İstanbulda Azərbaycan, Türkiyə və Türkmənistanın enerji nazirlərinin toplantısı keçirilmişdir

İstanbulda keçiriləcək Türkdilli ölkələrin dövlət başçılarının X zirvə toplantısı çərçivəsində "Çırağan" sarayında Azərbaycanın sənaye və energetika naziri Natiq Əliyev, Türkiyənin enerji və təbii ehtiyatlar naziri Taner Yıldız və Türkmənistanın neft-qaz sənayesi və mineral ehtiyatlar naziri Bayramgeldi Nedirovun iştirakı ilə tədbir keçirilmişdir.

Üç ölkənin texniki heyətlərinin də dəvət olunduğu toplantıda həyata keçiriləcək layihələr, Nabukko təbii qaz xətti ilə bağlı məsələlər müzakirə olunmuşdur. Nazirlər qeyd etmişlər ki, Azərbaycan və Türkmənistanda getdikcə artan təbii qaz ehtiyatlarının Avropa bazarlarına çatdırılması üçün Türkiyə ilə birlikdə müzakirələr davam etdirilməlidir.

T.Yıldız jurnalistlərə bildirmişdir ki, Türkmənistan və Qazaxıstan neftinin Bakı-Tbilisi-Ceyhan boru kəməri ilə nəqlinə başlamışlar. Bu müsbət təcrübə qaz boru xətti ilə də həyata keçirilə bilər. Nabukko layihəsinə gəldikdə isə, Türkiyə hesab edir ki, Azərbaycan, Türkmənistan, İraq və hətta İranın da iştirak edəcəyi bir hasilatçı ölkələr birliyi yaradılması lazımdır. Bu məsələ ötən həftə Brüsseldə Avropa İttifaqının yaratdığı texniki qrupun da vəzifələrinə daxildir.

Azərbaycan.- 2010.-16 sentyabr.- S. 3.