmişdir

Berlində tanınmış almaniyalı rəssam Peter Föllerin yaradıcılıq sərgisi keçirilmişdir. Azərbaycana dost münasibətilə seçilən P.Föller öz yaradıcılığında ölkəmizin ağrılı problemlərinə də müraciət etmişdir.

Sərgidə rəssamın Azərbaycana həsr etdiyi "Abşeron" və "Odlar yurdu" əsərləri də göstərilmişdir.

Azərbaycanın Almaniyadakı səfiri Pərviz Şahbazov rəssamın yaradıcılığı barədə danışaraq, onun xalqımızın dostu olduğunu qeyd etmişdir. Səfir P.Föllerin bəşəriyyət tarixinin qanlı səhifələrindən biri - Xocalı soyqırımına həsr etdiyi əsəri barədə danışarkən rəssamın Azərbaycan həqiqətlərini yaxşı anladığını, haqqın və ədalətin tərəfdarı olduğunu bildirmişdir. P.Şahbazov daha sonra Azərbaycan-Almaniya əlaqələrinin dinamik inkişafından, ikitərəfli münasibətlərdə mədəni əlaqələrin müstəsna yer tutmasından, Azərbaycandakı alman mədəni irsi və ona göstərilən dövlət qayğısından bəhs etmişdir.

Sonra səfir P.Föllerin iyunda Azərbaycana səfər edəcəyi və Bakıda sərgisinin təşkil olunacağı barədə tədbir iştirakçılarına məlumat verilmişdir. Bakıdakı "Qız qalası" qalereyasında təşkil ediləcək sərgidə nümayiş etdiriləcək şəkillər arasında P.Föllerin Azərbaycana həsr etdiyi iki yeni şəkil - "Abşeron" və "Odlar yurdu" da yer alacaqdır.

Tədbirdə çıxış edən P.Föller Azərbaycanın və onun mədəniyyətinin onda böyük maraq oyatdığını qeyd edərək, Bakıya planlaşdırdığı səfərinin təkcə sərgi üçün deyil, eləcə də Azərbaycan mədəniyyətini daha da yaxından tanımaq məqsədi güddüyünü bildirmişdir. Almaniyalı rəssam səfərdən sonra Azərbaycan mövzusunun onun rəssamlıq fəaliyyətində yenidən yer alacağına inandığını bildirmişdir.

Tədbirdə Almaniya ictimaiyyətinin müxtəlif təbəqələrinin nümayəndələri iştirak etmişlər.

Alman rəssamının sərgidəki bir sıra əsərləri, o cümlədən Azərbaycan mövzusunda çəkdiyi şəkillər sənətsevərlər tərəfindən satın alınmışdır.

Vüqar SEYİDOV,

AzərTAc-ın xüsusi müxbiri

Berlin

Azərbaycan.- 2010.- 12 may.- S. 11.