Azərbaycan ilə Misir arasında üç saziş imzalanmışdır

Mayın 24-də Azərbaycanın xarici işlər naziri Elmar Məmmədyarov ölkəmizdə səfərdə olan Misirin xarici işlər naziri Əhməd Əbul Ğeyt ilə görüşmüşdür.

Görüşdən sonra birgə mətbuat konfransı keçirən nazirlər müzakirə olunmuş məsələlər haqqında məlumat vermişlər.

E.Məmmədyarov qeyd etmişdir ki, görüşdə ikitərəfli münasibətlər, Ermənistan-Azərbaycan, Dağlıq Qarabağ münaqişəsi, regiondakı vəziyyət barədə müzakirələr aparılmışdır.

Misirli nazir vurğulamışdır ki, bu səfər onun ölkəsi ilə Azərbaycan arasında əməkdaşlığın daha da genişləndirilməsinə imkan yaradacaqdır.

Bildirilmişdir ki, görüşdə Azərbaycan Respublikası ilə Misir Ərəb Respublikası arasında üç müqavilə imzalanmışdır.

"Azərbaycan Respublikası hökuməti və Misir Ərəb Respublikası hökuməti arasında diplomatik, xidməti və xüsusi pasportlara malik şəxslər üçün vizaların ləğv edilməsi haqqında Saziş"i və "Azərbaycan Respublikası Gənclər və İdman Nazirliyi və Misir Ərəb Respublikasının Milli Gənclər Şurası arasında Anlaşma Memorandumu"nu Azərbaycan tərəfindən xarici işlər naziri Elmar Məmmədyarov, Misir tərəfindən xarici işlər naziri Əhməd Əbul Ğeyt imzalamışlar.

"Azərbaycan Respublikası Xarici İşlər Nazirliyinin Diplomatik Akademiyası və Misir Ərəb Respublikası Xarici İşlər Nazirliyinin Diplomatik Tədqiqatlar İnstitutu arasında əməkdaşlıq haqqında Saziş"i isə Azərbaycan tərəfindən xarici işlər nazirinin müavini, akademiyanın rektoru Hafiz Paşayev və Misir tərəfindən bu ölkənin Azərbaycandakı səfiri Sabir Əbdülqadir Mansur imzalamışlar.

AzərTAc

Azərbaycan.- 2010.- 25 may.- S. 8.