ADU-da "Mədəniyyətlərarası dialoq: linqvistik, pedaqoji və ədəbi aspektlər" mövzusunda beynəlxalq elmi konfrans işə başlamışdır

Dünən Azərbaycan Dillər Universitetində Təhsil Nazirliyi, "Azəriqazbank", "Azərsun" Şirkətlər Qrupu və "British Council"un dəstəyi ilə "Mədəniyyətlərarası dialoq: linqvistik, pedaqoji və ədəbi aspektlər" mövzusunda beynəlxalq elmi konfrans işə başlamışdır.

Tədbir iştirakçıları əvvəlcə Heydər Əliyev Sarayının qarşısındakı parka gələrək, ümummilli liderin abidəsi önünə gül dəstələri qoymuşlar.

Konfransda ABŞ, İtaliya, Fransa, Almaniya, Koreya Respublikası, Türkiyə, Bolqarıstan, Gürcüstan və digər ölkələri təmsil edən alimlər iştirak edirlər.

Universitetin rektoru, professor Səməd Seyidov çıxış edərək bildirmişdir ki, dünyanın 13 ölkəsindən alimlərin iştirak etdiyi konfrans Azərbaycanın elmi potensialının daha da genişləndirilməsi, ölkəmizin elm adamları ilə xarici ölkələrin elm adamlarının qarşılıqlı fikir mübadilələri, eləcə də Azərbaycanın beynəlxalq aləmdə daha yaxından tanıdılmasına geniş imkan yaradacaqdır. Ölkəmizə gələn nüfuzlu alimlər Azərbaycan həqiqətləri barədə xarici ölkələrin ali təhsil müəssisələrində məlumat verəcəklər.

Təhsil nazirinin müavini İradə Hüseynova və professor Rəbiyyət Aslanova konfransın işinə uğurlar arzulamışlar. Bildirilmişdir ki, əsası ümummilli lider Heydər Əliyev tərəfindən qoyulan müstəqil Azərbaycanın sosial-iqtisadi, mədəni inkişaf strategiyası Prezident İlham Əliyev tərəfindən uğurla davam etdirilir. Ölkəmizdə aparılan genişmiqyaslı islahatlar, uğurlu daxili və xarici siyasət bütün sahələrdə olduğu kimi, ali təhsilin inkişafında da əlverişli şərait yaradır.

Professorlar Ayşə Nur Tekmen (Türkiyə), Hans Verner Huneke (Almaniya), Dae Sunq Kim (Koreya), Massimo Bianki (İtaliya), Slaheddin Dçixa (Fransa), İona Sarıyeva (Bolqarıstan), Vasumati Badrinatan (Hindistan) və akademik Boris İmnadze (Gürcüstan) Azərbaycanda olduqlarından məmnunluqlarını ifadə etmişlər.

Sonra Hartford Universitetinin (ABŞ) professoru Hampri Tonkinin "Ünsiyyət və linqvistik bərabərliyin ziddiyyəti", ADU-nun professoru Gülnar Hüseynzadənin "İngilis dilinin xarici dil kimi tədrisində beynəlxalq təlim", Antverpen Universitetinin (Belçika) professoru Cef Verşurenin "İctimai sahədə praqmatizmin xüsusiyyəti" mövzularında məruzələri dinlənilmişdir.

Konfrans işini "Mədəniyyətlərarası dialoq xalqlar və insanlar arasında qarşılıqlı anlaşma vasitəsi kimi", "Dil mədəniyyətlərarası ünsiyyətin əsas amili kimi", "Ədəbiyyat müasir kulturoloji paradiqmalar kontekstində", "Mədəniyyətlərarası dialoqun dil öyrənməkdə rolu" bölmələrində davam etdirmişdir.

Elmi konfrans noyabrın 26-da başa çatacaqdır.

AzərTAc

Azərbaycan.-2010.- 26 noyabr.- S.7.