Azərbaycanın BMT yanında daimi nümayəndəliyi Dağlıq Qarabağdakı vəziyyətlə bağlı qurumun baş katibinə müraciət etmişdir

Azərbaycanın BMT yanında daimi nümayəndəliyi Dağlıq Qarabağdakı vəziyyətlə bağlı qurumun baş katibi Pan Gi Muna məktub göndərmişdir.

Azərbaycanın Xarici İşlər Nazirliyindən bildirmişlər ki, sənəddə Ermənistan hökumətinin Dağlıq Qarabağ münaqişəsinin həlli istiqamətində götürdüyü öhdəliklərə əməl etməməsi xüsusi vurğulanmışdır.

Məktubda qeyd olunmuşdur ki, Ermənistanın Dağlıq Qarabağ münaqişəsinin həlli ilə bağlı siyasi xətti beynəlxalq ictimaiyyəti çaşdırmaq və problemin mahiyyətini təhrif olunmuş şəkildə qəbul etdirmək təhlükəsini daşıyır. Bundan əlavə, münaqişənin həlli ilə bağlı Ermənistanın qeyri-konstruktiv mövqeyi məsələnin siyasi yolla həll olunmasına ciddi təhlükə yaradır.

Sənəddə Ermənistanın qeyri-konstruktiv mövqeyi kəskin tənqid edilərək vurğulanmışdır ki, Ermənistan hələ 1987-ci ilin sonlarında Xankəndidə azərbaycanlılara qarşı hücumlara başlamış, bu da azərbaycanlı qaçqınların və məcburi köçkünlərin axınına səbəb olmuşdur. Sovet hakimiyyəti dövründə Ermənistan öz ərazilərini əsasən Azərbaycanın torpaqları hesabına genişləndirməyə müvəffəq olmuş və bununla belə, azərbaycanlıları doğma torpaqlarından qovmaq üçün bütün vasitələrdən istifadə etmişdir. Sovet hakimiyyəti dövründə Ermənistanın ərazisi 10 min kvadratkilometrdən 29 min kvadratkilometrə qədər genişlənmişdir. Ermənistan hökuməti anlamalıdır ki, öz ərazisini bütün qeyri-ermənilərdən təmizləməklə dünyada yeganə monoetnik dövlətə çevrilmişdir. Lakin Azərbaycan bugünədək öz etnik müxtəlifliyini qoruyur. Həqiqətən də Ermənistanın siyasi təcrübəsində irqi ayrı-seçkilik aydın şəkildə üstünlük təşkil edir.

Məktubda Ermənistana qarşı ciddi ölçü götürülməsi tələb olunur.

AzərTAc

Azərbaycan.- 2010.- 8 yanvar.- S. 3.