Görkəmli ədəbiyyatşünas alim Bəkir Nəbiyevin 80 illik yubileyi qeyd edilmişdir

Sentyabrın 22-də Azərbaycan Milli Elmlər Akademiyasının (AMEA) Rəyasət Heyətinin binasında görkəmli ədəbiyyatşünas alim, akademik, Dövlət mükafatları laureatı, əməkdar elm xadimi Bəkir Nəbiyevin anadan olmasının 80 illiyinə həsr edilmiş tədbir keçirilmişdir.

Yığıncaq iştirakçıları əvvəlcə binanın foyesində yubilyarın həyat və yaradıcılığını əks etdirən sərgiyə baxmışlar.

AMEA-nın birinci vitse-prezidenti, akademik Arif Həşimov yubilyarı - müasir Azərbaycan ədəbiyyatşünaslığının görkəmli nümayəndəsini, yorulmaz elm təşkilatçısını əlamətdar hadisə münasibətilə təbrik etmişdir. Diqqətə çatdırılmışdır ki, Bəkir Nəbiyev 1930-cu il avqustun 21-də Ağdaş rayonunun Üçqovaq kəndində anadan olmuşdur. Enişli-yoxuşlu, zəngin həyat yolu keçən B.Nəbiyev hələ Ağdaş şəhər orta məktəbində oxuyarkən ictimai işlərdə fəallıq göstərmişdir. 1945-1947-ci illərdə yerli radionun diktoru, sonra isə yeddiillik məktəblərdə Azərbaycan dili və ədəbiyyatı müəllimi işləmişdir. Dəhşətli repressiya illərində atasını itirməsinə baxmayaraq, ümidlə yaşamış, Azərbaycan Dövlət Universitetində (ADU) təhsilini davam etdirməklə yanaşı, Bakıdakı 55 nömrəli orta məktəbdə dərs demişdir.

Vurğulanmışdır ki, B.Nəbiyev ADU-nun filologiya fakültəsini bitirdikdən sonra 1954-1961-ci illərdə "Azərbaycan gəncləri", "İnşaatçı", "Kommunist" qəzetləri redaksiyalarında müxtəlif vəzifələrdə çalışmışdır. Ədəbiyyat sahəsində 1960-cı ildə namizədlik, 1970-ci ildə doktorluq dissertasiyalarını müvəffəqiyyətlə müdafiə etmişdir. Yazıçılar və jurnalistlər birliklərinin üzvü olmaqla yanaşı, elmi fəaliyyətlə məşğul olmağı özünə həyat amalı seçmiş, bu məqsədlə 1961-ci ildən taleyini AMEA-ya bağlamışdır.

Görkəmli elm təşkilatçısı 1971-1987-ci illərdə Ədəbiyyat Muzeyinin (indiki Nizami Gəncəvi adına Milli Azərbaycan Ədəbiyyatı Muzeyinin) direktoru işləmiş, 1982-ci ildə professor adını almış, 1983-cü ildə AMEA-nın müxbir üzvü, 1989-cu ildə həqiqi üzvü (akademiki) seçilmişdir. 1987-2001-ci illərdə akademiyada ədəbiyyat, dil və incəsənət bölməsinin akademik katibi vəzifəsində çalışmışdır.

Akademik Bəkir Nəbiyev hazırda AMEA-nın müşaviri, Nizami adına Ədəbiyyat İnstitutunun direktorudur.

AMEA-nın birinci vitse-prezidenti, akademik Arif Həşimov Azərbaycanda ədəbiyyatşünaslıq elminin inkişafındakı xidmətlərinə görə "Azərbaycan Respublikası Prezidentinin fəxrı diplomu"nu və AMEA-nın Fəxri fərmanını Bəkir Nəbiyevə təqdim etmişdir.

Tədbirdə akademik, Milli Məclisin deputatı İsa Həbibbəylinin "Bəkir Nəbiyevin yaradıcılığı: elmdə klassik ənənə və müasirliyin vəhdəti" mövzusunda məruzəsi maraqla dinlənilmişdir. Vurğulanmışdır ki, alimin elmi fəaliyyəti çoxşaxəli və zəngin olmuşdur. İndiyədək 50 kitabı, müxtəlif dərslikləri, 800-dən artıq məqalə və resenziyası işıq üzü görmüş ədəbiyyatşünas alim 110 elmi və bədii kitabın redaktoru olmuşdur. Məruzəçi B.Nəbiyevin 80 illik yubileyinin belə təntənə ilə keçirilməsini dövlətimizin başçısı İlham Əliyevin Azərbaycan elminə, onun fədakar insanlarına diqqət və qayğısının əyani təzahürü kimi qiymətləndirmişdir.

İ.Həbibbəyli diqqətə çatdırmışdır ki, bütün görülən işlərə baxmayaraq, Bəkir Nəbiyev indi də yorulmadan çalışır. O, 30 cildlik "Türk dünyası ədəbiyyatı"nın (Ankara) Azərbaycan üzrə əlaqələndiricisi və müəlliflərindən biri, 6 cildlik "Çoxmillətli sovet ədəbiyyatı tarixi"nin müəlliflərindən biri, 6 cildlik "Azərbaycan ədəbiyyatı tarixi"nin baş redaktorudur. "Azərbaycan Milli Ensiklopediyası" redaksiya heyəti sədrinin müavini, Heydər Əliyev Mükafatı Dövlət Komissiyasının üzvü, ədəbiyyatşünaslıq üzrə doktorluq müdafiələri şurasının sədridir.

B.Nəbiyev müxtəlif illərdə Yunanıstan, Danimarka, İran, İraq, Türkiyə, Suriya, Səudiyyə Ərəbistanı, Rusiya, ABŞ, Çin, Yaponiya və s. ölkələrdə keçirilən beynəlxalq elmi tədbirlərdəki məruzə və çıxışlarında ölkəmizi ləyaqətlə təmsil etmişdir. Ədəbiyyatşünaslıq sahəsində yüksək ixtisaslı kadrların hazırlanmasında əvəzsiz xidmətlər göstərmişdir. Bu qədər vəzifə borcunu və yaradıcılıq işini yerinə yetirmək təbii ki, ədəbiyyatımızı və xalqımızı sonsuz məhəbbətlə sevən, bitib-tükənməyən istəklə yazıb-yaradan qələm sahiblərinin payına düşə bilər.

Beşcildlik "Seçilmiş əsərlər"inin, yəni ədəbiyyatşünaslıq "Xəmsə"sinin birinci cildi böyük Nizaminin "Sirlər xəzinəsi"ndə olduğu kimi, 20 məqalədən ibarətdir. Bu, Bəkir müəllimin - klassik ədəbi irsimizin gözəl bilicisinin Nizami "Xəmsə"sinə ehtiramının nəticəsidir. Yubilyar ilk "Qızıl qələm" (1974) mükafatı alan tənqidçi olmaqla yanaşı, iki dəfə Azərbaycan Respublikasının Dövlət mükatına layiq görülmüşdür. Əməkdar elm xadimi adını almış, ali dövlət mükafatları - "Şöhrət", "İstiqlal" ordenləri ilə təltif olunmuşdur.

Tədbirdə Azərbaycan Yazıçılar Birliyinin sədri, xalq yazıçısı Anar, Qafqaz Müsəlmanları İdarəsinin sədri, şeyxülislam Allahşükür Paşazadə, Bakı Dövlət Universitetinin rektoru, Milli Məclisin deputatı, akademik Abel Məhərrəmov, akademik Akif Hacıyev və başqaları çıxış edərək Bəkir Nəbiyevin çoxşaxəli fəaliyyətindən danışmış, yubilyara hədiyyələr təqdim etmişlər.

Müxtəlif elm və mədəniyyət təşkilatlarından yubilyarın ünvanına təbriklər səsləndirilmiş, gül buketləri, hədiyyələr verilmişdir.

Yubilyar yaradıcılığının yüksək qiymətləndirildiyinə görə Azərbaycan Prezidentinə, tədbirin təşkilatçılarına və iştirakçılarına təşəkkür etmişdir.

AzərTAc

Azərbaycan.- 2010.- 23 sentyabr.- S. 7.