Bakıda Azərbaycan-Serbiya biznes-forumu keçirilmişdir

Mayın 13-də Bakı Biznes Mərkəzində İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə ilk Azərbaycan-Serbiya biznes-forumu keçirilmişdir.

Tədbirdə Azərbaycan və Serbiya tərəfdən hökumət rəsmiləri ilə yanaşı, kənd təsərrüfatı, qida sənayesi, enerji, əczaçılıq, neft və kimya, tikinti, nəqliyyat və digər sahələrdə fəaliyyət göstərən 40-a yaxın iş adamı iştirak etmişdir.

Biznes-forumda iqtisadi inkişaf nazirinin müavini Niyazi Səfərov Azərbaycan Prezidenti İlham Əliyevin rəhbərliyi ilə ölkəmizdə uğurla həyata keçirilən layihələr, sahibkarlığın inkişafı istiqamətində görülən tədbirlər, son illər qazanılmış nailiyyətlər barədə ətraflı danışmışdır. Bildirmişdir ki, dünyanı bürümüş iqtisadi və maliyyə böhranına baxmayaraq, ötən ilin yekunlarına görə, ölkədə ümumi daxili məhsul (ÜDM) 9,3 faiz, sənaye istehsalı 12,8 faiz artmışdır. İqtisadi inkişaf templəri cari ilin ilk rübündə də saxlanılmış, bu dövrdə ÜDM 5,4 faiz, pərakəndə əmtəə dövriyyəsi 8,3 faiz, əhalinin nominal gəlirləri 6,5 faiz yüksəlmişdir.

1995-ci ildən indiyədək Azərbaycan iqtisadiyyatına 70 milyard ABŞ dollarından artıq investisiya qoyulduğunu, bu sərmayələrin yarısının xarici şirkətlərin payına düşdüyünü qeyd edən N.Səfərov Azərbaycanın investisiyalar üçün çox əlverişli ölkə olduğunu söyləmişdir. Həmçinin Azərbaycanın mühüm beynəlxalq və regional layihələrin həyata keçirilməsində qabaqcıl mövqeyi nəzərə çarpdırılmış, bu sırada Bakı-Tbilisi-Ceyhan əsas ixrac neft boru, Bakı-Tbilisi-Ərzurum qaz kəmərlərinin, Bakı-Tbilisi-Qars dəmiryolu xəttinin mühüm rolu vurğulanmışdır. Azərbaycanın regionda lider mövqeyi faktlarla qonaqların diqqətinə çatdırılmışdır.

Biznes-forumunun məqsədindən danışan nazir müavini bildirmişdir ki, ölkələrimiz arasında ticarət-iqtisadi əməkdaşlıq arzuolunan səviyyədə deyildir. Ötən il Azərbaycan ilə Serbiya arasında ticarət dövriyyəsi 1 milyon dollardan bir qədər çox olmuşdur. Lakin əlaqələrin daha da genişləndirilməsi üçün böyük imkanlar vardır və onlardan mütləq istifadə etmək lazımdır.

Sonda N.Səfərov Serbiya şirkətlərinin Azərbaycanda fəaliyyətlərini qurmaq üçün münbit şəraitin olduğunu, işgüzar görüşlərin əhəmiyyətini vurğulamışdır.

Serbiyanın İqtisadiyyat və Regional İnkişaf Nazirliyinin nümayəndəsi, dövlət katibi Ciric Neboyja ölkələrimiz arasında siyasi əlaqələrin yüksək səviyyədə olduğunu bildirmiş, hazırda isə iqtisadi əməkdaşlığın artırılmasının vacibliyini nəzərə çarpdırmışdır. İlk biznes forumunun daha çox tanışlıq xarakteri daşıdığını qeyd edən qonaq iş adamları arasında ikinci görüşün cari ilin sentyabr-oktyabrında Belqradda keçirilməsinin nəzərdə tutulduğu barədə məlumat vermiş və iş adamlarını investisiya layihələrində birgə iştiraka dəvət etmişdir.

AZPROMO-nun prezidenti Adil Məmmədov Azərbaycanın biznes imkanları və investisiya mühiti, Azərbaycan İnvestisiya Şirkətinin icraçı direktoru Əfqan İsayev qurumun fəaliyyəti və həyata keçirdiyi layihələr, Serbiyanın Biznes Assosiasiyasının prezidenti Branislav Qrujiç ölkəsinin iqtisadi imkanları barədə təqdimatlar etmişlər.

Forum çərçivəsində keçirilmiş ikitərəfli görüşlərdə Azərbaycan və Serbiya iş əlaqələrinin genişləndirilməsi imkanları müzakirə olunmuşdur.

AzərTAc

Azərbaycan.- 2010.- 14 may.- S. 3.