İqtisadi islahatlar dinamik inkişafın milli modeli ilə uzlaşdırılır

Nizami rayonunda həyata keçirilən islahatlar bu meyarla aparılır

Tarixi təcrübə sübut edir ki, hər bir dövlətin inkişaf səviyyəsi uğurlu və məntiqli siyasətdən, iqtisadi proqnozların düzgün müəyyənləşdirilməsindən daha çox asılıdır. Əgər bu gün Azərbaycan qüdrətli bir dövlətə, keçid dövrünün hər cür çətinliklərini geridə qoyub inkişaf edən bir ölkəyə çevrilibsə, bunların hamısı yüksək idarəçilik məharəti ilə bağlıdır. 11 fevral 2004-cü il tarixdə Prezident İlham Əliyevin Azərbaycan Respublikası regionlarının sosial-iqtisadi inkişafına dair Dövlət Proqramını imzalaması bölgələrdə əməktutumlu və rəqabətqabiliyyətli yeni istehsal və xidmət sahələrinin istifadəyə verilməsinə, iş yerlərinin açılmasına, əhalinin həyat səviyyəsinin yüksəlməsinə ciddi təkan vermiş, mühüm uğurların qazanılmasına şərait yaratmışdır.

Artıq ölkəmizdə keçid dövrünün problemləri geridə qalıb. Bunu dünya ekspertlərinin araşdırmaları, beynəlxalq qurumların keçirdiyi monitorinqlər də sübut edir. Dövlət başçısı cənab İlham Əliyev də bu barədə demişdir: "Azərbaycan postsovet məkanında iqtisadi islahatlar və iqtisadi inkişaf baxımından birinci yerdədir. Mən hesab edirəm ki, artıq bu sahədə keçid dövrü başa çatıbdır".

Ölkəmizdə aparılan genişmiqyaslı quruculuq işləri Nizami rayonunun sosial-iqtisadi həyatında da əsaslı dəyişikliklər yaratmış, ayrı-ayrı sahələrdə dirçəlişə meyil güclənmiş, abadlıq işlərinin həcmi artmışdır. Son illərdə rayonumuzun ərazisində 1367 yeni müəssisə açılmışdır ki, bunun nəticəsində 15874 nəfər daimi iş yeri ilə təmin olunmuşdur. Təşkilati işlərin düzgün qurulmasının nəticəsidir ki, yeni istehsal sahələrində əmək məhsuldarlığının həcmi də xeyli yüksəlib. Statistik məlumatlara görə, ilin əvvəlindən bəzi sənaye məhsulları istehsalının həcmi 8,4 faiz artıb. Müəssisələr arasında sərbəst rəqabətin, bazar münasibətlərinin düzgün qurulması nəticəsində istehsal olunan məhsulların istehlakçılara vaxtında çatdırılması təmin olunmuşdur.

Son illər rayonumuzun ərazisində yeni tikinti layihələrinin reallaşmasına, möhtəşəm tikinti-quruculuq işlərinin aparılmasına xüsusi diqqət yetirilir. Prezident İlham Əliyevin birbaşa təşəbbüsü ilə rayonumuzun ərazisində salınacaq yeni park da paytaxtda həyata keçirilən silsilə abadlıq və quruculuq işlərinin davamıdır. Bu yaxınlarda yeni parkın ərazisi ilə tanış olan dövlət başçısı görüləcək işlərlə bağlı təkliflərini bildirmiş, layihəni yüksək dəyərləndirmişdir. Parkda postamenti 10 metr olmaqla 60 metr hündürlüyündə musiqili od fəvvarəsinin inşası nəzərdə tutulub. Fəvvarə 500 beton dayaq üzərində qurulacaq. Tikinti işlərində ABŞ-ın və Almaniyanın şirkətləri iştirak edəcək, musiqili fəvvarə postamentin altında quraşdırılacaq, avtomatlaşdırılmış sistem vasitəsilə idarə olunacaq. Parkda dünyanın ən nadir ağac və bitki kollarının əkiləcəyi nəzərdə tutulub. Kompleksin ərazisində insanların istirahəti üçün hər cür şərait yaradılacaq. Bütün bunlar bir daha sübut edir ki, kompleks vətəndaşların rahatlığına və istirahətinə yönəldilən tədbirlər sırasındadır. Azərbaycan cəmiyyətində sabitlik və tərəqqi, demokratikləşmə prosesinin genişlənməsi sosial-iqtisadi inkişafa təkan verən başlıca amilə çevrilir. Bunun nəticəsində iqtisadi infrastruktur sahələri paralel inkişaf edir. Rayonumuzda əmtəə dövriyyəsi və pullu xidmət göstəriciləri də həcm etibarilə xeyli yüksəlmişdir. Adambaşına düşən pərakəndə əmtəə dövriyyəsinin həcmi 1050,3 manatdan 2713,9 manata qədər artmışdır. Əhaliyə göstərilən pullu xidmətin həcmi 5,2 dəfə yüksəlmişdir. Rayonumuzun sosial-iqtisadi həyatında çevik dəyişikliklər yeni mərhələyə qədəm qoyub. Əsas iqtisadi infrastruktur sahələrindən sayılan nəqliyyat sektoru da əhəmiyyətli dərəcədə inkişaf edib. Müqayisə üçün deyək ki, son illərdə yükdaşımanın həcmi 4,7 dəfə, yük dövriyyəsinin həcmi isə 1,1 dəfə yüksəlmişdir. Təkcə nəqliyyat xidmətindən əldə edilən gəlir 3 dəfə artmışdır. Rayonumuzda yeniləşən xidmət sahələrindən biri də rabitə şəbəkəsidir. Ərazimizdə 10 poçt şöbəsi fəaliyyət göstərir. Əhaliyə xidmət səviyyəsini yüksəltmək üçün ardıcıl və məqsədyönlü tədbirlər həyata keçirilir. Son hesablamalara görə, rabitə xidmətindən əldə olunan gəlir 4,3 dəfə artmışdır. Beynəlxalq standartlara, yüksək texnoloji göstəricilərə uyğun avtomat-telefon stansiyalarının quraşdırılmasına üstünlük verilib. Bunun nəticəsidir ki, avtomat-telefon stansiyalarının ümumi tutumu son illərdə ən azı 2,5 dəfə artmışdır.

Yaxşı bilirik ki, təhsil insan kapitalının formalaşmasında ən etibarlı zəmin yaradan mühüm vasitədir. Ona görə də rayonumuzda təhsil sisteminin inkişafına xüsusi diqqət yetirilir. Dövlətin təhsilə qayğısı nəticəsində məktəblərimizdə informasiya texnologiyasının tətbiqinə üstünlük verilmiş, yeni elektron dərsliklər yaradılmış, məktəblərin birbaşa internetə qoşulması təmin olunmuşdur. Müəllimin cəmiyyətdə layiqli yerinin və mövqeyinin möhkəmlənməsi üçün Azərbaycan Prezidenti İlham Əliyev ardıcıl və məqsədyönlü tədbirlər həyata keçirir. 6 sentyabr 2010-cu il tarixdə Prezident İlham Əliyevin imzaladığı "Təhsil müəssisələrində çalışan işçilərin əməkhaqlarının artırılması haqqında" sərəncamı bu sahədə çalışan insanlara yeni qayğının təzahürüdür. Respublikamızda, o cümlədən Nizami rayonunda yeni məktəblərin tikilib istifadəyə verilməsi, mövcud ümumtəhsil məktəblərinin əsaslı təmiri və yenidən qurulması, maddi-texniki bazasının möhkəmləndirilməsi kimi vacib tədbirlərdə Heydər Əliyev Fondunun müstəsna xidmətləri var. Təkcə ötən dərs ilində rayonumuzun orta ümumtəhsil məktəblərini 2002 şagird bitirmiş, onların 1862 nəfəri ali məktəblərə sənəd vermiş, 948 nəfəri tələbə adını qazanmışdır. Rayonumuzun ərazisində fəaliyyət göstərən Dədə Qorqud Özəl Türk Liseyinin 165 məzunu müxtəlif ali məktəblərə qəbul olunmuşdur. Rayonumuzdan xarici ölkələrin ali məktəblərinə qəbul olunan tələbələrin də sayı xeyli artmışdır. Azərbaycan Prezidenti İlham Əliyevin 16 aprel 2007-ci il tarixli sərəncamı ilə təsdiq olunan "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" gənclərin xarici ölkələrin ali məktəblərində təhsillərinin davam etdirilməsinə etibarlı şərait yaratmışdır. Azərbaycan Prezidenti İlham Əliyevin 8 sentyabr 2010-cu il tarixli sərəncamı ilə ali məktəblərə qəbul imtahanlarında ixtisas qrupları üzrə ən yüksək bal toplayaraq tələbə adını qazanmış 102 nəfər Prezident təqaüdünə layiq görülmüşdür ki, onların da 11 nəfəri Nizami rayon məktəblərinin məzunlarıdır. Rayonumuzun ərazisində yerləşən əqli və fiziki cəhətdən qüsurlu uşaqlar üçün fəaliyyət göstərən 3 nömrəli xüsusi məktəb Heydər Əliyev Fondu tərəfindən əsaslı təmir olunmuş, məktəbin maddi-texniki bazası möhkəmləndirilmiş, yeni avadanlıqlar - 20 kompüter, televizor, 2 maqnitofon, 2 soyuducu, emalatxana üçün dəzgahlar və tikiş maşınları alınmışdır. "Uşaq evləri və internat məktəblərinin İnkişafı Proqramı"na uyğun olaraq 2005 və 2008-ci illərdə Heydər Əliyev Fondu tərəfindən rayonumuzun 1 nömrəli uşaq evində əsaslı təmir işləri aparılmış, yeni avadanlıq alınmışdır. Heydər Əliyev Fondunun təşəbbüsü ilə uşaq evlərində tərbiyə almış, yaşı 18-dən yuxarı olan qızlar üçün 50 mənzilli 100 nəfərlik yaşayış binası inşa edilmişdir.

Nizami rayonunda səhiyyə müəssisələrinin yenidən qurulmasına, onların maddi-texniki bazasının möhkəmləndirilməsinə ciddi fikir verilir. Azərbaycan Prezidentinin 27 fevral 2006-cı il tarixdə imzaladığı "Bakı şəhərinin qəsəbələrinin 2006-2007-ci illər üzrə sosial-iqtisadi inkişafının sürətləndirilməsinə dair" Tədbirlər Proqramına uyğun olaraq rayonun səhiyyə müəssisələrində də əhəmiyyətli işlər görülür.

1 nömrəli uşaq yoluxucu xəstəlikləri xəstəxanasında əsaslı təmir işləri aparılmış, yeni qazanxana quraşdırılmışdır. 7 nömrəli doğum evində, 17 nömrəli uşaq poliklinikasında yeni modul tipli qazanxanalar istifadəyə verilmişdir.

Rayon icra hakimiyyəti aparatında iş bölgüsü elə qurulmuşdur ki, vətəndaşların ərizə və şikayətlərinə, hər bir sorğusuna vaxtında və dəqiq cavab verilsin. Son 9 ayda təkcə rayon icra hakimiyyətinin başçısı Tahir Budaqovun yerlərdə sakinlərlə 18 səyyar görüşü keçirilib. Həmin tədbirlərdə rayonun əlaqədar təşkilatlarının nümayəndələri də iştirak edib, hər bir sorğuya yerindəcə əhatəli və qaneedici cavablar verilib. Təkliflərin dinlənilməsi, öyrənilməsi məqsədilə səyyar görüşlərdən əlavə telefon rabitəsi ilə "qaynar xətt" yaradılmış, vətəndaşların arzu və istəklərinə əməl olunması üçün icraya nəzarət mexanizmi güclənmişdir.

Azərbaycan Respublikası Milli Məclisinə noyabrın 7-nə təyin olunmuş seçkilərlə bağlı rayonun ərazisində 3 seçki dairəsi fəaliyyət göstərir. Dairələr yeni inzibati binada yerləşdirilib. Məntəqə seçki komissiyalarının normal fəaliyyəti üçün hər cür şərait yaradılıb. Milli Məclis üzvlüyünə namizədlərin seçicilərlə görüş keçirmələri üçün 4 açıq və 7 qapalı yer müəyyənləşdirilib. Seçki məntəqələrinin ərazisində təşviqat materiallarının uyğun lövhələrdə yerləşdirilməsi üçün yerlər ayrılıb. Bir sözlə, qarşıdan gələn növbəti seçkiyə hazırlıq mərhələsi mütəşəkkilliklə başa çatmaqdadır.

İldırım MEHDİYEV,

Nizami Rayon

İcra Hakimiyyəti

başçısının müavini

Azərbaycan.- 2010.- 16 oktyabr.- S. 5.