Bakıda Azərbaycan-Polşa biznes forumu keçirilmişdir

Noyabrın 24-də Bakıda Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan-Polşa biznes forumu keçirilmişdir. Biznes forumu Polşanın Baş nazirinin müavini, iqtisadiyyat naziri Valdemar Pavlyakın Azərbaycana səfəri çərçivəsində təşkil olunmuşdur.

Tədbirdə hər iki ölkəni təmsil edən rəsmi şəxslərlə yanaşı, səhiyyə, maliyyə, turizm, təhsil, sənaye, kənd təsərrüfatı, tikinti, bərpa olunan enerji və sair sahələrdə fəaliyyət göstərən 30-a yaxın iş adamı iştirak etmişdir.

Forumun açılışında Azərbaycanın sənaye və energetika naziri Natiq Əliyev və Valdemar Pavlyak ölkələrimiz arasında mövcud olan və tarixi köklərə söykənən siyasi və iqtisadi əlaqələrin intensivliyindən, inkişaf dinamikasından məmnunluqlarını ifadə etmişlər. Qeyd olunmuşdur ki, son bir ildə Azərbaycandan Polşaya ixrac edilən məhsulların həcmi iki dəfə artmışdır.

İqtisadi inkişaf nazirinin müavini Niyazi Səfərov tədbirin keçirilməsinin əsas məqsədinin mövcud iqtisadi əlaqələrin daha da inkişaf etdirilməsi, bu zəmində iş adamları arasında əməkdaşlığın genişləndirilməsinə dəstək olduğunu bildirmişdir.

Məlumat verilmişdir ki, hazırda ölkələr arasında 93 milyon ABŞ dolları məbləğində ticarət dövriyyəsi vardır. Polşanın iqtisadiyyat nazirinin müavini Dariuş Boqdan bu rəqəmin hazırkı potensialı əks etdirmədiyini vurğulamışdır.

Daha sonra hər iki ölkə barədə film nümayiş etdirilmiş, tarixi inkişaf yolları və iqtisadi göstəricilər barədə təqdimatlar olmuşdur.

Biznes forumu çərçivəsində Azərbaycanda İxracın və İnvestisiyaların Təşviqi Fondu (AZPROMO) ilə Polşanın İnformasiya və Xarici İnvestisiya Agentliyi (PALiLZ) və Azərbaycan Sahibkarlar (İşəgötürənlər) Təşkilatları Milli Konfederasiyası ilə Polşa İşəgötürənlər Assosiasiyası arasında qarşılıqlı əməkdaşlıq haqqında anlaşma memorandumları imzalanmışdır.

AzərTAc

Azərbaycan.- 2010.- 25 noyabr.- S.3.