Yeni iş yerlərinin əksəriyyəti qeyri-neft sektorunda açılıb

Bu ilin yanvar-sentyabr ayları ərzində Azərbaycanda 55983 yeni iş yeri açılıb. Onlardan 41032-si daimi iş yeridir.

Dövlət Statistika Komitəsindən aldığımız bu məlumatda daha sonra bildirilir ki, 2009-cu il yanvarın 1-dən cari il oktyabrın 1-dək ölkədə 129596, o cümlədən 95547 daimi iş yeri açılıb. Daimi iş yerlərinin 13,7 faizi yeni, 22,2 faizi mövcud, 0,8 faizi fəaliyyətini bərpa etmiş müəssisə və təşkilatlarda, 63,3 faizi isə fiziki şəxslər tərəfindən yaradılıb.

Yeni iş yerlərinin 77,1 faizi regionların payına düşüb. Belə ki, onların 19,1 faizi Aran, 13,6 faizi Gəncə-Qazax, 7,2 faizi Quba-Xaçmaz, 7 faizi Lənkəran, 6 faizi Şəki-Zaqatala, 5,1 faizi Naxçıvan iqtisadi rayonlarında açılıb. Cari ilin doqquz ayında iş yerlərinin 90,6 faizi qeyri-dövlət sektorunda, mütləq əksəriyyəti isə qeyri-neft sektorunda yaradılıb.

Azərbaycan.- 2010.- 19 noyabr.- S. 6.