AMEA-nın Rəyasət Heyətində MDB ölkələrinin gənc arxeoloqlarının yay məktəbi layihəsi iştirakçıları ilə görüş keçirilmişdir

Azərbaycan Milli Elmlər Akademiyasının (AMEA) prezidenti, akademik Mahmud Kərimov Azərbaycanda keçirilən MDB ölkələrinin gənc arxeoloqlarının yay məktəbi layihəsinin iştirakçıları ilə görüş keçirmişdir.

AMEA-dan AzərTAc-a bildirmişlər ki, tədbiri MDB Ölkələri Humanitar Əməkdaşlıq Fondu, Azərbaycan Milli Elmlər Akademiyasının Arxeologiya və Etnoqrafiya İnstitutunun "Gənc Alimlərin İntellektual İnkişaf Mərkəzi" və Tovuz rayonunda fəaliyyət göstərən arxeoloji ekspedisiyanın nəzdindəki "Gənc arxeoloqların yay məktəbi" təşkil etmişlər. Məktəb "Cənubi Qafqazın qədim mədəniyyətləri" mövzusunda beynəlxalq layihə çərçivəsində təşkil olunmuşdur.

Tədbirdə akademik M.Kərimov birgə əməkdaşlıq tədbirlərinin keçirilməsinin gənc alimlərin gələcək fəaliyyətlərində mühüm rol oynayacağını söyləmişdir. O, arxeoloji sahədə aparılan elmi-tədqiqat işlərindən danışaraq ölkə başçısının bu sahəyə dəstək verərək vəsait ayırdığını qeyd etmişdir. Arxeoloji qazıntıların tariximiz haqqında yeni məlumatlar verdiyini söyləyən M.Kərimov AMEA Arxeologiya və Etnoqrafiya İnstitutunda bu sahədə aparılan arxeoloji tədqiqatlar, müxtəlif ölkələrlə, beynəlxalq təşkilatlarla həyata keçirilən birgə layihələr, yaradılmış muzeylər haqqında da danışmışdır.

AMEA Arxeologiya və Etnoqrafiya İnstitutunun əməkdaşı, arxeoloji ekspedisiya qrupunun rəhbəri Fərhad Quliyev bildirmişdir ki, qurum tərəfindən bu il geniş miqyasda təşkil olunan layihə ilk dəfə Azərbaycanda həyata keçirilir. MDB ölkələrində, Gürcüstanda və Azərbaycanda fəaliyyət göstərən gənc arxeoloqların layihədə iştirak etdiyini vurğulayan F.Quliyev bunun MDB-nin 8 ölkəsində də təşkil olunacağını diqqətə çatdırmışdır.

Azərbaycan.- 2011.- 3 avqust.- S. 3.