Pakistan Senatının sədri: Azərbaycan torpaqlarının ermənilər tərəfindən işğalına son qoyulmayanadək Pakistan Ermənistanı bir dövlət kimi tanımayacaqdır

Azərbaycanın Pakistandakı səfiri Daşqın Şikarov avqustun 26-da bu ölkənin Senatının sədri Faruk Həmid Naik ilə görüşmüşdür.

Səfirlikdən AzərTAc-a bildirmişlər ki, diplomat Ermənistan-Azərbaycan, Dağlıq Qarabağ münaqişəsi və digər məsələlərdə Pakistanın ölkəmizə verdiyi dəstəyə görə təşəkkür etmişdir. Səfir Azərbaycan xalqının da bütün məsələlərdə daim Pakistanla birlikdə olduğunu bildirmişdir.

F.Naikin Pakistan-Azərbaycan parlamentlərarası dostluq qrupunun rəhbəri təyin olunmasını Azərbaycan tərəfindən yüksək qiymətləndirildiyini qeyd edən D.Şikarov bildirmişdir ki, bu təyinat hər iki ölkənin parlamentləri arasında əlaqələrin inkişafında böyük rol oynayacaqdır.

Ölkələrimiz arasında siyasi əlaqələrin yüksək səviyyədə olduğunu deyən F.Naik vurğulamışdır ki, Pakistan Ermənistan-Azərbaycan, Dağlıq Qarabağ münaqişəsinin həllində Azərbaycanı tam dəstəkləyir. Zəbt olunmuş torpaqların qeyd-şərtsiz azad edilməsinin vacibliyini qeyd edən Senatın sədri bildirmişdir ki, işğala son qoyulmayanadək Pakistan Ermənistanı bir dövlət kimi tanımayacaqdır.

F.Naik Azərbaycanın enerji resurslarının və kimya sənayesi məhsullarının Pakistana idxalı, ölkəsinin yüngül sənaye, kənd təsərrüfatı mallarının isə Azərbaycana ixrac edilməsi imkanlarından da danışmışdır.

Cari ilin payızında Pakistan Prezidentinin Azərbaycana səfərinin gözlənildiyini, habelə hökumətlərarası komissiyanın V iclasının və hər iki ölkənin iş adamlarının iştirakı ilə Bakıda biznes forumunun keçiriləcəyini qeyd edən D.Şikarov bunun iqtisadi inkişafa təkan verəcəyini bildirmişdir. Diplomat Azərbaycanın Pakistan ilə bütün sahələrdə əməkdaşlığı genişləndirmək niyyətində olduğunu və ölkələrimiz arasında birbaşa nəqliyyat əlaqəsinin yaradılmasının vacibliyini vurğulamışdır.

Senatın sədri F.Naik Pakistanda 2005-ci ildə olmuş zəlzələ və 2010-cu ildəki sel fəlakəti zamanı Azərbaycanın göstərdiyi maddi və mənəvi dəstəyi xatırlatmış, buna görə Prezident İlham Əliyevə və bütün Azərbaycan xalqına minnətdarlığını bildirmişdir. Heydər Əliyev Fondunun Müzəffərabad şəhərində tikdirdiyi qızlar məktəbinin Pakistan-Azərbaycan xalqları arasında dostluğun təzahürü olduğunu deyən Senatın sədri ölkəsində fondun prezidenti Mehriban xanım Əliyevaya olan böyük hörməti xüsusi qeyd etmişdir.

Azərbaycan.- 2011.- 27 avqust.- S. 1.