Ustad aşıq anıldı

Rəşid Behbudov adına Mahnı Teatrında Borçalı mahalının ustad aşıqlarından olan Qaraçöplü aşıq Musanın 125 illik yubileyi təntənə ilə qeyd edildi.

Xalq şairi, Aşıqlar Birliyinin sədri Zəlimxan Yaqub aşıq Musa yaradıcılığından ətraflı söhbət açaraq qeyd etdi ki, haqq aşığı zəngin yaradıcılığı və mənalı ömrü ilə Borçalı mahalında özünə böyük şöhrət qazanmışdır. Yazıb-oxuya bilməyən aşıq Musa fitri istedadı sayəsində aşıq sənətinin bütün sirlərini dərindən öyrənib və bu sahədə özündən sonra zəngin ədəbi irs qoyub.

Tədbirdə qeyd edildi ki, ədəbiyyatşünaslar aşıq Musa yaradıcılığını toplayıb tədqiq etməlidir. Ona görə ki, zəngin ədəbi irsi olan ustad aşığın əsərlərindən ibarət "Musa eldən aralanmaz..." kitabı yalnız bu il işıq üzü görüb. Yeni kitab ilk uğurlu addım olsa da, aşıq Musanın zəngin ədəbi irsinin kiçik bir hissəsidir.

Yubiley gecəsində Nizami adına Ədəbiyyat İnstitutunun direktor müavini, filologiya elmləri doktoru Məhərrəm Qasımlı, şair İlyas Tapdıq, pedaqoji elmlər namizədi Fərhad Xubanlı, Estoniya Tartu Universitetinin türkologiya kafedrasının müdiri, şair Xəqani Qayıblı, folklorşünas Elxan Məmmədli çıxış edərək ustad aşığın yaradıcılığının bədii xüsusiyyətlərindən, keçdiyi şərəfli ömür yolundan ətraflı söhbət açdılar. Hamı bu fikirdə oldu ki, aşıq Musanın zəngin ədəbi irsi toplanıb, tədqiq edilib xalqa çatdırılmalıdır.

Aşıqlardan Məhəmməd Sadaxlı, Əşrəf Qəribov, Aida Gülzar aşıq Musanın şeirlərini saz havalarının müşayiəti ilə oxuyub dinləyiciləri heyrətləndirdi.

Xəlil Qaraçöp və Ariz Hüseynov aşığın ürəyəyatan şeirlərini muğam üstə oxuyub dinləyicilərin ruhunu oxşadı. İrəvan Azərbaycan Dövlət Dram Teatrının aktyorlarının aşıq Musa şeirlərindən hazırladığı ədəbi-bədii kompozisiya yubiley iştirakçıları tərəfindən alqışlarla qarşılandı.

Azərbaycan.- 2010.- 23 may.- S. 7.