Bakıda MDB-nin Bədən Tərbiyəsi və İdman üzrə Şurasının iclası başlamışdır

Aprelin 14-də Bakıda MDB-nin Bədən Tərbiyəsi və İdman üzrə Şurasının iclası öz işinə başlamışdır.

AzərTAc xəbər verir ki, Azərbaycan Respublikasının gənclər və idman naziri Azad Rəhimov ölkəmizin Şura ilə sıx əməkdaşlıq etdiyini və ötən il Bakıda MDB-nin gənclərlə iş üzrə Şurasının iclasının keçirildiyini bildirmişdir. O demişdir ki, MDB-nin yaranmasının 20 illiyi münasibətilə nazirlik ilin sonunadək bir çox turnirlər və təlim-məşq toplanışları keçirəcəkdir. Ümummilli lider Heydər Əliyev Azərbaycanda bədən tərbiyəsi və idmanın, Milli Olimpiya Hərəkatının inkişafına böyük diqqət yetirmişdir. Hazırda bu uğurlu siyasət ölkəmizin başçısı İlham Əliyev tərəfindən davam etdirilir. Bakıda və regionlarda beynəlxalq standartlara cavab verən 29 Olimpiya İdman Kompleksi istifadəyə verilmiş və daha 10 obyektin tikintisi davam etdirilir.

İdmançılarımızın 2009-cu ildə 619, ötən il isə 675 medal qazandığını bildirən nazir Azərbaycanın mötəbər yarışlara ev sahibliyi etdiyini diqqətə çatdırmışdır.

Belarusun idman və turizm naziri Oleq Kaçan MDB-nin Bədən Tərbiyəsi və İdman üzrə Şurasına rəhbərlik etdiyi ötən bir il ərzində görülmüş işlərdən danışmış, MDB-nin yaranmasının 20 illiyi münasibətilə keçiriləcək tədbirlər və qarşıda duran vəzifələr barədə məlumat vermişdir.

Sonra iclasa yeni sədr təyin olunmuşdur. Azərbaycan Respublikasının gənclər və idman nazirinin müavini İsmayıl İsmayılov 1 il müddətinə MDB-nin Bədən Tərbiyəsi və İdman üzrə Şurasının sədri seçilmişdir.

İ.İsmayılov ölkəmizdə idmanın gündən-günə inkişaf etdiyini, idmançılarımız üçün lazımi şəraitin yaradıldığını və Şuraya sədrlik edəcəyi dövrdə MDB ölkələri arasında birgə tədbirlərin keçirilməsinin nəzərdə tutulduğunu qeyd etmişdir.

Daha sonra ölkəmizdə idmanın inkişafı və Milli Olimpiya Hərəkatı ilə bağlı videoçarx nümayiş olunmuşdur.

İclasda, həmçinin MDB-nin 20 illiyinə həsr olunmuş idman və gənclər siyasəti sahəsində tədbirlər planı, 2012-ci ildə MDB-də elan olunacaq "Bədən tərbiyəsi və idman ili" ilə bağlı müxtəlif tədbirlər və əlillərin sosial reabilitasiyası ilə bağlı mövzular da müzakirə olunmuşdur.

Xatırladaq ki, 2010-cu il mayın 20-də Sankt-Peterburq şəhərində MDB Hökumət Başçıları Şurası birliyin 20 illiyinin keçirilməsini qərara almış, bu qərara müxtəlif tədbirlər planı daxil edilmişdi. MDB-nin Bədən Tərbiyəsi və İdman üzrə Şurasının növbəti iclasının Bakıda keçirilməsi qərarı da həmin tədbirlər planının bir hissəsidir.

Azərbaycan.- 2011.-15 aprel.- S. 11.