Gülüstan qalasına aparan gizli yol aşkara çıxarılmışdır

Şamaxı rayonundakı Gülüstan qalasında Şamaxı-Ağsu Arxeoloji Ekspedisiyası tərəfindən aparılan qazıntı işləri davam edir.

Azərbaycan Milli Elmlər Akademiyasının Arxeologiya və Etnoqrafiya İnstitutundan bildirmişlər ki, ekspedisiya Gülüstan qalasına aparan yeraltı gizli yolu aşkar etmişdir. Həmin yol mühasirələr zamanı düşmənə arxadan zərbə vurmaq və qala işğal edilərsə, Şirvanşahın qalanı tərk etməsi üçün nəzərdə tutulmuşdur.

Gizli yol Gülüstan qalasının yaxınlığından keçən Zoğalavay çayının sahilinə çıxır. Yolun yaxınlığında çayın sahilində Pirdirəki ilə Gülüstanı birləşdirən körpünün qalıqları da aşkara çıxarılmışdır.

Tarixçi alimlərin fikrinə görə, qalanın döyüşçüləri mühasirələr zamanı bu yol vasitəsilə qaladan enib Zoğalavay çayının sahilində olan bulaqlardan su götürürmüşlər. Həmin əraziyə baxış keçirilərkən yeraltı yolun yaxınlığında kükürdlü və təmiz suyu olan bir neçə bulaq aşkar edilmişdir.

Xatırladaq ki, arxeoloji turizm baxımından böyük əhəmiyyətə malik Gülüstan qalası Azərbaycanın çətin dövrlərində qanlı çaxnaşmaların, dramatik səhnələrin şahidi olmuş əzəmətli tarixi abidədir. Müharibələr zamanı Gülüstan qalası öz əzəməti ilə düşmən ordularına qarşı dayanan birinci hərbi istehkam tipli qalalarımızdan olmuşdur. Qala XVII əsrdə Səfəvilər tərəfindən dağıdılaraq xarabalığa çevrilmişdir.

Azərbaycan.- 2011.-13 avqust.- S. 3.