Gənclər təşkilatlarının nümayəndələri "Azərbaycan gəncliyi 2011-2015-ci illərdə" Dövlət Proqramının hazırlanması ilə bağlı təkliflərini vermişlər

Aprelin 29-da Gənclər və İdman Nazirliyində (GİN) Gənclərlə iş üzrə İctimai Şuranın "Azərbaycan gəncliyi 2011-2015-ci illərdə" Dövlət Proqramının hazırlanması ilə bağlı iclası keçirilmişdir.

AzərTAc xəbər verir ki, gənclər və idman nazirinin müavini İntiqam Babayev Dövlət Proqramının əhəmiyyətindən danışmış və gənclərin bu proqramla bağlı təkliflərini verməsini yüksək qiymətləndirmişdir.

Azərbaycan Prezidenti İlham Əliyevin proqramın hazırlanması ilə bağlı sərəncamını yüksək qiymətləndirən nazir müavini İşçi Qrupun yaradıldığını və artıq qrupun iclasının keçirildiyini diqqətə çatdırmışdır. Demişdir ki, ölkə başçısı bir qrup fəal gənclə görüşmüş və problemləri onların dilindən eşitmişdir. Səmimi atmosferdə keçən görüşdə gənclər proqramın hazırlanması ilə bağlı təkliflərini vermişlər. Bu istiqamətdə GİN tərəfindən də məqsədyönlü işlər həyata keçirilir. Belə ki, nazirliyin saytında xüsusi elektron poçt yaradılmışdır. Gənclər bura öz təklif və rəylərini yaza bilərlər. Sayta daxil olmadan da təklifləri dp2011@mys.gov.az elektron ünvanına göndərmək mümkündür. Azərbaycan gəncləri bu elektron ünvanlara müxtəlif mövzularda təkliflər göndərirlər. Onların hamısı nəzərdən keçirilir və sistemləşdirilir. Dövlət Proqramı insan kapitalının inkişafına, gənclərin asudə vaxtlarının səmərəli keçirilməsinə və onların sosial rifahının yüksəldilməsinə xidmət edəcəkdir. Artıq ölkə başçısının tapşırığı ilə Azərbaycan Gəncləri Mərkəzinin inşası üçün torpaq sahəsi ayrılmış və bina minlərlə gənci qəbul edə biləcək şəkildə inşa olunacaqdır. Mərkəzdə konfrans, iclas, yataqxana və elektron-kitabxana da yer alacaqdır. Bu ildən isə Azərbaycan Gəncləri Fondunun fəaliyyətə başlaması nəzərdə tutulmuşdur. Fondun Əsasnaməsi artıq hazırlanmışdır.

Sonra gənclər təşkilatlarının nümayəndələri təkliflərini yazılı şəkildə İ.Babayevə təqdim etmişlər.

İclasda Milli Məclisin deputatı, respublika Uşaq Təşkilatının sədri Gülər Əhmədova, Gənclər Təşkilatları Milli Şurasının sədri, Milli Məclisin deputatı Fuad Muradov və "İrəli" İctimai Birliyinin sədri, Milli Məclisin deputatı Ceyhun Osmanlı iştirak etmişlər.

Gənclərlə iş üzrə İctimai Şura 1994-cü ildən Gənclər və İdman Nazirliyinin Kollegiyası nəzdində fəaliyyət göstərir. Şuranın məqsədi gənclərin qeyri-hökumət təşkilatlarının dövlət gənclər siyasətinin həyata keçirilməsinə, gənclərlə bağlı qanunların hazırlanmasına və təkmilləşdirilməsinə yaxından cəlb etməkdir.

Azərbaycan.- 2011.- 30 aprel.- S. 5.