Son mənzilə

Sentyabrın 7-də milli ifaçılıq sənətinin görkəmli nümayəndələrindən biri, xalq artisti, professor Sərvər Soltan oğlu Qəniyev son mənzilə yola salınmışdır.

Vida mərasimində dövlət və hökumət rəsmiləri, elm və ictimaiyyət nümayəndələri, tanınmış mədəniyyət xadimləri iştirak etmişlər.

Mərhumun cənazəsi Üzeyir Hacıbəyli adına Bakı Musiqi Akademiyasının matəmsayağı bəzədilmiş böyük akt zalında postament üzərinə qoyulmuşdu.

Salonda həzin matəm musiqisi səslənirdi.

Sənətkarın tabutu önünə Azərbaycan Respublikasının Prezidenti adından əklil qoyulmuşdu. Cənazənin ətrafına hökumət təşkilatları və müxtəlif kollektivlər adından da əklillər düzülmüşdü.

Sərvər Qəniyevin həmkarları, dostları, tanışları, tanınmış mədəniyyət və incəsənət xadimləri, mərhumun yaradıcılığının pərəstişkarları axın-axın akademiyanın binasına gəlir, görkəmli sənətkara və gözəl insana son borclarını verirdilər.

Mərasimdə mədəniyyət və turizm naziri Əbülfəs Qarayev, Türkiyənin Bilkənd Universitetinin rektoru Əli Doğramacı, Bakı Musiqi Akademiyasının rektoru, xalq artisti Fərhad Bədəlbəyli, TÜRKSOY-un baş direktoru Düsen Kaseinov və professor Zöhrab Adıgözəlzadə çıxış edərək bildirmişlər ki, milli ifaçılıq məktəbinin tanınmış nümayəndəsi Sərvər Qəniyev Azərbaycan xalqının qədim tarixi köklərə malik musiqi ənənələrinin layiqincə yaşadılmasında, təbliğ edilməsində əvəzsiz xidmətlər göstərmişdir.

1937-ci il avqustun 5-də Bakı şəhərində dünyaya göz açan S. Qəniyev ilk musiqi təhsilini Azərbaycan Dövlət Konservatoriyasının nəzdindəki musiqi məktəbində skripka aləti üzrə almışdır. Daha sonra o, Azərbaycan Dövlət Konservatoriyasına daxil olmuş, ikinci kursdan etibarən isə professional musiqi təhsilini Pyotr Çaykovski adına Moskva Dövlət Konservatoriyasında davam etdirmişdir. Sərvər Qəniyev 1960-cı ildə konservatoriyanı bitirdikdən sonra həmin ali təhsil ocağının aspiranturasında öz peşə kamilliyini artırmışdır.

Natiqlər görkəmli sənətkar, mahir pedaqoq və əsl ziyalı Sərvər Qəniyevin Azərbaycan musiqisinin inkişafı naminə gördüyü işlərdən, gənc musiqiçilərin yetişməsinə göstərdiyi böyük diqqət və qayğıdan danışmışlar. Vurğulanmışdır ki, sənətkar Azərbaycan bəstəkarları ilə yanaşı, dünya klassiklərinin də əsərlərini sevə-sevə ifa etmiş, öz orijinal ifa tərzi ilə daim musiqisevərlərin rəğbətini qazanmışdır.

S.Qəniyev 1971-1979-cu illərdə Qahirə Konservatoriyasında simli alətlər kafedrasının müdiri vəzifəsində işləmiş və eyni zamanda, Qahirə simfonik orkestri ilə müxtəlif Avropa ölkələrində qastrol səfərlərində olmuşdur. Onun Misirdə yetişdirdiyi tələbələr bu ölkənin müxtəlif musiqi kollektivlərində müvəffəqiyyətlə çalışırlar.

Milli mədəniyyətimizi müxtəlif ölkələrdə mahir ustalıqla təmsil etməklə, Sərvər Qəniyev Azərbaycan musiqisinin və ifaçılıq sənətinin təbliğində böyük xidmətlər göstərmişdir. O, ifaçılıq sənətini pedaqoji fəaliyyətlə uğurla tamamlayan sənətkar kimi musiqiçi kadrların yetişdirilməsində də nailiyyətlər əldə etmişdir.

Mərhumun ailəsi adından çıxış edən Toğrul Qəniyev atasının xatirəsinə göstərilən hörmət və ehtirama görə Azərbaycan Prezidenti İlham Əliyevə dərin minnətdarlığını bildirdi. O, Sərvər Qəniyev sənətinin bütün pərəstişkarlarına və matəm mərasimində iştirak edənlərə də təşəkkürünü çatdırdı.

Sonra tələbələri, ailə üzvləri, qohumları mərhumla vidalaşdılar.

***

Xalq artisti Sərvər Qəniyevin cənazəsi akademiyanın binasından qaldırılaraq, 2-ci Fəxri xiyabana gətirildi. Burada mərhumun ruhuna dua oxundu. Əziz xatirəsi xalqımızın qəlbində əbədi yaşayacaq unudulmaz sənətkar Sərvər Qəniyevin cənazəsi doğma torpağa tapşırıldı. Məzarın üzərinə əklillər, gül dəstələri düzüldü.

Allah rəhmət eləsin, qəbri nurla dolsun!

AzərTAc

Azərbaycan.- 2010.- 8 sentyabr.- S. 5.