Ağcabədidə sosial-iqtisadi inkişaf daha geniş vüsət alır

Dinamik sosial-iqtisadi inkişaf yolunda uğurla irəliləyən Azərbaycanın regionlarında yaşanan tərəqqi günü-gündən geniş vüsət alır, keyfiyyətcə özünün daha yüksək mərhələsinə qədəm qoyur. Bu kontekstdə Ağcabədi rayonu da özünün sürətli inkişaf dövrünü yaşamaqdadır. Cari ilin ötən müddəti ərzində rayonun sosial-iqtisadi inkişaf göstəriciləri bunun real sübutudur.

Cari ilin ötən üç rübü ərzində Ağcabədidə 2017 yeni iş yeri açılmışdır ki, bunun 840-ı daimi olmuşdur. Ümumi məhsul istehsalının həcmi hesabat dövründə ötən ilin 9 ayına nisbətən 2938,2 min manat çoxdur. O cümlədən, bu göstərici sənayedə, kənd təsərrüfatında, tikintidə, nəqliyyatda, rabitədə və ticarətdə öz dinamik inkişafını əsaslı şəkildə göstərmişdir.

Rayonda əsas kapitala investisiya qoyuluşu hər il artır. 2010-cu ilin ötən müddəti üzrə investisiya qoyuluşu 20946,6 min manat olmuşdur ki, bu da ötən ilin 9 ayına nisbətən 430,1 min manat çoxdur. Əvvəlki dövrlərdə olduğu kimi, bu il də Ağcabədi rayonunda abadlıq-quruculuq işləri davam etdirilmişdir. Şəhərin Heydər Əliyev prospekti, M.Ə.Rəsulzadə prospekti, S.Vurğun, T.İsmayılov, Ə.Bünyatov, H.Aslanov, Qarabağ küçələrində səki yanlarına təbii əhəng daşından 5045 kvm ağ lay vurulmuş, 876 kvm yer səthinə dekorativ plitələr döşənmişdir.

Bu il rayonda taxıl biçini müvəffəqiyyətlə başa çatmışdır. "Kənd təsərrüfatı məhsulları istehsalçılarına dövlət dəstəyi haqqında" Azərbaycan Respublikası Prezidentinin 23 yanvar 2007-ci il tarixli 1907 nömrəli sərəncamına uyğun olaraq Nazirlər Kabinentinin "Kənd təsərrüfatı məhsullarının istehsalçılarına əkin sahələrinin becərilməsində istifadə etdiyi yanacaq və motor yağlarına görə dövlət büdcəsinin vəsaiti hesabına yardım verilməsi Qaydaları"na əsasən Ağcabədidə hər il olduğu kimi, bu ildə 1 iyun tarixinə qədər rayon üzrə 15129 nəfər istehsalçı tərəfindən əkilmiş 54413,99 hektar kənd təsərrüfatı bitkilərinin hər hektarına 40 manat hesabı ilə 2176,5 min manat vəsait verilmişdir. Prezident İlham Əliyevin göstərişi ilə 2006-cı ildən başlayaraq respublikamızın digər rayonlarında olduğu kimi, Ağcabədidə də ayrı-ayrı ərazilərdə tədarük edilmiş kənd təsərrüfatı məhsulları Bakı şəhərinin Xətai rayonu ərazisindəki yarmarkada şənbə və bazar günləri satışa çıxarılır. Belə ki, 2010-cu ilin ötən müddəti ərzində 900,6 ton ət (mal-qoyun), pendir, soğan, kələm və digər kənd təsərrüfatı məhsulları satışa çıxarılmışdır.

2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramına uyğun olaraq, rayonda əkin sahələrinin genişləndirilməsi, əkilməsi mümkün olan örüş sahələrinin dövriyyəyə cəlb edilməsi ilə bağlı xeyli iş görülmüşdür.

Cari ilin 9 ayının sosial-iqtisadi inkişafının yekunlarına həsr olunmuş iclasda rayon icra hakimiyyətinin başçısı Şahin Məmmədov rayonda təhsil, səhiyyə sahəsində görülən işlər, yaşanan inkişaf barədə də ətraflı məlumat vermişdir. Bildirmişdir ki, rayonda idmanın inkişafına da xüsusi diqqət yetirilir. Hazırda Ağcabədidə futbol, voleybol, karate-do, taekvon-do, kikboksinq, ağır atletika, atletika, şahmat, uşu-sanda, sayokan, daşqaldırma, cüdo, sambo və boks idman növləri geniş yayılıb.

Respublikamızın iqtisadiyyatının bütün sahələrində müşahidə olunan dinamik inkişaf, ölkə rəhbərliyinin uğurla həyata keçirdiyi daxili və xarici siyasət, əhalinin həyat səviyyəsinin gündən-günə yüksəlməsi, maddi rifah halının yaxşılaşdırılması, sığorta bazarının inkişafı və eyni zamanda rayon əhalisinin sosial müdafiəsinə istiqamətlənən sığorta təminatının güclənməsi üçün əlverişli şərait yaratmışdır. Bu sahədə qəbul edilmiş qanunun tətbiqi və əlverişli iqtisadi mühit Azərbaycanın bütün rayonlarında sığorta işinin beynəlxalq standartlara uyğun təşkil edilməsinə, əhalinin sığorta təminatının yaxşılaşdırılmasına imkan verir. Bu imkanlardan səmərəli istifadə etməklə, Dövlət Sığorta Şirkətinin Ağcabədi rayon filialı sığorta işini inkişaf etdirmək və əhalinin sığorta marağını artırmaq istiqamətində fəaliyyət göstərməkdədir.

Kənd təsərrüfatı rayonu kimi tanınan Ağcabədidə suvarma drenaj şəbəkəsinin bərpası, su itkisinin qarşısının alınması və kənd təsərrüfatı bitkilərinin məhsuldarlığının artırılması məqsədi ilə 2010-cu ilin ötən müddəti ərzində Ağcabədi Suvarma Sistemləri İdarəsi tərəfindən əsaslı tədbirlər həyata keçirilmişdir. "Azərbaycan Respublikasında meşələrin bərpası və artırılmasına dair Milli Proqram"ın icrası ilə əlaqədar Ağcabədi Meşə Mühafizəsi və Bərpası Müəssisəsi üzrə 2010-cu ilin 9 ayında 41 hektar sahədə yeni meşə əkinləri salınmışdır. Rayonda aparılan yaşıllaşdırma işində müəssisənin kollektivi fəal iştirak etmiş, küçələrdə qəsəbə və kəndlərin yaşıllaşdırılması üçün 9 ayda 4 min ədəd ting yetişdirib vermişdir.

2010-cu ilin ötən müddəti ərzində Ağcabədi Yüksək Gərginlikli Elektrik Şəbəkəsində hava xəttinin, yarımstansiyaların təmir qrafikinə əsasən bir sıra təmir və istismar işləri də yerinə yetirilmişdir.

Vətəndaşların problemləri ilə yaxından tanış olmaq, onların həlli istiqamətində konkret addımlar atmaq məqsədilə rayon icra hakimiyyəti başçısının müvafiq sərəncamı ilə təsdiq edilmiş qrafikə uyğun olaraq rayon icra hakimiyyyəti başçısı aparatında hər həftənin 5-ci günləri və ayda 4 dəfə olmaqla həftənin müəyyən edilmiş günlərində yerlərdə qəbullar keçirilir, vətəndaşların təklif, ərizə və şikayətlərinə qanunamüvafiq qaydada baxılması, onları narahat edən problemlərin öyrənilməsi və həlli istiqamətlərində operativ tədbirlər görülür. Hesabat dövrü ərzində isə keçirilən səyyar qəbullar zamanı qaldırılan məsələlər əsasən yerində həll olunmuş, bəzi məsələlər ilə əlaqədar isə lazımi hüquqi izahat işi aparılmış, düzgün istiqamət verilmişdir.

Ağcabədililər həmişə olduğu kimi, bu gün də əsası ümummilli lider Heydər Əliyev tərəfindən qoyulmuş və Prezident İlham Əliyev tərəfindən uğurla davam etdirilən inkişaf strategiyasını, daxili və xarici siyasəti tam dəstəkləyirlər.

Lazım QULİYEV

Azərbaycan.- 2010.- 24 noyabr.- S. 6.