Ədliyyə Nazirliyinin nümayəndə heyəti beynəlxalq tədbirdə iştirak etmişdir

Portuqaliyanın Madeyra regionunun Funşal şəhərində "Xüsusi statusu olan Avropa regionları: imkanlar və perspektivlər" mövzusunda konfrans keçirilmişdir.

Ədliyyə Nazirliyinin mətbuat xidmətindən bildirmişlər ki, Azərbaycanı tədbirdə nazirliyin Bələdiyyələrlə iş mərkəzinin rəisi Mehdi Səlimzadənin rəhbərliyi ilə nümayəndə heyəti təmsil etmişdir.

Madeyra regionu hökuməti prezidentinin təşəbbüsü və Avropa Şurası Yerli və Regional Hakimiyyətlər Konqresinin Regionlar Palatasının təşkilatçılığı ilə keçirilmiş tədbirdə konqresin prezidenti, Avropa Şurasının ekspertləri, üzv dövlətlərin nümayəndələri, həmçinin Avropa universitetlərindən alimlər iştirak etmişlər.

Konfransda Madeyra regionu hökumətinin prezidenti Juan Jardim, konqresin prezidenti Kit Vitmor və digər rəsmi şəxslər çıxış etmişlər. Tədbirdə Avropa regionlarının vəziyyəti, müqayisəli təhlili, maliyyə müstəqilliyi, büdcənin idarə olunması, demokratik institutların və vətəndaş demokratiyasının inkişafı yolları və digər məsələlər müzakirə olunmuşdur.

Tədbirdə Azərbaycan nümayəndə heyətinin rəhbəri çıxış edərək, yerli və regional demokratiya sahəsində ölkədə görülən işlər, region olaraq Naxçıvan Muxtar Respublikasının tarixi, siyasi vəziyyəti, statusu və digər məsələlər barədə geniş məlumat vermişdir.

Səfər çərçivəsində, həmçinin Avropa Şurası Yerli və Regional Hakimiyyətlər Konqresinin prezidenti, Madeyra regionu hökumətinin prezidenti, eləcə də bir sıra ölkələrin nümayəndələri ilə işgüzar görüşlər keçirilmiş, faydalı fikir mübadiləsi aparılaraq əməkdaşlıq perspektivləri müzakirə edilmişdir.

AzərTAc

Azərbaycan.- 2010 .- 20 noyabr.- S. 5.