Azərbaycan-Misir əlaqələri inkişaf edir

Noyabrın 23-də Milli Məclisin Sədri Oqtay Əsədov İsgəndəriyyə kitabxanasının direktoru, Misir senatoru İsmayıl Serageldini qəbul etmişdir.

Sədr qonağı səmimi salamlayaraq onu Milli Məclisdə görməyindən məmnun olduğunu bildirdi. Qeyd edildi ki, bu gün ölkələrimiz arasında dostluq əlaqələri sürətlə inkişaf edir. Bu əməkdaşlığın qədim tarixi kökləri var. Hələ sovet dönəmində Azərbaycanla Misir arasında mehriban dostluq əlaqələri olub. Ölkəmiz müstəqillik əldə etdikdən sonra bu əlaqələr keyfiyyətcə yeni səviyyəyə yüksəlmişdir. Xalqımızın ümummilli lideri Heydər Əliyevlə Misir Prezidenti Hüsnü Mübarək arasında dostluq münasibətləri əməkdaşlığımızın inkişafı üçün yaxşı zəmin yaratmışdır. Bu gün bu siyasət Azərbaycan Prezidenti İlham Əliyev tərəfindən uğurla davam etdirilir.

Sədr Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva ilə Misir Prezidentinin xanımı Syuzan Mübarəkin bir sıra humanitar sahələrdə əməkdaşlığının ölkələrimizin tərəqqisinə xidmət etdiyini vurğuladı. Bildirildi ki, Azərbaycanın birinci xanımı İsgəndəriyyə kitabxanasının Qəyyumlar Şurasının fəxri üzvü seçilmişdir.

Ölkələrimiz arasında bu günədək 48 sənəd imzalanmışdır. Hər iki ölkə neft və qaz hasil edən dövlətlər kimi dünya enerji bazarının tənzimlənməsində mühüm rol oynayır. İqtisadi münasibətlərimizin dərinləşməsi üçün geniş imkanlar mövcuddur.

Spiker qeyd etdi ki, ölkələrimiz arasında parlamentlər səviyyəsində əməkdaşlıq da çox əhəmiyyətlidir. Hər iki ölkənin parlamentində dostluq qruplarının fəaliyyət göstərməsi təqdirəlayiqdir. Deputatlarımız müxtəlif beynəlxalq qurumlarda prinsipial məsələlərdə eyni mövqedən çıxış edirlər.

Söhbətdə tarixi qədim dövrlərə gedib çıxan mədəni əlaqələrimizin dinamik inkişafından söz açan Sədr Misirin İsgəndəriyyə kitabxanası ilə Azərbaycan kitabxanaları arasında yaranan əməkdaşlığın əhəmiyyətini yüksək dəyərləndirdi. Qeyd edildi ki, xalqımızın tarixi-mədəni, elmi-estetik irsinin qorunub saxlanmasında, cəmiyyətimizin intellektual potensialının yüksəlməsində kitabxanalar əvəzsiz rol oynayır. Bu gün müstəqil Azərbaycanda 12 mindən çox müxtəlif tipli kitabxana fəaliyyət göstərir. Ölkə rəhbərliyi bu sahəni daim diqqət mərkəzində saxlayır.

Söhbətdə Milli Məclisin Sədri Azərbaycanın ən ağrılı problemi olan Dağlıq Qarabağ münaqişəsinin həllində Misirin ölkəmizin mövqeyini müdafiə etməsini yüksək dəyərləndirdi.

Spiker Misir senatoru İsmayıl Serageldinin səfərinin ölkələrimiz arasında əlaqələrin inkişafına öz müsbət təsirini göstərəcəyinə inamını ifadə etdi.

Səmimi qəbul üçün minnətdarlığını bildirən qonaq Azərbaycanda gördüyü inkişafdan və səfər müddətində keçirdiyi görüşlərdən məmnun olduğunu söylədi. Qeyd edildi ki, Misir oxşar mədəniyyətə malik Azərbaycanla həyatın müxtəlif sahələrində əməkdaşlığın inkişafına böyük maraq göstərir. Ölkələrimiz arasında siyasi, iqtisadi, humanitar, mədəni sahələrdə mövcud olan əməkdaşlıq yüksələn xətlə inkişaf etməkdədir. Ölkə başçıları arasında mövcud olan dostluq münasibətləri dövlətlərarası əlaqələrə də öz müsbət təsirini göstərir.

Bu gün Misirin müxtəlif dövlət qurumları ilə Azərbaycanın müvafiq strukturları arasında hər iki xalqın mənafeyinə xidmət edən əməkdaşlıq mövcuddur. Biz gələcəkdə də əlaqələrimizi dərinləşdirmək niyyətindəyik.

Söhbətdə tərəfləri maraqlandıran məsələlər ətrafında geniş fikir mübadiləsi aparıldı.

Azərbaycan.- 2010.- 24 noyabr.- S. 3.