"Azərbaycanda Torpaq Kadastr Sisteminin təkmilləşdirilməsi" layihəsi ilə bağlı tədbir keçirilmişdir

Dövlət Torpaq və Xəritəçəkmə Komitəsində Koreya Respublikasının xarici işlər və ticarət nazirlikləri ilə birgə həyata keçirilmiş "Azərbaycanda Torpaq Kadastr Sisteminin təkmilləşdirilməsi" layihəsinə dair tədbir keçirilmişdir.

Tədbirdə Koreyanın Azərbaycandakı səfirliyinin nümayəndəsi Jonq Jonq Min, Koreya Kadastr Agentliyi direktorunun müavini Quak Jonq Van, Koreya Beynəlxalq Əməkdaşlıq Agentliyinin (KOİCA) nümayəndəsi Kim Yonq U və Koreya Kadastr Agentliyinin əməkdaşı Sonq Yonq Jun iştirak etmişlər.

DTXK-nın mətbuat xidmətindən AzərTAc-a bildirmişlər ki, layihə çərçivəsində görülmüş işlər barədə qurumun sədri akademik Qərib Məmmədov məlumat vermişdir. O demişdir ki, nəzərdə tutulan vaxtdan 1 ay əvvəl başa çatan layihədə Azərbaycanda şəhər kadastrı nümunəsində torpaq kadastrı sisteminin təkmilləşdirilməsi məqsədi ilə komitənin Dövlət Torpaq Kadastrı və Monitorinqi Elm-İstehsalat Mərkəzi ilə Xəzər rayonunun Zirə qəsəbəsi ərazisində 1000 ha (10 kv.km) sahədə birgə pilot şəhər kadastrı layihəsinin həyata keçirilməsi və müasir kadastrın yaradılması, habelə torpaq kadastrı üçün münasib metodologiyanın öyrənilməsi və tətbiqi, işçilərin bilik potensialının gücləndirilməsinin dəstəklənməsi nəzərdə tutulmuşdur. Layihə Koreyanın Beynəlxalq Əməkdaşlıq Agentliyi (KOİCA) tərəfindən ayrılmış 1 milyon 500 min ABŞ dolları məbləğində qrant hesabına həyata keçirilmişdir. DTXK-nın Dövlət Torpaq Kadastrı və Monitorinqi Elm-İstehsalat Mərkəzi Koreyanın Kadastr Korporasiyası Təşkilatının əməkdaşları ilə birgə Xəzər rayonunun Zirə qəsəbəsi ərazisində seçilmiş 1000 ha pilot sahədə torpaq kadastr işlərini uğurla həyata keçirmişlər. Layihənin icrası ilə bağlı artıq müsbət nəticələr əldə olunmuşdur. Belə ki, layihə çərçivəsində DTXK Aparatının və Dövlət Torpaq Kadastrı və Monitorinqi Elm-İstehsalat Mərkəzinin 20 nəfər mütəxəssisi ötən ilin noyabrında Koreya Respublikasına ezam olunmuş, təcrübə mübadilələri apararaq torpaq kadastr işləri ilə yaxından tanış olmuşlar. Layihə çərçivəsində müasir geodeziya ölçmə, çap avadanlığı alınmışdır.

Pilot sahədə bu avadanlıq vasitəsilə torpaq kadastr işləri üçün mərzçəkmə işləri yerinə yetirilmiş və çölölçmə məlumatları dərhal rəqəmli kadastr xəritələrinə inteqrasiya olunmuşdur. Dövlət Torpaq Kadastrı və Monitorinqi Elm-İstehsalat Mərkəzində dörd terabayt həcmində müasir server qurulmuşdur. Komitə sədri vurğulamışdır ki, torpaq kadastr sisteminin daha da təkmilləşdirilməsi məqsədilə layihənin Xəzər rayonunun bütün ərazisində keçirilməsi üçün Koreya tərəfi ilə danışıqlar aparılmış və bu barədə ilkin razılıq əldə olunmuşdur.

Qonaqlar bu cür layihələrin gələcəkdə də davam etdiriləcəyinə ümid bəslədiklərini bildirmişlər.

Azərbaycan.- 2010.- 27 noyabr.- S. 4.