Azərbaycan Milli Elmlər Akademiyası ilə Fransa Milli Araşdırmalar Mərkəzi arasında müqavilə bağlanmışdır

Azərbaycan Milli Elmlər Akademiyasının (AMEA) prezidenti Mahmud Kərimov Fransaya səfəri çərçivəsində noyabrın 24-də Parisdə YUNESKO-nun mənzil-qərargahında bu qurum ilə AMEA arasında Azərbaycanda elmin inkişafı sahəsində həyata keçirilən islahatlara Yaponiya hökumətinin yardımı ilə bağlı müqavilə imzalamışdır. Səfər çərçivəsində daha bir müqavilə Fransa Milli Araşdırmalar Mərkəzi ilə bağlanmışdır.

Akademiyanın prezidenti M.Kərimov bununla əlaqədar verdiyi müsahibəsində demişdir: "2007-ci ildə Azərbaycan Respublikasının Prezidenti İlham Əliyev Fransaya dövlət səfəri zamanı bir çox sahələrlə yanaşı, Azərbaycan Milli Elmlər Akademiyası ilə Fransa Milli Araşdırmalar Mərkəzi (FMAM) arasında əməkdaşlığa dair saziş imzalanmışdır. Həmin dövrdən etibarən AMEA ilə FMAM Azərbaycanda bir sıra layihələri müştərək şəkildə yerinə yetirmişlər. Fransaya bu səfərim zamanı FMAM idarə heyətində qurumun direktoru ilə yeni layihələrin yerinə yetirilməsi sahəsində əməkdaşlığa dair müqavilə imzalamışıq. Bu, əsasən ölkəmizdə mühüm əhəmiyyət kəsb edən geofizika və arxeoloji sahələri əhatə edir. Müqaviləyə əsasən, həmin layihələri Fransa tərəfi maliyyələşdirəcəkdir.

İstər YUNESKO-da, istərsə də Fransa Milli Araşdırmalar Mərkəzində bağlanmış müqavilələr Azərbaycanda elmin inkişafı, milli kadrların yetişdirilməsi ilə bağlı dövlət proqramının müvəffəqiyyətlə yerinə yetirilməsində böyük rol oynayacaqdır".

Əsgər ƏLİYEV

Azərbaycan.- 2010.- 27 noyabr.- S. 4.