İstedadlı jurnalist, təşkilatçı və tədqiqatçı

Tanınmış jurnalist, Azərbaycan Dövlət Teleqraf Agentliyinin (AzərTAc-ın) baş direktoru Aslan Aslanovun avqustun 18-də 60 yaşı tamam olur.

Ömrün müdriklik zirvəsi olan bu 60 ilin 19-u doğulub boya-başa çatdığı Cəbrayıl rayonunda doğmalarının, 5-i Bakı Dövlət Universiteti jurnalistika fakültəsinin müəllimləri və tələbələri, 41-i isə Ağcabədi, Zərdab, İmişli rayon qəzetlərində, "Xalq qəzeti"ndə və AzərTAc-da jurnalist həmkarlarının, respublika ziyalılarının, dövlət və hökumət rəsmilərinin gözləri qarşısında keçib, özü də şərəflə, namusla, ləyaqətlə, halal, pak, alnıaçıq, üzüağ. Bu epitetlər Aslan Aslanovun mənəvi dəyərlər portretini tamamlayan ştrixlərin heç də hamısı deyildir. O, həm yaxşı peşəkar, prinsipial rəhbər, həm də müdrik ağsaqqal və bütöv şəxsiyyətdir. Tanıyanlar onun haqqında bu sözləri ürəkdən söyləyirlər. Deyirlər ki, Aslan Aslanovun jurnalistlik, təşkilatçılıq və tədqiqatçılıq istedadı AzərTAc-da çalışdığı illərdə özünü daha geniş çalarda göstərmişdir.

Bu, həqiqətən belədir. Ölkənin milli informasiya agentliyində müxbir kimi fəaliyyətə başlayan A.Aslanov az sonra baş redaktorun müavini və baş redaktor vəzifələrinə irəli çəkilmişdir. 1997-ci ildə Azərbaycan Respublikasının Prezidenti Heydər Əliyevin sərəncamı ilə AzərTAc-ın baş direktorunun birinci müavini, 2002-ci ilin oktyabrında isə dövlətimizin başçısının fərmanı ilə agentliyin baş direktoru təyin edilmişdir. Aslan müəllimin bioqrafiyasının bu dəyərli məqamlarının arxasında istedadla bərabər, çox gərgin zəhmətin, yaradıcılıq əzab-əziyyətinin, yüksək təşkilatçılıq məsuliyyətinin dayandığını təsəvvür etmək çətin deyildir. O, buna necə nail olmuşdur?! Qəti əminliklə demək olar ki, dahi Heydər Əliyevin "Jurnalistika məktəbi"ndə öyrəndikləri, görüb-götürdükləri, əxz etdikləri sayəsində.

Aslan Aslanov 1993-2002-ci illərdə Prezident Heydər Əliyevi xarici ölkələrə səfərlərinin tam əksəriyyətində AzərTAc-ın müxbiri kimi müşayiət edib və görüşlərini yüksək səviyyədə işıqlandırıb. Mübaliğəsiz demək olar ki, hazırladığı icmallar, reportajlar, müsahibələr və təsviri yazılar müstəqillik yolu ilə inamla irəliləyən, demokratik cəmiyyət quruculuğu sahəsində yüksək nəticələr qazanan Azərbaycanın həmin illəri əhatə edən salnaməsidir.

AzərTAc-da baş direktor vəzifəsinə agentlikdə kadr probleminin həllindən və struktur islahatlarından başlayan Aslan Aslanov qısa müddətdə baş redaksiyaları yeni arxitekturada qurmağa nail olmuşdur.

Ümummilli lider Heydər Əliyevin xarici ölkələrə səfərləri zamanı milli informasiya agentliklərində tanış olduğu təcrübəyə əsasən, AzərTAc-da baş redaksiyaların tərkibində müxtəlif sahələr üzrə buraxılış redaksiyaları, şöbələr və bölmələr yaratdı. Bu, müxbirlərin sahələr üzrə ixtisaslaşmasına, informasiyaların operativliyinin və keyfiyyətinin yüksəlməsinə, idarəetmədə əlaqələndirilmiş fəaliyyətin təmin olunmasına imkan verdi.

Ulu öndər Heydər Əliyevin tapşırıq və tövsiyələrinə əsasən Azərbaycanı informasiya blokadasından çıxarmaq, ölkəmiz haqqında həqiqətləri daha geniş coğrafiyada yaymaq, AzərTAc-ın dünya informasiya məkanına inteqrasiyasını sürətləndirmək, agentliyi etibarlı və nüfuzlu tərəfdaşa çevirmək kimi prioritet vəzifələri reallaşdırmaq üçün baş direktor kompleks tədbirlər proqramı hazırlayıb həyata keçirdi.

Bu proqram bir neçə istiqamətdə paralel olaraq yerinə yetirildi. İlk növbədə, iş şəraitini yaxşılaşdırmaq üçün agentliyin inzibati binası əsaslı təmir edildi, redaksiyalar kompyuterləşdirildi, texniki baza modernləşdirildi, müasir güclü serverlər, faksimillər, Almaniya istehsalı olan elektrik şəbəkə qurğusu, rəqəmsal fotolaboratoriya, ən yeni rəqəmli fotoaparatlar, diktofonlar, noutbuklar, mətnaçarlar alınıb istifadəyə verildi.

Bununla bərabər, agentliyə təcrübəli mütəxəssislər - jurnalistlər, tərcüməçilər, redaktorlar, proqramçı mühəndislər cəlb edildi, dünya standartları səviyyəsində mükəmməl sayt yaradılaraq beynəlxalq internet şəbəkəsinə qoşuldu.

AzərTAc-ın beynəlxalq əlaqələrini genişləndirmək, dünya informasiya məkanına inteqrasiyasını təmin etmək üçün xarici ölkələrin milli informasiya agentlikləri ilə sıx əlaqələr quruldu. Bunun nəticəsidir ki, hazırda AzərTAc 30-a yaxın ölkənin milli informasiya agentliyi ilə qarşılıqlı müqavilə əsasında informasiya mübadiləsi aparır, 90-dan çox ölkəyə Azərbaycanın iqtisadi-siyasi, sosial-mədəni həyatı ilə bağlı xəbərlər göndərir və qəbul edir.

Azərbaycan həqiqətlərinin daha geniş coğrafiyada yayılması istiqamətində səylər 2004-cü ildə AzərTAc-ın Asiya və Sakit Okean Ölkələri İnformasiya Agentlikləri Təşkilatına (OANA) üzv qəbul olunması ilə nəticələndi. Bu uğur agentliyi beynəlxalq əlaqələr müstəvisində yeni mərhələyə çıxardı. AzərTAc-ın bu qurumda fəallığını nəzərə alan OANA-nın Baş Məclisi Aslan Aslanovu təşkilatın büro üzvü seçdi. Bu nüfuzlu beynəlxalq media qurumunda AzərTAc Çinin Sinxua, Yaponiyanın Kyodo, Rusiyanın İTAR-TASS, Malayziyanın Bernama, İndoneziyanın Antara, Türkiyənin Anadolu agentlikləri kimi nəhənglərlə bir sırada Azərbaycan həqiqətlərini bu təşkilatın üzvü olan 33 ölkənin 40 xəbər agentliyi vasitəsilə böyük bir regionun oxucu auditoriyasına uğurla çatdırır.

Aslan Aslanovun səyləri 2008-ci ildə AzərTAc-ın tarixində daha bir möhtəşəm uğura imza atılması ilə nəticələndi. Həmin il AzərTAc Avropa Xəbər Agentlikləri Alyansına - EANA-ya mütləq səs çoxluğu ilə üzv qəbul edildi. MDB məkanında Rusiyanın İTAR-TASS və Ukraynanın Ukrinform agentliklərindən sonra bu beynəlxalq media qurumuna məhz AzərTAc qəbul olundu. Bu uğurun əldə edilməsində A.Aslanovun EANA-nın üzvü olan 29 Avropa ölkəsinin milli informasiya agentliklərinin rəhbərləri ilə şəxsi dostluq əlaqələri mühüm rol oynadı. A.Aslanov bu əlaqələrə həm AzərTAc-ın təsisçilərindən biri və hazırda sədri olduğu Türkdilli Xəbər Agentlikləri Birliyinin (TKA) və Qara Dəniz İqtisadi Əməkdaşlıq Təşkilatının üzvü olan ölkələrin Milli İnformasiya Agentlikləri Assosiasiyasının (BSANNA), həmçinin MDB ölkələri Milli İnformasiya Agentlikləri Assosiasiyasının (ANİA), həm də OANA-nın və EANA-nın baş məclislərinin, Ümumdünya İnformasiya Agentlikləri Şurasının, Avrasiya Media Forumunun, Beynəlxalq Rus Mətbuatı Konqresinin, MDB dövlət İnformasiya Agentlikləri Rəhbərləri Şurasının iclaslarında, Dünya İnformasiya Agentliklərinin qurultaylarında fəal iştirakı və səmərəli görüşləri ilə nail olmuşdur.

Bu uğurlar beynəlxalq aləmdə Azərbaycana, AzərTAc-a marağı artırmışdır. Bunun nəticəsidir ki, 2008-ci ilin may ayında TKA-nın Baş Məclisinin 7-ci, həmin ilin oktyabrında OANA İcraiyyə Komitəsinin 30-cu iclasları A.Aslanovun sədrliyi ilə Bakıda keçirilmişdir. Baş direktorun təşəbbüsü ilə OANA-nın və EANA-nın tarixində ilk dəfə bu beynəlxalq media qurumlarının rəhbərləri Bakı iclasında bir araya gəlmişlər. Bu, Şərq və Qərbin aparıcı informasiya agentlikləri arasında dialoqun başlanğıcı olmuşdur. O vaxt OANA-nın prezidenti olan görkəmli Avstriya jurnalisti Volfqanq Vislozil Bakı toplantısı haqqında təəssüratlarında yazırdı: "Bu, Şərq və Qərb mass-mediası arasında yeni yanaşma idi. Biz Şərqin aparıcı informasiya agentliklərinin rəhbərləri ilə Bakıda bir araya gələrək səmərəli dialoqun təməlini qoya bildik. Bu işdə AzərTAc-ın və onun rəhbərinin tarixi xidməti olmuşdur".

AzərTAc-da daim irəliyə getmək, yeni uğurlara imza atmaq artıq ənənəyə çevrilmişdir. A.Aslanovun səyləri nəticəsində agentliyin xarici ölkələrdə müxbir məntəqələrinin sayı son illərdə 15-ə çatdırılmış, AzərTAc-da 5 xarici dildə - ingilis, rus, fransız, alman, ərəb dillərində informasiya buraxılışı təşkil olunmuş, multimedia, videoxəbər redaksiyası yaradılmış, jurnalistikanın yeni janrı olan infoqrafikadan istifadə olunmağa başlanmışdır. Hazırda AzərTAc-ın saytında səsli xəbərlərdən, audioslaydşoulardan, video, fotolent, inforqrafikadan geniş istifadə olunur.

Tezliklə AzərTAc-ın həyatında daha bir əlamətdar hadisə baş verəcəkdir. Azərbaycan Respublikasının Prezidenti İlham Əliyevin sərəncamı ilə agentlik üçün yeni inzibati bina tikiləcəkdir.

Aslan müəllim çox böyük təşkilati işlərlə yanaşı, elmi araşdırmalarla da məşğuldur. O, "Heydər Əliyev və AzərTAc", "AzərTAc-dan AzərTAc-a mürəkkəb və şərəfli yol", "AzərTAc-90" kitablarının, eləcə də Azərbaycan mətbuatının problemlərinə həsr olunmuş onlarca məqalənin müəllifi, çoxsaylı kitabların redaktorudur. Aslan Aslanovun gərgin axtarışları milli jurnalistikamızın inkişafına daha bir dəyərli töhfənin verilməsi ilə nəticələnmişdir. Yubileyi ərəfəsində Aslan müəllimin "Müasir dünyanın informasiya şəbəkəsində AzərTAc-ın yeri: təşəkkül tarixi və inkişaf mərhələləri" adlı çox dəyərli monoqrafiyası işıq üzü görmüşdür. Aslan müəllimin jurnalistikamızın inkişafı sahəsindəki xidmətləri yüksək qiymətləndirilmişdir. O, 2000-ci ildə Azərbaycan Prezidenti Heydər Əliyevin sərəncamı ilə "Əməkdar mədəniyyət işçisi" fəxri adına, Prezident İlham Əliyevin sərəncamları ilə 2005-ci ildə "Tərəqqi" medalına, 2010-cu ildə isə "Vətənə xidmətə görə" ordeninə layiq görülmüşdür. O, Həsən bəy Zərdabi, Qızıl qələm və Ali Media mükafatları laureatıdır.

Yubiley həmkar, dost haqqında səmimi duyğuları ifadə etmək üçün yaxşı fürsətdir. Bu fürsətdən istifadə edərək həmkarları adından Aslan Aslanovu təbrik edir, ona möhkəm cansağlığı, ailə sevinci, yeni yaradıcılıq uğurları arzulayırıq.

Rüstəm RÜSTƏMOV,

əməkdar journalist

Azərbaycan.- 2011.- 18 avqust.- S. 4.