"Azərbaycan xalçaçılığı sənəti" nominasiyası YUNESKO-nun Qeyri-maddi Mədəni İrs üzrə Reprezentativ Siyahısına daxil edilmişdir

 

Noyabrın 15-dən 19-dək Keniyanın paytaxtı Nayrobi şəhərində YUNESKO-nun Qeyri-maddi Mədəni İrsin Qorunması üzrə Hökumətlərarası Komitəsinin 5-ci sessiyası keçirilmişdir.

Xarici İşlər Nazirliyinin mətbuat xidmətindən AzərTAc-a bildirmişlər ki, sessiyada YUNESKO-nun Qeyri-maddi Mədəni İrs üzrə Reprezentativ Siyahısına daxil edilməsi məqsədilə üzv dövlətlər tərəfindən irəli sürülmüş nominasiyalarla yanaşı, Azərbaycanın "Azərbaycan Respublikasında ənənəvi Azərbaycan xalçaçılığı sənəti" nominasiyası müzakirə edilmişdir. Aparılmış müzakirələr və səsvermə nəticəsində "Azərbaycan Respublikasında ənənəvi Azərbaycan xalçaçılığı sənəti" nominasiyası YUNESKO-nun Qeyri-maddi Mədəni İrs üzrə Reprezentativ Siyahısına daxil edilmişdir.

Sessiyada Ermənistan tərəfinin növbəti saxtakarlıq cəhdlərinin qarşısı da alınmışdır. Belə ki, Ermənistan nümayəndələrinin xaçdaşlarla bağlı irəli sürmüş nominasiyası müzakirəyə çıxarılmışdır. Nominasiya faylında ölkəmizin maraqlarına zidd və həqiqətə uyğun olmayan məlumatlar yerləşdirilmiş, ərazi iddiaları irəli sürülmüş, Dağlıq Qarabağ müstəqil dövlət kimi təqdim edilərək xaçkarların yalnız erməni xalqına məxsus olduğunu iddia edən başlıq seçilmişdir. Məsələ ilə əlaqədar Azərbaycan Respublikasının Xarici İşlər Nazirliyinin YUNESKO üzrə AR Milli Komissiyası, YUNESKO yanında AR Daimi Nümayəndəliyi və digər diplomatik nümayəndəliklər, eləcə də AR Mədəniyyət və Turizm Nazirliyi, AR Müəllif Hüquqları Dövlət Agentliyi, Milli Elmlər Akademiyası tərəfindən sessiya zamanı müvafiq qabaqlayıcı tədbirlər həyata keçirilmişdir. Bununla yanaşı, ölkəmizin müvafiq dövlət qurumları və ictimai birliklərdən, o cümlədən Alban-Udin Cəmiyyəti və xaricdə fəaliyyət göstərən diaspor təşkilatlarından YUNESKO-nun baş direktoru və katibliyinə çoxsaylı etiraz məktubları göndərilmişdir. Görülmüş işlərin nəticəsində Ermənistanın təqdim etdiyi dosyenin baxılması təxirə salınmışdır.

Komitə üzvləri və təşkilatın katibliyinin qəti mövqeyi ilə üzləşən Ermənistan nümayəndə heyəti nəticə etibarilə nominasiyanın adını dəyişərək "Erməni xaçdaşlarının sənəti. Xaçkarların simvolizmi və sənətkarlığı" kimi adlandırmış və nominasiyada əks olunmuş ziddiyyətli və yanlış məlumatları çıxarmışdır. Bununla da ölkəmizin nümayəndə heyəti xaçdaşların yalnız Ermənistana aid olmasının təsdiq edilməsinə dair səylərin qarşısını almış, həmin qeyri-maddi mədəni irs nümunəsinin Alban mədəniyyətinə məxsus olduğunubu günədək mühafizə edilərək saxlanıldığını sübut etmişdir. Həmçinin dosyenin ilkin versiyasında Azərbaycanın ərazi bütövlüyünü sual altına qoyanişğal olunmuş ərazilərdə mövcud qondarma qurumu müstəqil dövlət kimi təqdim etmə cəhdlərinə də yol verilməmişdir.

Tədbirdə YUNESKO-nun baş direktoru İ.Bokova və digər rəsmilər, YUNESKO-nun üzv dövlətlərindən vəzifəli şəxslər və ekpertlərlə yanaşı, Azərbaycan Respublikası mədəniyyət və turizm naziri Əbülfəs Qarayevin rəhbərliyi ilə AR Mədəniyyət və Turizm Nazirliyi, YUNESKO yanında AR Daimi Nümayəndəliyi və YUNESKO üzrə AR Milli Komissiyasının əməkdaşları, eləcə də ölkəmizin müvafiq ekspertlərindən ibarət nümayəndə heyəti iştirak etmişdir.

 

 

Azərbaycan.- 2010.- 20 noyabr.- S. 8.