Qədim Gəncə ərazisində aparılan arxeoloji qazıntılar yeni faktlar üzə çıxarır

AMEA Arxeologiya və Etnoqrafiya İnstitutunun əməkdaşları qədim Gəncənin xarabalıqlarında qazıntılar apararkən burada şəhərin antik dövrünə aid xeyli bəzək məmulatları və məişət əşyaları aşkar etmişlər.

Qazıntı işləri zamanı üzə çıxan faktlar buranın ən qədim insan məskəni olduğunu sübut edir. Maral buynuzu formasında bəzək əşyaları, üçayaqlı qablar, antik çıraqlar, küp və xeyli sayda saxsı qablar qədim Gəncənin tarixi haqqında tutarlı fikir söyləməyə əsas verir. Ərazidə aparılan arxeoloji qazıntılar zamanı antik Gəncənin yerləşdiyi ərazi də aşkar edilmişdir. Müəyyənləşdirilmişdir ki, qədim şəhər İmamzadə kompleksindən indiki şəhərə tərəf Gəncə çayının sağ sahilində yerləşmişdir.

İnstitutun şöbə müdiri, arxeoloji ekspedisiyanın rəhbəri, tarix elmləri doktoru Arif Məmmədov demişdir ki, ərazidən tapılan 16 sikkə Makedoniyalı İsgəndərin adına kəsilmiş pulların oxşarıdır. Bu maddi sübutlar qədim Gəncənin antik dövrdə mövcud olduğunu bir daha təsdiqləyir.

Qeyd etmək lazımdır ki, ərazidən tapılan maddi-mədəniyyət nümunələri əsasən torpağın üst təbəqəsinin materiallarıdır və əldə edilən hər bir əşya tədqiqat üçün ekspertizaya təqdim olunur.

AzərTAc

Azərbaycan.- 2010.- 24 noyabr.- S. 6.