Azərbaycanlı gənclər Daşkənddəki Dünya İqtisadiyyatı və Diplomatiya Universitetində müəllim və tələbələrlə görüş keçirmişlər

Daşkənd, 1 aprel (AzərTAc). Özbəkistanda səfərdə olan Azərbaycan Diplomatik Akademiyasının (ADA) tələbələri Daşkənddəki Dünya İqtisadiyyatı və Diplomatiya Universitetində (DİDU) müəllim və tələbələrlə görüşmüşlər.

Universitetin prorektoru Baxadir Xocaev tələbələri salamlayaraq bildirmişdir ki, 2009-cu ildə Azərbaycana səfəri çərçivəsində ADA-da olmuş, əməkdaşlıq haqqında saziş imzalanmışdır. O, Özbəkistan ilə Azərbaycan arasında əlaqələrin səviyyəsindən danışaraq bildirmişdir ki, əməkdaşlıq bütün sahələrdə uğurla inkişaf edir. B.Xocaev hər iki ölkənin ali məktəbləri arasında əlaqələr yaradılmasını təqdir etmişdir.

Kafedra müdiri Murad Baxadirov Özbəkistanın siyasi, iqtisadi və digər sahələrdə əldə etdiyi uğurlardan danışmış, dövlət quruculuğu, siyasi partiyalar haqqında məlumat vermiş, regionda sülhün və sabitliyin qorunmasında ölkəsinin təşəbbüslərindən danışmışdır.

ADA-nın müəllimi Anar Vəliyev təmsil etdiyi ali məktəb haqqında məlumat vermiş, əməkdaşlığın daha da dərinləşdirilməsinin vacibliyinə toxunmuşdur.

DİDU-nun müəllimləri azərbaycanlı tələbələrin suallarını cavablandırmışlar. Növbəti görüşün Bakıda keçirilməsi qərara alınmışdır.

Qulu Kəngərli,

AzərTAc-ın xüsusi müxbiri

Daşkənd

Azərbaycan.- 2011.- 2 aprel.- S. 4.