Heydər Əliyev Fondunun Türkiyə nümayəndəliyi Bursada tədbir keçirmişdir

Heydər Əliyev Fondunun Türkiyə nümayəndəliyinin təşkilatçılığı ilə Bursadakı Uludağ Universitetində təhsil alan azərbaycanlı tələbələrin iştirakı ilə Dünya Azərbaycanlılarının Həmrəyliyi Günü və Yeni il münasibətilə tədbir keçirilmişdir.

Tədbirdə Bursa şəhəri Nilüfər və Osmanqazi bələdiyyələrinin nümayəndələri, Uludağ Universitetinin müəllim və tələbə heyəti, Bursada faəliyyət göstərən ictimai təşkilatların nümayəndələri iştirak etmişlər.

Çıxış edənlər dünyanın müxtəlif yerlərində yaşayan azərbaycanlılar və türklər arasındakı birlik və bərabərlikdən danışmışlar.

Sonra tədbir iştirakçıları XX əsrdə adları Azərbaycan tarixinə qızıl hərflərlə yazılmış ədəbiyyat və incəsənət xadimləri haqqında video görüntüləri izləmişlər. Tədbirdə azərbaycanlı tələbələr şeirlər oxumuş və mahnılar səsləndirmişlər. İrandan və Gürcüstandan olan azərbaycanlı tələbələr də ürək sözlərini bildirmişlər. Uludağ Universiteti konservatoriyasının müəllimlərinin ifasında səslənən Azərbaycan musiqiləri böyük alqışla qarşılanmışdır.

Qonaqlar belə bir tədbirin hazırlanmasına görə Heydər Əliyev Fonduna və onun Türkiyədəki nümayəndəliyinə minnətdarlıqlarını bildirmişlər.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2010.- 1 yanvar.- S. 3.