Azərbaycan ordusunun yüksək döyüş hazırlığı işğalçı ölkəni təşvişə salır

Son bir neçə ildə iqtisadi inkişaf göstəricilərinə görə dünyada lider mövqeyə çıxan Azərbaycan bir çox sahələrdə əldə etdiyi uğurlarla seçilən dövlətlər cərgəsində mövqelərini daha da möhkəmləndirməkdədir. Ölkəmiz ordu quruculuğu prosesində də kifayət qədər mühüm göstəricilərə nail olub. Bu sahədə görülən işlərin məntiqi nəticəsidir ki, indi Azərbaycan təkcə Cənubi Qafqazda yox, postsovet məkanında da ən güclü, hazırlıqlı, qarşıya qoyulan tapşırığı müvəffəqiyyətlə yerinə yetirməyə qadir olan orduya malik ölkələrdən biridir. Araşdırmalar da təsdiq edir ki, Silahlı Qüvvələrimizin döyüş hazırlığı, maddi-texniki təminatı çox yüksəkdir.

Silahlı Qüvvələrimizin texniki təchizatı durmadan yüksəlir

Regionun ən güclü ordusuna malik ölkə kimi də xarakterizə olunan Azərbaycan Silahlı Qüvvələrini gündən-günə daha da modernləşdirməkdə, onu istər şəxsi heyət, istərsə də hərbi texnika və digər maddi resurslar baxımından yüksək səviyyədə təchiz etməkdədir. Mənəvi-psixoloji hazırlıq cəhətdən də yüksək səviyyədə olan Azərbaycan ordusu işğal edilmiş əraziləri qısa zaman ərzində tam azad etmək gücündədir və bu, beynəlxalq dairələrdə, o cümlədən işğalçı Ermənistanın özündə də açıq etiraf olunmaqdadır. Təsadüfi deyil ki, indi işğalçı dövlətdə Azərbaycan və Ermənistan orduları arasında fərqin böyük sürətlə ölkəmizin lehinə dəyişməsinə dair etiraflar çoxalmaqda və Dağlıq Qarabağ münaqişəsinin həllinin hərbi müstəviyə keçəcəyi təqdirdə, bunun Ermənistan üçün əsl fəlakət olacağını qəbul edənlərin sayı sürətlə artmaqdadır.

Lakin Ermənistan-Azərbaycan, Dağlıq Qarabağ münaqişəsinin hələ sülh yolu ilə həllinə ümidlər tükənmədiyindən Azərbaycan məsələnin hərbi müstəvidə çözümünə hələlik lüzum görmür. Bununla belə Ermənistana və dünya ictimaiyyətinə yaxşı məlumdur ki, zəbt olunmuş ərazilərinin azad edilməsi üçün Azərbaycan beynəlxalq hüquq çərçivəsində hər an hərbi əməliyyatlara başlamaq və ərazilərini az vaxtda düşməndən tam təmizləmək iqtidarındadır.

Mövcud reallığa uyğun olaraq Azərbaycan həm işğala məruz qaldığından, həm də müharibə şəraitində yaşadığından bu gün də ordusunu gücləndirməkdə, onu müasir hərbi texnika ilə təchiz etməkdədir. Aprelin 23-də Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev Müdafiə Nazirliyində ordu quruculuğu məsələlərinə həsr olunmuş müşavirədə bununla bağlı bildirmişdir: "Ordu quruculuğu məsələləri həmişə diqqət mərkəzindədir. Bu, bizim üçün əsas məsələdir. Çünki uzun illərdir ki, Azərbaycan torpaqları işğal altındadır. İşğal bu gün də davam edir. Biz elə etməliyik ki, hərbi imkanlarımızı maksimum dərəcədə gücləndirək. Bunu etmək üçün çox böyük işlər, praktiki tədbirlər görülür. Son illərdə Azərbaycanda ordu quruculuğu məsələləri uğurla həll olunur. Biz gündəlik həyatda elə etməliyik ki, hərbi potensialımızı daha da gücləndirək və Azərbaycan Ordusu ən yüksək standartlara cavab versin".

Ölkəmizin iqtisadi qüdrəti və malik olduğu potensial isə ordunun bundan sonra da insan resursundan tutmuş bütün maddi təminatına qədər yüksək olacağını deməyə əsas verir. Bir mühüm cəhəti də xüsusi qeyd etmək lazımdır ki, ölkəmizdə ordunun maddi-texniki təchizatı Azərbaycanın iqtisadi inkişaf dinamikasına uyğun olaraq daim yüksələn xətt üzrə inkişaf edib. Lakin ordu quruculuğu prosesində görülən işlər təkcə bununla məhdudlaşmayaraq daha geniş xarakter daşıyıb. Belə ki, ordunun NATO standartlarına keçidi, döyüş qabiliyyətinin qabaqcıl təcrübəyə müvafiq olaraq yüksəldilməsi sahəsində də mühüm işlər görülüb. Kursant və zabit heyətinin ölkəmizlə yanaşı, dünyanın ən qabaqcıl müvafiq təhsil müəssisələrində də hərb sənətinin sirlərinə dərindən yiyələnməsi ordumuzun peşəkarlıq səviyyəsinin yüksəlməsinə vacib töhfələr verməkdədir. Yerli istehsal və xaricdən alınan hərbi texnika hesabına isə bu gün Azərbaycan ordusunun arsenalında müasir standartlara cavab verən silahların, döyüş vasitələrinin sayı durmadan artır və bu proses indi də sürətlə davam etdirilir. Prezident İlham Əliyev bununla bağlı bildirmişdir: "Bizim hərbi xərclərimiz son 5-6 il ərzində 10 dəfədən çox artıb. Orduya ayrılan vəsait 10 dəfədən çox artıb. Hərbi hazırlıq yüksək səviyyədədir. Orduda və bütün Silahlı Qüvvələrdə ruh yüksəkliyi vardır. Son illər ərzində çoxlu texnika, silah-sursat alınmışdır. Bu proses davam edir və bu, bizim təbii haqqımızdır".

Bütün bunların fonunda Azərbaycan əsgərinin yüksək mənəvi hazırlığı, döyüş ruhu, zəbt olunmuş ərazilərdən düşməni hər an qovmaq üçün qisas hissi ilə alışıb yanması işğalçı Ermənistanı qorxuya salıb. Artıq ermənilər yaxşı bilirlər ki, bu gün Ermənistan ilə Azərbaycan arasında həm hərbi, həm iqtisadi, həm bütün başqa sahələrdə fərq çox böyükdür. Azərbaycanın Silahlı Qüvvələri durmadan inkişaf etdiyi halda Ermənistanda bunun tam əksi müşahidə olunur. Məsələn, Ermənistanda demoqrafik vəziyyətin pisləşməsi ordunun şəxsi heyətlə təminatı baxımından artıq ciddi problemə çevrilib. Vəziyyətin getdikcə acınacaqlı xarakter aldığını etiraf edən Ermənistan silahlı qüvvələrinin baş qərargah rəisi, general-polkovnik Yuri Xaçaturov bildirib ki, təcili olaraq orduya çağırış üçün müəyyən olunan yaş həddi 27-dən 32-35 yaşa qaldırılmalıdır. Yaş çağırış həddi qaldırılmalı, hərbi xidmətdən yayınanların sayı azaldılmalıdır. İndiki vəziyyət isə bu il də daxil olmaqla, ən azı 2016-cı ilə qədər orduda çağırışçılarla bağlı ciddi problemlərin yaşanacağını göstərir. Çağırışçıların sayının azlığı ordunun şəxsi heyətlə təminatında böyük çətinliklər yaradacaq.

Azərbaycanda isə əksinə, ordunun şəxsi heyətlə komlektləşdirilməsində heç bir problem yoxdur. Ölkəmizdə demoqrafik durumun və əhalinin təbii artımının yüksək səviyyədə olması ümumiyyətlə, qarşıdakı illər ərzində də Azərbaycan ordusunun çağırışçı problemi yaşamayacağını göstərir. Bununla yanaşı, ordunun texniki təchizatı baxımından da bu gün Azərbaycanı Ermənistanla müqayisə etmək mümkün deyil. Təkcə bir faktı qeyd etmək kifayətdir ki, 2009-cu ildə Silahlı Qüvvələrimizin istifadəsinə 1 milyard ABŞ dollarından artıq dəyərdə silah və texnika verilmişdir. Bu isə Ermənistanın ümumi hərbi xərclərindən üç dəfə çoxdur. Ermənistan ordusu isə son illərdə hər hansı müasir hərbi texnika ilə təmin edilməyib. Əksinə, istifadədə olan köhnə texnikaların əksər hissələri onlara nəzarət edən zabit və gizir heyəti tərəfindən sökülərək satılıb. Araşdırmalar göstərir ki, Ermənistan silahlı qüvvələrinə tabe olan motoatıcı, əlahiddə rabitə, əlahiddə mühəndis-istehkam, əlahiddə radio-texniki alaylarında, artilleriya və təlim motoatıcı briqadalarında, artilleriya və əlahiddə özüyeriyən divizyonlarda, çoxsaylı hərbi hissələrdə xidmət rəisləri və hərbi hissə komandirləri tərəfindən ərzaq, əşya, yanacaq-sürtgü materialları, avtomobil və döyüş texnikalarının ehtiyat hissələrinin satılması halları indi də davam edir.

Azərbaycan ordusu isə bu gün ən müasir standartlara cavab verən texnika ilə təmin edilməkdədir. Məsələn, artıq məlumdur ki, ötən il ordumuz üçün pilotsuz uçuş aparatları, radio-kəşfiyyat və radio-elektron mübarizə, gecə-gündüz uzaqməsafəli müşahidə, o cümlədən qoşun və xüsusi təyinatlı bölmələrdə kəşfiyyatçıların fərdi gecəgörmə vasitələri, əlahiddə kəşfiyyat taburları üçün yeni texnika alınıb. Həmçinin, Silahlı Qüvvələrimizin artilleriya hissə və bölmələrinin peşəkar şəxsi heyəti müasir silah və texnika, avtomatlaşdırılmış idarəetmə sistemləri, o cümlədən müasir yaylım atəşli reaktiv sistemləri ilə komplektləşdirilib. Bu isə yaxın və uzaq məsafələrdə yerləşən düşmən hədəflərini böyük bir ərazidə məhv etməyə imkan verir. Bundan başqa, keçən il istismarda olan silahlar müasir tipli optik gündüz və gecəgörmə nişangahları, müşahidə cihazları ilə kompleksləşdirilib. Hərbi birləşmələrin zirehli texnikası üzərində modernləşdirmə işlərinin başa çatdırılması nəticəsində ordumuz maksimal uzaqlıqda yerləşən düşmən hədəflərini hava şəraitindən asılı olmayaraq, gecə və gündüz məhv etmək imkanı əldə edib. Ümumiyyətlə, artıq heç kimə sirr deyil ki, Silahlı Qüvvələrimiz Ermənistanın bütün ərazisində yerləşən hədəfləri məhv etməyə qadirdir.

Ölkə daxilində hərbi təyinatlı məhsulların istehsalı genişlənir

Hazırda Azərbaycan ordusunda bir sıra hərbi texnikanın mövcudluğu Ermənistanın isə belə texnikaya yaxın bir neçə ildə malik olmasının mümkünsüzlüyü işğalçı dövlətin özündə də açıq etiraf olunur. Məsələn, Azərbaycan ordusunun istifadəsində daha müasir tipli təyyarələr - Miq-29 qırıcıları vardır. Belə təyyarələri almaq üçün Ermənistanın iqtisadi imkanları yoxdur. Bundan başqa, Azərbaycanın müasir pilotsuz uçuş aparatı olduğu halda Ermənistanda belə cihazlar yalnız hərbi dərsliklərdə mövcuddur. 1989-cu ildə Sovet ordusunun istifadəsinə verilən və kifayət qədər güclü artilleriya silahı sayılan "Smerç" tipli raket qurğuları barəsində də eyni sözləri söyləmək mümkündür. Daha bir vacib cəhət odur ki, Azərbaycan həm də hərbi dəniz qüvvələrinə malikdir. Bu da ölkəmizin Silahlı Qüvvələrinin Ermənistan ordusundan üstünlüyünü bir daha artırır.

O da sevindirici haldır ki, bir çox xarici dövlətlərdən fərqli olaraq Azərbaycan Silahlı Qüvvələrin maddi-texniki təminatının xeyli hissəsini öz potensialı hesabına ödəməkdədir. Yaxın perspektivdə isə ölkənin müdafiə sənayesinin buraxdığı məhsulların çeşidinin daha da çoxalacağı gözlənir. Yeri gəlmişkən qeyd edək ki, ötən il Silahlı Qüvvələrimizi müasir tələblərə cavab verən müdafiə təyinatlı məmulatlarla və xalq təsərrüfatını maşınqayırma, cihazqayırma, elektrotexnika, rabitə sahələrində istifadə olunan avadanlıq və ehtiyat hissələri ilə təmin etmək üçün Müdafiə Sənayesi Nazirliyinin tabeliyində olan müəssisələrdə yeni istehsal sahələri yaradılıb. 2008-ci illə müqayisədə ötən il nazirlik üzrə istehsal olunmuş müdafiə təyinatlı məmulatların həcmi 3 dəfə, mülki məhsulların həcmi isə 20 faiz artıb. Ümumilikdə Müdafiə Sənayesi Nazirliyi tərəfindən ötən il 586 adda məmulat istehsal edilib ki, bunun da 350-si müdafiə təyinatlıdır.

Bu il nazirliyin bir sıra yeni istehsal müəssisələri də istifadəyə verilib. Məsələn, martın 5-də Müdafiə Sənayesi Nazirliyinin "Üfüq" İstehsalat Birliyinin "Dalğa" Elmi-İstehsalat Müəssisəsinin əsaslı yenidənqurmadan sonra açılışı olub. Açılışda Prezident İlham Əliyev də iştirak edib. Müəssisədə dünyanın ən inkişaf etmiş ölkələrinin dəzgah və avadanlıqları quraşdırılıb. Mexaniki emal sahəsində proqramla idarə olunan dəzgahlarda mürəkkəb konstruksiyaya malik məhsulların istehsalına başlanıb. Yeni sınaq sahəsində quraşdırılan avadanlıqlar isə bütün hazır məhsulların yoxlanmasına imkan yaradır. Müəssisədə silahların təmiri və yığımı sahəsində də iş yerləri müvafiq texnoloji tərtibatlarla təmin olunub və il ərzində böyük miqdarda müasir məmulatların istismara verilməsinə imkan yaradılıb. Rabitə sistemlərinin təmiri və yığımı sahəsində mövcud rabitə sistemlərinin və onların antenalarının təmirinə başlanılıb, antenaların Avropa standartları səviyyəsində kütləvi istehsalı və yığımı qaydasına salınıb.

Yenə də martn 5-də Prezident İlham Əliyevin iştirakı ilə Müdafiə Sənayesi Nazirliyinin "Şərq" İstehsalat Birliyinin "İqlim" Elmi-İstehsalat Müəssisəsində yeni istehsal sahələrinin açılışı olub. Bu müəssisədə "Zəfər", "Zəfər-K", "İnam" tapançaları, "İstiqlal-1" snayper tüfəngləri və digər məhsullar istehsal edilir.

Bu il aprelin 1-də Prezident İlham Əliyev daha iki müəssisənin yeni istehsal sahələrinin açılışında iştirak edib. Bunlar "Aqreqat" İstehsalat Birliyinin "Telemexanika" və Şirvan "Araz" zavodlarıdır. Həmin zavodlarda mürəkkəb konstruksiyaya malik məmulatlar, xüsusi təyinatlı məhsullar istehsal edilir. O da xüsusi olaraq vurğulanmalıdır ki, Azərbaycan ölkədə hərbi təyinatlı məhsulların istehsalını təmin etmək məqsədilə bu sahədə məşhur şirkətlərlə, eləcə də dünyada müdafiə texnikasının ən yaxşı istehsalçısı kimi tanınan dövlətlərlə sıx əməkdaşlıq edir. Məsələn, ölkəmizdə zirehli avtomobil istehsalını təşkil etmək üçün Cənubi Afrika Respublikasının "Paramount Group" şirkəti ilə razılaşmalar əldə olunub və artıq ölkəmizdə belə maşınlar istehsal edilir. "Matador" və "Maradeur" adlanan zirehli maşının göstəriciləri olduqca yüksəkdir. "Matador" maşınları texniki göstəricilərinə görə dünya standartlarına cavab verir və Azərbaycan MDB məkanında bu zirehli texnikanı istehsal edən yeganə ölkədir.

Ölkəmizdə PDM (piyadaların döyüş maşını) və ZTR -lərin (zirehli transportyor) modernizasiyası da həyata keçirilir. Həmçinin müxtəlif qoşun növlərində istismar müddəti başa çatan hərbi maşınların modernizasiya edilməsi və müasir standartlara uyğunlaşdırılması istiqamətində də mühüm addımlar atılır. Bunlar da Azərbaycan ordusunun maddi-texniki təminatının nə dərəcədə yüksək səviyyəyə çatdırıldığını göstərir.

Beləliklə, Azərbaycan öz ordusunu durmadan gücləndirdiyi halda, Ermənistanda bu proses tamamilə əks istiqamətdə cərəyan edir. Bu səbəbdən də Ermənistanda işğal edilmiş Azərbaycan ərazilərini müharibə olmadan azad etməyin zəruriliyni bəyan edənlərin sayı artmaqdadır. Onlar artıq başa düşüblər ki, istər Dağlıq Qarabağ, istərsə də onun ətrafında yerləşən və işğal altında saxlanan əraziləri Azərbaycan ordusu qısa zaman ərzində azad etmək iqtidarındadır.

Rasim BAYRAMOV

Azərbaycan.- 2010.- 14 may.- S. 6.