Biləsuvarda yeni açılmış lisey-məktəb kompleksinə Azərbaycanın Milli Qəhrəmanı Mübariz İbrahimovun adı verilmişdir

Biləsuvar şəhərində Mərkəzi Bankın dəstəyi ilə inşa edilmiş lisey-məktəb kompleksinə Azərbaycanın Milli Qəhrəmanı şəhid Mübariz İbrahimovun adı verilmişdir.

Açılış mərasiminin iştirakçıları əvvəlcə ümummilli lider Heydər Əliyevin abidəsini ziyarət edərək, xatirəsinə ehtiramlarını bildirmişlər.

Mərkəzi Bankın idarə heyətinin sədri Elman Rüstəmov demişdir ki, bu gün bütövlükdə bölgənin həyatında əlamətdar günlərdən biridir. Azərbaycanın Milli Qəhrəmanı şəhid Mübariz İbrahimovun adını daşıyacaq lisey-məktəb kompleksinin açıldığı gündür. Fürsətdən istifadə edərək Azərbaycan Respublikasının Prezidenti İlham Əliyevin xoş arzularını sizə çatdırmaq istərdim. Cənab Prezident əmin olduğunu bildirmişdir ki, bu lisey-məktəb kompleksi təhsilin modernləşdirilməsi siyasətinin həyata keçirilməsinə yardım göstərəcəkdir. Natiq məlumat vermişdir ki, 2003-cü ildən başlayaraq 1600-dən yuxarı məktəb binasının tikilməsi respublikamızda təhsilə verilən mühüm əhəmiyyətin aydın göstəricisidir. Heydər Əliyev Fondunun Azərbaycan təhsilinin inkişafı naminə gördüyü nəhəng işlər də misilsizdir. Fond tərəfindən həyata keçirilən çoxsaylı layihələr Azərbaycan təhsilini keyfiyyətcə yeni yüksək pilləyə qaldırmışdır.

Elman Rüstəmov bildirmişdir ki, kompleksdə müasir beynəlxalq standartlara cavab verən işıqlandırma, havalandırma, isitmə-soyutma sistemləri, sutəmizləyici qurğu quraşdırılmışdır. İnşaat işlərində Almaniya, Ukrayna, Rusiya, Türkiyə istehsalı olan tikinti materialı və avadanlıqlarından istifadə olunmuşdur. Liseydə video-müşahidə kameraları qoyulmuşdur. Məktəbdə fəaliyyət göstərən "açıq sinif" otağında valideynlər dərslərin gedişini heç bir maneə olmadan izləyəcəklər. Kompleksdə, həmçinin Wi-Fi internet şəbəkəsi ilə təchiz edilmiş kitabxana da fəaliyyət göstərəcəkdir. Liseydə təhsil ödənişsizdir, burada uşaqlara lisey forması və gündə iki dəfə isti yemək verilir. Aztəminatlı uşaqlara yardım məqsədi ilə xüsusi lisey fondu yaradılmış, 5-40 km məsafədə yaşayan şagird və müəllimlərin xüsusi avtobuslarla daşınması təşkil olunmuşdur. Milli Qəhrəman Mübariz İbrahimovun adını daşıyan lisey-məktəbə şagirdlər və müəllimlər TQDK tərəfindən test üsulu ilə keçirilən silsilə imtahanlar və müsabiqə yolu ilə seçilmişlər. Hazırda burada 107 şagird təhsil alır, növbəti dərs ilindən isə onların sayı 250-300 nəfərə çatacaqdır.

E.Rüstəmov vurğulamışdır ki, yaxın günlərdə liseyin qarşısında Milli Qəhrəman Mübariz İbrahimovun abidəsi də ucaldılacaqdır.

Milli Qəhrəmanın atası Ağakərim İbrahimov çıxış edərək, cəmiyyətimiz tərəfindən oğluna yüksək ehtiram göstərilməsini yüksək qiymətləndirmiş, oğlunun müqəddəs şəhidlik zirvəsinə yüksəlməsindən qürur hissi keçirdiyini söyləmişdir.

AzərTAc

Azərbaycan.- 2010.-20 oktyabr.- S. 3.