Ermənistana növbəti diplomatik zərbə

Bu təcavüzkar dövlət yenə də NATO-nun zirvə toplantısında fiaskoya uğradı

Dövlət müstəqilliyinə qovuşduqdan sonra çoxqütblü inkişaf modelləri sırasından Qərb dəyərlərini seçən Azərbaycan bir sıra aparıcı beynəlxalq təşkilatlarla yanaşı, NATO ilə əməkdaşlığa da xüsusi önəm vermişdir. 1994-cü ildən təşkilatın "Sülh naminə tərəfdaşlıq" proqramında yaxından iştirak edən Azərbaycan bunun sayəsində NATO hərbi strukturları ilə əməkdaşlıq etmək, birgə təlimlər keçirmək, hərbi kadrların hazırlanmasında blokun təcrübəsindən bəhrələnmək və digər imkanlar qazanmışdır.

Bu əməkdaşlıq strateji məzmun kəsb etməklə regionun mühüm enerji layihələrinin təhlükəsiz gerçəkləşdirilməsinə də əsaslı təminat yaratmışdır. Antiterror koalisiyasının üzvü olan Azərbaycanın ordu birləşmələri NATO qoşunlarının tərkibində Kosovoda, Əfqanıstanda və İraqda həyata keçirilən sülhyaratma missiyasında yaxından iştirak etmişlər. Bu o deməkdir ki, təşkilat münaqişə ocaqlarının söndürülməsində, mübahisələrin çözülməsində, bir sözlə, qlobal planda sülh və sabitliyin təminatında Azərbaycanın potensialını yüksək qiymətləndirir.

Xarici siyasətdə Avratlantik məkana inteqrasiya kursunu əsas götürən Azərbaycanın NATO ilə uğurlu əməkdaşlığı hərbi quruculuq məsələlərində də az əhəmiyyət daşımır. Azərbaycan ordusunda həyata keçirilən islahatlarda, hərbi hissələrin komplektləşdirilməsində NATO standartları əsas götürülür. Ölkəmizə səfər edən NATO rəsmiləri də keçirdikləri görüşlərdə Azərbaycan ordusunda aparılan islahatlardan razılıqlarını dəfələrlə bəyan ediblər. Bu, həm də Azərbaycan-NATO əməkdaşlığının perspektivləri barədə daha nikbin düşünməyə əsas verir.

Ulu öndər Heydər Əliyev tərəfindən Azərbaycan ordusunda ötən əsrin 90-cı illərinin ortalarından həyata keçirilən islahatların əsas hədəflərindən biri hərbi təhsilin səviyyəsinin yüksəldilməsi idi. Təqdirəlayiq haldır ki, NATO ilə əməkdaşlığa böyük önəm verən, həyata keçirilən islahatlarda bu təşkilatın standartlarını tətbiq edən Azərbaycanın hərbi təhsil müəssisələri də Şimali Atlantika Alyansının fəaliyyət meyarlarını əsas götürür. Azərbaycan Silahlı Qüvvələrinin təhsil sistemi NATO standartlarına uyğun təkmilləşir. Xüsusən NATO üzvü olan dost və qardaş Türkiyə hərbi təhsil məsələlərində Azərbaycana öz köməyini əsirgəmir. Azərbaycan ordusunun zabitləri ölkəmizin NATO ilə əlaqələri çərçivəsində təşkilatın üzvü olan ölkələrin hərbi məktəblərində təhsil alır,

NATO-nun təşkilatçılığı ilə ixtisasartırma kurslarında, hərbi təlimlərdə iştirak edirlər. Ordumuzun qüdrətlənməsi Ermənistan-Azərbaycan, Dağlıq Qarabağ münaqişəsinin həlli məsələsində ölkəmizə mühüm üstünlüklər verir və bu, gec-tez Azərbaycanın qələbəsini təmin edəcəkdir.

Azərbaycan Prezidenti İlham Əliyevin hələ 2004-cü ilin mayında Brüsselə səfəri zamanı NATO-nun Baş mənzil-qərargahında keçirdiyi müxtəlif səviyyəli görüşlər ikitərəfli münasibətlərin daha aktiv fazaya keçməsini təmin etmişdir. Səfər zamanı dövlət başçısının Azərbaycan adından "Fərdi əməkdaşlıq üzrə Əməliyyat Planı"nı NATO rəhbərliyinə təqdim etməsi böyük rezonans doğuran siyasi hadisə kimi dəyərləndirilmişdir. Buna adekvat olaraq NATO rəhbərliyinin də Azərbaycana diqqəti artırmaq, ölkəmizə hərbi-texniki yardımları genişləndirmək istəyi qabarıq görünməkdədir. Azərbaycanın beynəlxalq əməkdaşlığında NATO-nun yeri və rolu getdikcə güclənir və bu, ikitərəfli əməkdaşlığın yüksələn xətlə inkişafında da öz təsdiqini tapır. Bu əməkdaşlıq qlobal planda sülh və sabitliyə xidmət etməklə regionun nəhəng enerji layihələrinin təhlükəsiz gerçəkləşdirilməsinə əsaslı təminat yaratmışdır. Xəzərin enerji resurslarının dinc şəraitdə mənimsənilməsi, habelə Bakı-Tbilisi-Ceyhan neft kəmərinin təhlükəsizliyinin təmin edilməsi baxımından Azərbaycan-NATO əməkdaşlığının mühüm əhəmiyyəti var. Azərbaycan ordusunun NATO standartlarına uyğunlaşdırılması istiqamətində atılan addımlar sistemli xarakter daşımaqla bu gün də davam etdirilir.

NATO özünün təfərdaş ölkəsi kimi Azərbaycanın ərazi bütövlüyünün bərpasında, Ermənistan-Azərbaycan, Dağlıq Qarabağ münaqişəsinin mümkün qədər tez həllində maraqlıdır. Azərbaycanın ərazi bütövlüyü, suverenliyi məsələsi NATO-nun 2006-cı, 2008-ci illərdə keçirilən zirvə toplantılarında ifadə olunmuşdur. Ölkəmizin ərazi bütövlüyü məsələsi NATO-nun ötən il keçirilən zirvə sammitinin yekun bəyanatının 58-ci maddəsində də öz əksini tapmışdır.

Xatırladaq ki, noyabrın 20-də Portuqaliyanın paytaxtı Lissabon şəhərində NATO-nun zirvə toplantısı və bu çərçivədə Beynəlxalq Təhlükəsizliyə Yardım Qüvvələrinə (İSAF) töhfə verən ölkələrin dövlət və hökumət başçılarının iclası keçirilmişdir. Azərbaycan Prezidenti İlham Əliyev iclasda çıxış edərək Azərbaycanın Şimali Atlantika Alyansı ilə əməkdaşlığının inkişaf etdiyini bildirmişdi. Ölkəmizin NATO-nun "Sülh naminə tərəfdaşlıq" Proqramında və Fərdi əməkdaşlıq üzrə Əməliyyat Planında da fəal iştirak etdiyini qeyd etmişdir.

NATO-nun zirvə toplantısı və bu çərçivədə Beynəlxalq Təhlükəsizliyə Yardım Qüvvələrinə töhfə verən dövlət və hökumət başçılarının iclasının nəticələri Ermənistan üçün ağır olmuşdur. Belə ki, dünyanın çox nüfuzlu hərbi-siyasi təşkilatı olan

NATO ölkəmizin ərazi bütövlüyünü birmənalı şəkildə dəstəkləmişdir. Xatırladaq ki, NATO əvvəllər də qəbul etdiyi sənədlərdə eyni mövqe nümayiş etdirmişdi. Ermənistan tərəfi bir müddət əvvəl Strasburq-Kehl sammitində təşkilata üzv ölkələrin Azərbaycanın ərazi bütövlüyünü dəstəkləməməsi üçün uğursuz cəhdlər etmişdi. Cari ilin mayında Ermənistan prezidenti Serj Sarkisyan Brüsselə - NATO-nun qərargahına səfəri zamanı bu məsələ diqqət mərkəzində olmuşdur. Ermənistan prezidenti təşkilatın Baş katibi Anders Foq Rasmussenlə birgə keçirdiyi mətbuat konfransında NATO-nun Azərbaycanın ərazi bütövlüyünə dəstək verməməsini istəmişdi. İşğalçı Ermənistan tərəfinin bütün cəhdlərinin əbəs olduğu NATO-nun son zirvə toplantısında bir daha təsdiqləndi. Təşkilatın yekun bəyannaməsində Azərbaycanın ərazi bütövlüyü və suverenliyi növbəti dəfə dəstəkləndi.

Bəyanatda ərazi bütövlüyü məsələsi ilə bağlı qeyd olunur ki, Şimal Alyansı Gürcüstanın, Azərbaycanın və Moldovanın ərazi bütövlüyünü, müstəqilliyini və suverenliyini bir daha tanıdığını vurğulayaraq hər bir münaqişənin prinsipini nəzərə almaqla bu regional münaqişələrin sülh yolu ilə həlli istiqamətində səyləri dəstəkləyəcəyini bəyan edir. Bu bəyanatda Azərbaycanın da ərazi bütövlüyü tanındığı üçün Ermənistan, ümumiyyətlə, sənədin belə bir şəkildə tərtib edilməsini istəməyib. Lakin bəyanatın mətni əvvəlcədən üzv ölkələrlə razılaşdırılıb və Ermənistanın bu istəyi nəzərə alınmayıb.

NATO-nun zirvə toplantısında qəbul olunan yekun bəyanatda Azərbaycanın ərazi bütövlüyünün, suverenliyinin bir daha ifadə olunması haqq işimizin nüfuzlu beynəlxalq qurumlar tərəfindən müdafiə edildiyini növbəti dəfə sübuta yetirdi.

Elnur HACIALIYEV

Azərbaycan.- 2010.- 27 noyabr.- S. 7.