Yunanıstan Prezidentinin Azərbaycana rəsmi səfəri iki ölkə arasında siyasi-iqtisadi əlaqələrin genişlənməsinə təkan verəcək

Bu səfər həmçinin ölkəmizin Avropa İttifaqı ilə əlaqələrinin inkişafı baxımından faydalıdır

Azərbaycan son bir neçə ildə sürətlə Avropaya inteqrasiya olunur. Bu yaxınlaşma həm siyasi, həm də iqtisadi sahədə uğurla həyata keçirilir. Artıq Azərbaycan Avropa üçün mühüm tərəfdaş ölkəyə çevrilib. Bunun başlıca səbəbi Avropanın enerji təhlükəsizliyində ölkəmizin oynadığı rolla bağlıdır. Hazırda Avropa Azərbaycanı özünün enerji təhlükəsizliyində qarant ölkə kimi görür. Bunu cari ilin əvvəlində Avropa İttifaqı ilə Azərbaycan arasında imzalanmış memorandum və bəyannamə də sübut edir.

Yunanıstan Azərbaycan-Avropa əlaqələrinin inkişafında, eləcə də ikitərəfli siyasi-iqtisadi münasibətlərdə mühüm əhəmiyyət daşıyan ölkələrdən biridir. İki ölkə qarşılıqlı maraq doğuran sahələrdə uğurla əməkdaşlıq edir. Yunanıstan Prezidenti Karolos Papulyasın ölkəmizə rəsmi səfəri çərçivəsində bağlanan müqavilələr iki ölkə arasında əlaqələrin daha sürətlə inkişaf etməsinə təkan verəcək. İmzalanan müqavilələr enerji resurslarından istifadə, ətraf mühitin mühafizəsi, dəniz nəqliyyatı, elm, təhsil və mədəniyyət sahələrini əhatə edir.

Lakin Azərbaycanla Yunanıstan arasında əlaqələr imzalanan müqavilələrlə məhdudlaşmır. Prezident İlham Əliyev və Prezident Karolos Papulyasın iştirakı ilə keçirilən IV Azərbaycan-Yunanıstan biznes forumunda bu əməkdaşlığın geniş iqtisadi perspektivləri müzakirə olunmuşdur. Tədbirdə çıxış edən Prezident İlham Əliyev demişdir: "Biz Yunanıstan şirkətlərini Azərbaycana dəvət edirik və şadam ki, onlar bizim dəvətimizi qəbul ediblər. Azərbaycanda iş görmək üçün yaxşı şərait var, çox yaxşı investisiya mühiti var, xarici sərmayələr dövlət tərəfindən lazımınca qorunur. Adambaşına düşən birbaşa xarici sərmayələrin həcminə görə Azərbaycan postsovet məkanında, həmişə olduğu kimi, ön sıradadır. Bizdə investorlar üçün yaradılmış şəraitdən xarici və yerli iş adamları bəhrələnirlər. Təkcə keçən il ölkə iqtisadiyyatına 15,5 milyard dollar sərmayə qoyulmuşdur. Bunun 54 faizi daxili, 46 faizi isə xarici sərmayədir".

Yunanıstan Azərbaycanın təbii qaz ixrac etdiyi Avropa ölkələrindən biridir. 2007-ci ildən Azərbaycan bu ölkəyə mavi yanacaq ixrac edir. Enerji resursları nəqli sahəsində əlaqələri genişləndirmək və bu ölkəyə birbaşa təbii qaz ixrac etmək üçün sözügedən səfər çərçivəsində yeni müqavilə imzalanmışdır. Müqaviləyə əsasən ölkəmiz Yunanıstana qaz ixracını artırmaqla yanaşı, eyni zamanda, bu ölkənin tranzit imkanlarından istifadə etməklə Avropa bazarına çıxış əldə edəcək. Yeni razılaşma hər iki ölkənin iqtisadi əlaqələrini gücləndirməklə bərabər, onlara əlavə mənfəət də gətirəcək.

Azərbaycan kənd təsərrüfatı sahəsində də Yunanıstanla əməkdaşlıqda maraqlıdır. Yunanıstanın aqrar sahədə zəngin təcrübəsi var. Bu ölkə kənd təsərrüfatı və emal sənayesində müasir texnologiyalardan istifadə etməklə yüksək məhsuldarlığa nail olur. Ölkəmiz də ərzaq təhlükəsizliyini daxili resurslar hesabına təmin etmək üçün aqrar sektorun inkişafına xüsusi önəm verir. Bu səbəbdən aqrar sektorda əməkdaşlıq ölkəmiz üçün çox vacibdir.

Azərbaycanın yaxın bir neçə on illiklərə çatacaq enerji resursları var. Amma təbii enerji resursları tükənməz deyil. Bununla əlaqədar Prezident İlham Əliyev uzaqgörənliklə ölkədə bərpa olunan enerji növlərinin yaradılması üçün xüsusi sərəncam imzalayıb. Artıq bu sahədə ilk addımlar atılaraq müəyyən işlər də görülüb. Yunanıstan isə bərpa olunan enerjidən istifadə sahəsində böyük təcrübəyə malikdir. Biznes forumda qeyd edildi ki, ölkəmiz bu sahədə Yunanıstanla əməkdaşlıqda maraqlıdır və bu əməkdaşlıq hər iki tərəf üçün faydalı ola bilər.

Biznes forumdakı çıxışında Prezident İlham Əliyev vurğuladı ki, Azərbaycan xarici ölkələrə sərmayə qoyarkən həmin dövlətlərlə olan dostluq və siyasi əlaqələrə xüsusi önəm verir. Yunanıstan Azərbaycanla dost ölkə olduğu üçün bizim şirkətlərimiz bu ölkənin iqtisadiyyatına sərmayə qoymağa başlamışdır. İki ölkə başçılarının qarşılıqlı səfərləri və dostluq münasibətləri iş adamlarının sərmayə qoyuluşuna yaxşı şərait yaradır. Biznes forumda çıxış edən Yunanıstan Prezidenti Karolos Papulyas bu barədə belə demişdir: "Hesab edirəm ki, ikitərəfli iqtisadi və ticari münasibətlər baxımından görüləsi işlər çoxdur. Biz çalışmalıyıq ki, bu əlaqələri daha da gücləndirək. Xüsusən də, Yunanıstan iqtisadiyyatının ixraca işləyən sektorlarının, yəni, ərzaq məhsullarının, tikinti materiallarının, kosmetika və əczaçılıq məhsullarının ixracını daha da təşviq etməklə əməkdaşlığımızı quraq".

Yunanıstan Prezidentinin çıxışından aydın görünür ki, bu ölkə Azərbaycanla hərtərəfli iqtisadi əlaqələr qurmaqda maraqlıdır. Biznes forumda Yunanıstanın müxtəlif sahələri əhatə edən tanınmış 21 şirkətinin iştirakı da göstərir ki, bu ölkə Azərbaycanla qarşılıqlı faydalı əlaqələr qurmağa çalışır.

Yunanıstan tərəfinin ilk növbədə ölkəmizlə enerji sektorunda əməkdaşlığı genişləndirmək istəyini Prezident Karolos Populyas da çıxışında açıq şəkildə qeyd etmişdir. Onun sözlərinə görə, Yunanıstan Azərbaycan qazının idxalından əlavə, birgə neftayırma zavodlarının tikintisinə də maraq göstərir. Azərbaycan tərəfi də bu sahədə maraqlıdır. Xam nefti Avropada emal edib hazır məhsul kimi Avropa bazarında satmaq ölkəmiz üçün daha sərfəlidir.

Yunan iş adamları ölkəmizlə ərzaq sənayesi, tikinti materialları sahələrində də birgə əməkdaşlığa hazırdırlar. Sözsüz ki, hər bir iqtisadi əməkdaşlıq qarşılıqlı olmalıdır. Buna görə də Azərbaycan və yunan iş adamları qarşılıqlı fayda əsasında biznes əlaqələri qurmaq üçün bir sıra niyyət protokolları imzalamışlar. Bunlar isə hər iki ölkə üçün qarşılıqlı investisiya yatırımları tələb edir. Sözsüz ki, hər iki tərəf maliyyə və investisiya qoyuluşu sahəsində də əməkdaşlıq etmək üçün birgə səy göstərəcəklər. Qarşılıqlı əməkdaşlıq ölkələrimiz arasında iqtisadi əlaqələrin daha da genişlənməsinə səbəb olacaq. Nəticədə hər iki ölkə bu əməkdaşlıqdan qarşılıqlı şəkildə faydalanacaq.

Bir sözlə, Yunanıstan Prezidenti Karolos Papulyasın ölkəmizə rəsmi səfəri Azərbaycan-Yunanıstan siyasi-iqtisadi əlaqələrində yeni bir səhifə açacaq. Bu səfər həmçinin Azərbaycanın Avropa İttifaqı ilə əlaqələrinin inkişafına da təkan verəcək.

R.KAMAL

Azərbaycan.- 2011.-14 aprel.- S. 3.