Humanitar Əməkdaşlıq üzrə Birinci Azərbaycan-Rusiya Forumunun iştirakçıları xalça muzeyində olmuşlar

Rusiya Humanitar Universitetinin rektoru, "Rusiya-Azərbaycan" Dostluq Cəmiyyətinin prezidenti Yefim Pivovarın başçılığı ilə Humanitar Əməkdaşlıq üzrə Birinci Azərbaycan-Rusiya Forumunun bir qrup iştirakçısı Lətif Kərimov adına Azərbaycan Dövlət xalça və xalq tətbiqi sənəti muzeyində olmuşlar.

Muzeyin ekspozisiyası ilə yaxından tanış olan qonaqlara muzeyin yaranma tarixi, xalq tətbiqi sənətinin nadir inciləri barədə məlumat verilmişdir.

Y.Pivovar muzeylə bağlı təəssüratlarını bölüşmüşdür: "Bu, şedevrdir. Həm Azərbaycan mədəniyyətinin, həm də bütövlükdə dünya mədəniyyətinin bədii sənət inciləridir. Fəxr etmək, valeh olmaq, sevinmək lazımdır ki, belə bir muzey vardır. Bu muzey nadir muzeydir. Mədəni irsin qorunması və zənginləşdirilməsi məsələsinə gəldikdə, sovet dövrü və müasir dövr ayrılmazdır".

Qonaqlar bildirmişlər ki, bu xalçaların ilmələri Rusiya və Azərbaycan arasında əlaqələr kimi elə möhkəm toxunmuşdur ki, zaman dəyişsə də, tarixin gərdişi dönsə də, bu hörüklər açılmayacaqdır.

Xatırladaq ki, Lətif Kərimov adına Azərbaycan Dövlət xalça və xalq tətbiqi sənəti muzeyi 1967-ci ildə yaradılmışdır. Hazırda muzeyin fondunda 10 mindən çox qiymətli sənət əsəri saxlanılır. Muzey Azərbaycanın incəsənətinin nümunələri barədə məlumatlardan ibarət onlarca kataloq, buklet, albom, kitab dərc etdirmişdir.

AzərTAc

Azərbaycan.- 2010.- 24 yanvar.- S. 4.