O yerlər bizi gözləyir...
On səkkiz
ildir ki, Qarabağın qalası olan
laçınsızıq. On səkkiz ildir ki, səksəkədəyik.
Laçın dağlarının özü qədər
ağır ayrılıq dərdini yana-yana, qovrula-qovrula
yaşayırıq. Başımızda ildırımlar
çaxsa da, ürəyimizdə fırtınalar qopsa da,
intiqam anını, qisas məqamını gözləyirik.
Bütün qarabağlılar kimi, laçınlılar da
respublika Prezidenti, Silahlı Qüvvələrin Ali Baş
Komandanı İlham Əliyevin əmrinə müntəzirdirlər
ki, silaha sarılıb doğma yurd yerlərinin işğaldan
azad edilməsi uğrunda müqəddəs savaşa
atılsınlar. Həmişə dövlətçiliyə,
xalqımızın ümummilli lideri Heydər Əliyevin
siyasi kursuna sədaqətli olan laçınlılar öz əzəli
mövqelərində bu gün də dəyişməzdirlər.
Prezident İlham Əliyevin ətrafında
sıx birləşən, Qarabağ probleminin həlli istiqamətində
dövlət başçısının apardığı
prinsipial və ardıcıl siyasəti birmənalı şəkildə
müdafiə edən Laçın camaatı çox
nikbindir. Onlar dədə-baba torpaqlarına tezliklə dönəcəklərinə
qətiyyən şübhə etmirlər.
Laçınlılar ötən
18 ildə əllərini əllərinin üstünə qoyub
gözləməyiblər. Qaçqın və məcburi
köçkünlərin problemlərini həmişə
prioritet məsələ kimi diqqət mərkəzində
saxlayan dövlət başçısının qayğı
və diqqətindən güc alaraq ürəklərində
ağır niskil olsa da, laçınlılar qurub-yaratmaqdan
yorulmayıblar. Ötən 18 il ərzində Laçın əhalisinin
sıx məskunlaşdığı Ağcabədi rayonunun
Taxta körpü ərazisində böyük abadlıq,
quruculuq işləri görülmüşdür. Bir vaxtlar
ilan mələyən, boz səhranı xatırladan bu yerlər
indi laləzara çevrilib. Söz yox ki, dövlətin qayğısı,
Laçın övladlarının odlu ürəyi, təpərli
əlləri ilə. Laçının rayon mərkəzinə
çevrilmiş Taxta körpü qəsəbəsi bu gün
hər cür infrastruktura malik müasir şəhərə bənzəyir.
Burada yaşıllığa, gül-çiçəyə qərq
olmuş parklar, müasir görkəmli, yaraşıqlı
binalar, rahat yollar, hər tərəfdə diqqətçəkən
səliqə-sahman göz oxşayır.
İşğal günü ərəfəsində,
mayın 15-də respublikanın müxtəlif elm, təhsil
sahələrində, dövlət idarəetmə və
hüquq-mühafizə orqanlarında işləyən
laçınlı ziyalılar, iş adamları və
ictimaiyyət nümayəndələri Taxta körpüdəki
qərargaha toplaşmışdılar.
Görüş
iştirakçıları əvvəlcə ümummilli lider
Heydər Əliyevin abidəsi önünə
gül-çiçək qoymuş, xatirəsini ehtiramla yad
etmişlər.
Bütün
laçınlıların ürəyincə olan belə
görüşlər son illər gözəl ənənəyə
çevrilmişdir. Bu faydalı təşəbbüs
böyük ictimai-siyasi əhəmiyyət kəsb edir.
Laçın Rayon İcra Hakimiyyətinin
başçısı Ramiz Cəbrayılov bu barədə
fikirlərini bizimlə bölüşür:
- Biz belə günlərdə
Laçına qayıtmağın yollarını birlikdə
arayıb-axtarır, dövlətimizin gücünü-qüdrətini
daha da artırmaq üçün məsləhətləşir,
təklifləri, ideyaları öyrənirik. Bu inkarolunmaz bir həqiqətdir
ki, Laçını erməni silahlı birləşmələri
himayədarlarının köməyi ilə işğal
etmişdir. O da gerçəklikdir ki, AXC-Müsavat
cütlüyünün hakimiyyət ehtirasları, ekstremal
şəraitdə dövləti bacarıqla idarə edən
liderin olmaması və sapı özümüzdən olan
baltaların xəyanəti düşmən
çırağına neft tökdü, Laçının
süqutunu labüdləşdirdi. Tarixi qəhrəmanlıq ənənələri,
mərdliyi, cəsarəti olan laçınlılar bu qeyri-bərabər
döyüşdə vuruşdular. 267 nəfər şəhid
verdik. 65 nəfər itkin düşdü. Döyüşlərdə
göstərdiyi qəhrəmanlığa görə
Laçın oğullarından 5 nəfəri Azərbaycan
Respublikasının Milli Qəhrəmanı adına layiq
görüldü. Qarabağ uğrunda döyüşlərdə
həlak olan qəhrəman oğullarımızın xatirəsini
əbədiləşdirmək üçün Taxta
körpü qəsəbəsində mərmərdən əzəmətli
abidə ucaltmışıq. Mayın 15-də abidənin təntənəli
açılışı gerçəkləşdi. Şəhidlərimizin
adına 400 nəfərlik ehsan süfrəsi açdıq. Bu
abidə ona görə lazımdır ki, qoy gələcək
nəsillər öz millətinin tarixini unutmasınlar.
İnanıram ki, Laçında çox əzəmətli qəhrəmanlıq
abidəsi ucaldacağıq. Biz laçınlılar doğma
yurd yerləri üçün çox
darıxmışıq. Nə qədər tikib-qursaq da, şəhərlər,
qəsəbələr salsaq da, fikrimiz, xəyalımız
dağlarda dolanır. Dövlətimizin
başçısı, möhtərəm Prezident İlham Əliyevdən
misilsiz qayğı və diqqət görsək də, məskunlaşdığımız
bütün ərazilərdə bizim üçün son dərəcə
gözəl və əlverişli şərait yaradılsa da,
ürəyimiz yurd həsrəti ilə
çırpınır. Varlığımızda
qarşısıalınmaz və sarsılmaz bir inam var.
Uşaqdan böyüyə, qadından kişiyə
bütün laçınlılar tükənməz enerjisi, qətiyyəti,
prinsipial və uzaqgörən siyasəti ilə bütün
dünyanı heyran qoyan, Qarabağın bir qarış
torpağını da güzəştə getməyəcəyini
bəyan edən öz sevimli Prezidentlərinə etibar edirlər.
İnanırlar ki, respublika Prezidenti, Silahlı Qüvvələrin
Ali Baş Komandanı İlham Əliyev hansı yolla
olursa-olsun - istər sülh, istərsə də müharibə
yolu ilə işğal altında olan torpaqlarımızın
azadlığını təmin edəcəkdir. Dağlara
qayıdacağımız gün uzaqda deyil.
Dağlar gözəli
Laçın torpaqlarının altı da, üstü də
xəzinədir. Dünyada ən nadir ağac sayılan
Qırmızı Dəmirağac meşələri,
çoxlu mineral suları, kobalt, uran, civə, qızıl, dəmir,
müxtəlif rəngli mərmər yataqları ilə zəngin
olan Laçın bizə təbiətin və qeyrətli
babaların çox qiymətli yadigarı idi.
Laçına dönmək,
doğma dağlara qovuşmaq eşqiylə
çırpınan laçınlıların qurub-yaratmaq həvəsi
tükənməzdir. Əhalinin sıx şəkildə məskunlaşdığı
Taxta körpü qəsəbəsinin siması dövlətin
qayğısı sayəsində sürətlə dəyişir.
Azərbaycan Respublikasının Prezidenti cənab İlham Əliyev
tərəfindən imzalanmış 2008-ci il 20 noyabr tarixli
"Əhalinin ekoloji cəhətdən təmiz su ilə təminatının
yaxşılaşdırılması ilə əlaqədar əlavə
tədbirlər haqqında" sərəncamına uyğun olaraq
Azərbaycan Respublikasının Ekologiya və Təbii Sərvətlər
Nazirliyi tərəfindən Taxta körpü ərazisindəki
Alxaslı və Qarakeçdi obalarında yaxın vaxtlarda
modul tipli sutəmizləyici qurğuların
quraşdırılmasına başlanılacaq. Hazırda
Ağcabədi şəhərindən Taxta körpü qəsəbəsinə
təbii qaz xəttinin çəkilişi həyata
keçirilir.
Son iki ildə ərazidə
2 park salınmış, 15 mindən artıq ağac və
gül kolu əkilmiş, şəhidlərin xatirəsinə
abidə kompleksi inşa olunmuş, əksər binalarda yenidənqurma
və təmir işləri aparılmışdır. 2009-cu
ildən etibarən Taxta körpü ərazisində 4000 hektar
sahədə meliorasiya tədbirlərinin həyata
keçirilməsinə başlanılmışdır.
Taxta körpü qəsəbəsində
552 evin tikintisi ilə bağlı layihələndirmə
işləri başa çatdırılmış, ərazidə
çiy kərpicdən tikilmiş qamış komalarda məskunlaşmış
3137 ailə üçün yeni evlərin tikilməsi məqsədilə
Azərbaycan Respublikası Nazirlər Kabinetinin 14 aprel 2010-cu il
tarixli sərəncamı ilə 627 hektar torpaq sahəsi
ayrılmışdır. Eyni zamanda, Bakı və
Sumqayıtın məktəb binalarında, yataqxanalarında məskunlaşmış
laçınlı məcburi köçkünlərin də
mənzil-məişət şəraitlərinin
yaxşılaşdırılması üçün
müvafiq tədbirlərin görülməsi nəzərdə
tutulmuşdur. Ötən il Bakı şəhərində
inşa olunmuş çoxmərtəbəli
yaşayış evlərində 30-dək laçınlı
mənzillə təmin edilmişdir. Keçən il Bakı
şəhərində Prezidentin dəstəyi ilə hər
bir laçınlı üçün əziz və unudulmaz
olan Laçın şəhərinin 85 illik yubileyinin, bu il isə
Laçın rayonunun qocaman təhsil ocaqlarından biri Minkənd
orta məktəbinin 120 illik yubileyinin təntənəli şəkildə
qeyd olunması xüsusi əhəmiyyət kəsb edir.
Yubileylə əlaqədar Laçın şəhəri və
Minkənd orta məktəbi ilə bağlı sənədli
film çəkilmiş, fotoalbomlar
hazırlanmışdır. Respublika Prezidenti İlham Əliyevin
sərəncamları ilə 14 nəfər fəxri ad və
medallarla təltif olunmuşdur. Fərəhlidir ki, son iki il ərzində
dövlət başçısı tərəfindən 20 nəfərdən
çox laçınlı ziyalı respublikanın yüksək
orden, medal və fəxri adlarına layiq
görülmüşlər. Bütün bunlar rayon sakinləri
arasında onlara olan diqqət və qayğının ifadəsi
kimi dəyərləndirilir, yüksək sevinc və minnətdarlıq
hissi ilə qarşılanır.
Bu gün hər bir
laçınlı dövlət qayğısına
sığınıb nə qədər rahat və firavan
yaşasa da, onun qəlbində Laçın həsrəti və
şəhidlərimizin nigaran ruhları qarşısında əvəzi
qisas və intiqam olan mənəvi borc var. 18 ildən bəri
davam edən bu üzücü həsrəti bitirməyin,
boynumuzda dəyirman daşından da ağır bu borcu ödəmək
üçün silaha sarılmağın, düşməndən
qisas almağın məqamı yetişib.
Yığıncaqda Prezident
Administrasiyasının məsul işçisi Rövşən
Ağayev, Milli Məclisin deputatları Sevindik Hətəmov,
Aqil Abbas, "Azərbaycan Respublikası Dağlıq
Qarabağ bölgəsinin Azərbaycanlı İcması"
İctimai Birliyinin rəhbəri, Şuşa Rayon İcra
Hakimiyyətinin başçısı Bayram Səfərov,
Xocavənd rayon İcra hakimiyyətinin başçısı
Eyvaz Hüseynov, Qaçqın və Məcburi
Köçkün Gənclər Təşkilatının sədri
Vüqar Qədirov, "525-ci qəzet"in baş redaktoru Rəşad
Məcid, akademik Məhəmməd Mehdiyev və
başqaları çıxış edərək
görüşün əhəmiyyətini yüksək qiymətləndirmiş,
belə görüşlərin gələcəkdə də
keçirilməsinin vacibliyini vurğulamışlar.
Çıxışlarda əminliklə bildirilmişdir ki, Prezident İlham Əliyevin uzaqgörən daxili və xarici siyasəti nəticəsində Ermənistan-Azərbaycan, Dağlıq Qarabağ problemi ölkəmizin milli maraqlarına uyğun həll olunacaq və doğma torpaqlarımız tezliklə erməni işğalçılarından azad ediləcəkdir.
Mərasimdə Azərbaycan Respublikasının Milli Qəhrəmanı Fazil Mehdiyevin atası Umud Mehdiyev, şəhid anası Sevda Kərimova, Milli Məclisin deputatı Tahir Rzayev və başqaları çıxış edərək tarixən qürur, məğrurluq, vüqar və əyilməzlik rəmzi olmuş Laçının tezliklə işğaldan azad olunacağına inandıqlarını bildirmişlər. Əbədi məşəl yandırıldıqdan sonra iştirakçılar abidə kompleksinin önünə gül dəstələri qoymuşlar. Şəhidlərin ruhuna dualar oxunmuş, ehsan süfrəsi açılmışdır
Lazım QULİYEV
Azərbaycan.- 2010.- 18 may.- S.
10