Azad sahibkarlığın inkişafında yeni mərhələ

Son yeddi ildə Azərbaycan Prezidenti İlham Əliyev bir daha sübut etdi ki, sahibkarların güvənc yeridir

Ötən yeddi ildə iqtisadiyyatın liberallaşdırılması, haqsız rəqabətin aradan qaldırılması, özəl sektorun dəstəklənməsi, sahibkarlara güzəştli kreditlərin verilməsi sahəsində ciddi addımlar atılıb. Prezident İlham Əliyevin bu illərdə imzaladığı "Sahibkarlığa dövlət maliyyə dəstəyinin göstərilməsi sahəsində əlavə tədbirlər haqqında", "Azərbaycan Respublikası Sahibkarlığa Kömək Milli Fondunun vəsaitinin istifadəsi qaydalarının təkmilləşdirilməsi haqqında", "Azərbaycan Respublikasında sahibkarlığın inkişafı ilə bağlı bəzi tədbirlər haqqında" və digər fərmanları, sərəncamları, dövlət proqramları sahibkarlığın inkişafına güclü təkan vermiş, bu sahədə yeni mərhələ yaratmışdır.

Respublikamızda sahibkarlığın inkişafı mühüm dövlət siyasətinə çevrilib. Ölkəmizin uğurlarında sahibkarların rolunu xüsusi dəyərləndirən Prezident İlham Əliyev onlara süni problemlərin yaradılmasının yolverilməzliyini qətiyyətlə bəyan edib. Bakı Biznes Mərkəzində Azərbaycan Respublikası regionlarının sosial-iqtisadi inkişafı Dövlət Proqramının icrasının yekunları ilə bağlı müşavirə bir daha sübut etdi ki, ölkəmizdə sahibkarlığın inkişafına geniş imkanlar yaradılıb. Onlara mane olan yersiz yoxlamalar son dərəcə məhdudlaşdırılıb. Sahibkarları gərəksiz müdaxilələrdən himayə edən dövlət başçısı həmin müşavirədə demişdir: "Dövlət strukturları yersiz yoxlamaları dayandırmalıdırlar. Buna ehtiyac yoxdur. Artıq Azərbaycanda iqtisadi islahatlar sahəsində bütün işlər görülüb. Biz şəffaflığa nail ola bilmişik. Şəffaflıq bizim üçün, iqtisadi inkişaf üçün və ümumiyyətlə, ölkəmizin inkişafı üçün mühüm əhəmiyyət daşıyır".

Əlbəttə, dövlət başçısının uğurlu siyasətinə, cəsarətli mövqeyinə güvənib biz iş adamları da yeni qlobal layihələrin həyata keçirilməsinə təşəbbüskarlıq göstərir, Azərbaycanda sahibkarlığın inkişafı üçün münbit şəraitin olduğuna inanırıq. İnanırıq ki, ölkəmizdə həm şəffaf biznes mühiti var, həm də fəaliyyətimizi tənzimləyən güclü qanunvericilik bazası yaradılıb. Ölkəmizdə hər bir işgüzar insan, sağlam təfəkkürə və məntiqə güvənən iri və xırda sahibkarlar perspektivli iş strukturu yaradırlar, fəaliyyətlərini daha da genişləndirə bilirlər. Hər kəs məşğul olduğu sahədə geniş imkanlardan qədərincə, ən başlıcası isə şəffaflıq prinsiplərini qorumaqla faydalanır.

Bizim üçün ən böyük təsəlli, gələcəyə inam üçün etibarlı zəmanət budur ki, ümummilli liderin layiqli siyasi davamçısı - Prezident İlham Əliyev yeddi illik fəaliyyəti ilə hər bir vətəndaşın Prezidenti olduğunu sübut və təsdiq etdi. Özünün tələbkarlığı, siyasi peşəkarlığı, çevik diplomatik gedişləri ilə idarəçilik sahəsində yeni mərhələ yaratdı, ölkəmizin dinamik inkişafı üçün düzgün prinsiplər müəyyənləşdirdi. Uğurlu iqtisadi siyasətin nəticəsidir ki, dünyanı bürüyən qlobal böhran Azərbaycanın uğurlarını səngitmədi. Əksinə, ölkəmiz regionun əsas iqtisadi əməkdaşlıq mərkəzinə çevrildi. Prezident İlham Əliyev dəfələrlə bəyan edib ki, "bu gün Azərbaycanın iştirakı olmadan Cənubi Qafqazda heç bir ciddi layihə reallaşa bilməz".

İş adamı olaraq son illər Azərbaycanda müşahidə olunan yüksəlişi, milli sahibkarlığa göstərilən diqqət və qayğını vətəndaş təəssübkeşliyi ilə dəyərləndirirəm. Bir faktı qeyd edim ki, uğurlu iqtisadi siyasət nəticəsində özəl sektorun ümumi daxili məhsulda payı 85 faizə yüksəlib. Azərbaycan Prezidenti bu sahəyə dəstəyini artırmaqla sahibkarların güvənc və kömək yeri, himayədarı olduğunu bir daha təsdiqlədi. Hökumət iş adamlarının fəaliyyətinə yaxından kömək məqsədilə onlara ayrılan güzəştli kreditlərin miqdarını xeyli artırdı. Təkcə bu il Sahibkarlığa Kömək Milli Fondunun vəsaiti hesabına 197 sahibkarlıq subyektinə 19,1 milyon manat güzəştli kredit verilib.

Tikinti sektorunda çalışan inşaatçı sahibkar kimi qürurla deyə bilərəm ki, son yeddi ildə Bakıda həyata keçirilən yeni tikinti layihələrində milli üsluba üstünlük verilməsi, abadlıq-quruculuq işlərinin keyfiyyətcə yeniləşməsi, müasirliyin qədim Şərq memarlıq üsulu ilə uzlaşması dövlət başçısının bu sahəyə daha çox maraq göstərməsi ilə bağlıdır. Bu gün Azərbaycanda sahibkar ondan tələb olunan vəzifəni həm müstəqil təhlil edə bilir, həm də hüquqi məsuliyyətini tam dərk edir. Ona görə də ayrı-ayrı vətəndaşlarla bağlanan müqavilənin şərtlərini və tələblərini, cəmiyyət qarşısındakı mənəvi məsuliyyəti heç vaxt unutmur. Yaxşı bilir ki, hər bir iş adamı sosial tədbirlərin adi iştirakçısı yox, əsl təşkilatçısından biri olmalıdır. Elə Azərbaycan Prezidenti hər birimizdən eyni məsuliyyətlə, tələbkarlıqla, işgüzarlıqla çalışmağı tələb edir. Heç də təsadüfi deyil ki, dövlət başçısı cənab İlham Əliyev iş adamlarına müraciətlə demişdir: "İş adamları, dövlətin bütün yerli icra orqanları - hamımız birgə işləməliyik. Əlbəttə ki, təbiidir, - bütün ölkələrdə belədir, - iş adamları öz biznesləri haqqında düşünməli, biznesi inkişaf etdirməlidirlər. Eyni zamanda, imkan olanda çətin vəziyyətdə yaşayanlara da əl uzatmalıdırlar. Mən belə biznesi, iş adamlarını təqdir edirəm və sizi də bu işlərə çağırıram. Sizə deyə bilərəm ki, mən bundan sonra da ölkədə biznesin inkişafı üçün əlimdən gələni edəcək və bütün lazımi tədbirləri görəcəyəm".

Əlbəttə, bütün bunlar ölkədə sahibkarlıq və investisiya mühitinin tənzimlənməsinə, bu sahənin inkişafına təkan verəcək qanunçuluq bazasının güclənməsinə kömək edir, əhəmiyyətli dəyişikliklər yaradır. Təməli ümummilli lider Heydər Əliyev tərəfindən qoyulmuş və ciddi elmi əsaslara söykənən belə iqtisadi siyasət son illərdə onun layiqli siyasi varisi - Azərbaycan Prezidenti İlham Əliyev tərəfindən uğurla davam etdirilir və bütün sahələrdə yüksək səmərə verir. Ayrı-ayrı sahələrdə düzgün balanslaşdırılmış və həyata keçirilmiş islahatlar bir daha sübut etdi ki, cənab İlham Əliyev cəmiyyətdə böyük nüfuz qazanmış, ölkədə alternativsiz liderə çevrilmişdir. Onun imzaladığı fərman və sərəncamlar, qəbul olunmuş çevik qərarlar ölkənin potensial inkişafına töhfələr vermiş, qarşıda düzgün və zəruri vəzifələr müəyyənləşdirmişdir.

Bu gün Azərbaycanda özəl sektor sərbəst bazar iqtisadiyyatının əsas aparıcı qüvvəsinə çevrilib. Sərbəst bazar münasibətlərinin güzəştsiz tərəfdarı kimi Azərbaycan Prezidenti İlham Əliyev sahibkarlığın inkişafını - kiçik və orta biznes şəbəkəsinin genişlənməsini təmin etmək üçün ardıcıl tədbirlər görür. Güzəştli kreditlərin ayrılması, sahibkarların iş əmsalını yüksəltmək üçün yersiz müdaxilələrin qarşısının alınması və digər problemlərin həlli yolları düzgün araşdırılır, milli iqtisadiyyatın dinamik inkişafına hərtərəfli zəmin yaradılır.

Hələ 2005-ci il fevral ayının 11-də dövlət proqramının bir illiyinə həsr olunmuş təntənəli mərasimdə Azərbaycan Prezidenti İlham Əliyev ölkə tarixində ilk dəfə olaraq bir qrup iş adamını "Tərəqqi" medalı və digər dövlət təltifləri ilə mükafatlandırmışdır.

Azad sahibkarlığın inkişafına yönəldilmiş sabitlik, tərəqqi və demokratikləşmə prosesi ildən-ilə daha da güclənir, davamlı inkişafa çevrilir. Halal yolla maddi imkanlarını artıran hər bir insan üçün maneəsiz və sərhədsiz biznes mühiti yaradılıb, özəl sektorun imkanları genişləndirilib. Bunun nəticəsidir ki, son üç ildə özəl sektorun ümumi daxili məhsulda payı 73 faizdən 81 faizə yüksəlmişdir.

Azərbaycan iqtisadiyyatının dinamikası bazar mexanizminin hərəkətverici qüvvəsi hesab edilən sahibkarlığın inkişafı ilə uzlaşdırılır. Daha doğrusu, sahibkarlara işgüzar şərait yaratmadan sosial xarakterli ciddi problemlərin həllinə nail olmaq çətindir. Təcrübə sübut edir ki, infrastrukturun yeniləşməsi, iş yerlərinin açılması, rəqabət qabiliyyətli məhsul istehsalının artırılması, bir sözlə, əsaslı iqtisadi islahatların aparılması ölkədə sağlam biznes mühitinin yaradılmasından daha çox asılıdır. Ona görə də sahibkarlara elə imkan yaradılmalıdır ki, onların hər biri sərbəst rəqabətə tablaşa bilsin, şəffaf biznes mühitinin formalaşmasında güclərini sınasınlar.

Ölkəmizdə biznes ənənələrinin tarixi də qədimdir. Yaranmış ənənələri varisliklə qorumaq, bu gün onu ləyaqətlə davam etdirmək bizim hər birimizin işi və vəzifəsidir. Ölkəmizin yerləşdiyi ərazi də dünya ölkələrinin sınanmış iqtisadi modelinin tətbiqinə geniş imkanlar yaradır. Şərqlə Qərbi qovuşduran əlverişli coğrafi mövqe bizim əlaqələrdə müstəsna rol oynayır.

Azad sahibkarlığın inkişafında Azərbaycan Prezidenti İlham Əliyevin rəhbərliyi ilə başlayan yeni mərhələ sahibkarlar ordusunun milli iqtisadiyyatda rolunu daha da artırdı. Sahibkarlığın və biznes mühitinin dünya bazarı ilə əlaqə meridianı daha da genişləndi. Xarici dövlətlərin rəsmi və işgüzar dairələrinin iştirakı ilə ardıcıl və ənənəvi biznes-forumlar keçirildi. Böyük Britaniyada, İtaliyada, Çində, Latviyada, Rusiyada, Türkiyədə, Yaponiyada, Almaniyada və digər xarici ölkələrdə belə tədbirlərə üstünlük verilmiş, ölkəmizin çeşidli məhsullarının dünya bazarına ixrac imkanları yaranmışdır.

Ölkədə sahibkarlarla hökumətin faydalı əməkdaşlığını yaratmaq, iş adamlarının qlobal investisiya layihələrinə cəlb olunmasını təmin etmək üçün etibarlı bazar yaradılıb. Dövlət İnvestisiya Şirkətinin yaradılmasında başlıca məqsəd ondan ibarətdir ki, özəl sektora daha çox dəstək verilsin, yardım və kömək artırılsın. Artıq investorlar tam arxayındırlar ki, onların sərmayələri dövlət səviyyəsində etibarlı təminat mexanizmi ilə qorunur.

Azərbaycanda çoxpilləli biznesə keçid prosesi də uğurla davam edir. Ona görə ki, bu prosesə mane olan hər cür bürokratik əngəllərin qarşısı qabaqlayıcı tədbirlərlə alınır, sahibkarlıq subyektlərinin çevik fəaliyyətinə geniş imkanlar yaradılır. Azərbaycan Prezidenti cənab İlham Əliyev biznesin inkişafı üçün bundan sonra da faydalı və gərəkli addımlar atacağını bildirmişdir. Bunun üçün ölkəmizdə potensial imkanlar mövcuddur. O ki qaldı ondan faydalanmaq mexanizminə, bunun üçün də geniş perspektivlər var. İş adamlarına - biznesin inkişaf dayaqlarına dəfələrlə müraciət edən Azərbaycan Prezidenti birmənalı bəyan edib ki, ölkəmizdə sağlam biznes mühitini genişləndirmək üçün heç bir məhdudiyyət yoxdur. Ona görə də bizim hər birimiz gələcəkdə də yeni layihələrin reallaşmasına ümid və inamla baxırıq, etibarlı dövlət dəstəyini hər an hiss edirik.

Süleyman BABAYEV,

"Avrositi-Holdinq" MMC- nin

icraçı direktoru

Azərbaycan.- 2010.-6 oktyabr.- S. 5.