Azərbaycanın
nümayəndə heyəti Beynəlxalq Dəniz Təşkilatı
Assambleyasının 27-ci sessiyasında iştirak
etmişdir
Azərbaycan Respublikasının Dövlət Dəniz Administrasiyasının (ARDDA) rəisi Qüdrət Qurbanovun rəhbərlik etdiyi nümayəndə heyəti BMT-nin nüfuzlu orqanı olan Beynəlxalq Dəniz Təşkilatı (BDT) Assambleyasının Londonda keçirilən 27-ci sessiyasında iştirak etmişdir.
ARDDA-nın mətbuat xidmətindən AzərTAc-a bildirmişlər ki, sessiyada BDT-nin ötən dövr üçün maliyyə auditinin nəticələri, təşkilata üzv dövlətlərdə dəniz nəqliyyatı sahəsində beynəlxalq konvensiyaların tələblərinə riayət olunması vəziyyətinin araşdırılması üzrə auditin keçirilməsi, habelə dövlətlərin dəniz administrasiyalarının fəaliyyətinin qiymətləndirilməsi məqsədi ilə tərtib edilmiş yeni cədvəl təsdiq edilmişdir.
Eyni zamanda, dəniz nəqliyyatı sahəsində mütəxəssislərin hazırlığına dair məsələlər müzakirə edilmiş, dəniz quldurluğu hallarının qarşısının alınması istiqamətində BDT tərəfindən BMT və NATO kimi nüfuzlu beynəlxalq təşkilatlarla birlikdə həyata keçirilmiş tədbirlər barədə üzv dövlətlərə məlumat verilmiş, təşkilatın Dəniz Təhlükəsizliyi, Dəniz Ətraf Mühitinin Mühafizəsi, Hüquq və digər komitələrinin hesabatları dinlənilmişdir. Bundan başqa, dəniz nəqliyyatının təhlükəsizliyinin təmin edilməsi ilə bağlı qətnamələr qəbul edilmiş və BDT-nin icraçı orqanı olan şuranın üzvlüyünə seçkilər də keçirilmişdir.
Həmçinin 182 dövlətin
nümayəndə heyətlərinin iştirak
etdiyi assambleya tərəfindən
BDT-nin baş katibi vəzifəsinə yeni
seçkilər keçirilmiş və təşkilatın
Dəniz Təhlükəsizliyi Bölməsinin direktoru, Yaponiya təmsilçisi
Koji Sekimizu yeni baş katib
seçilmişdir.
Sessiyada
keçirilən dinləmələr zamanı Azərbaycan
nümayəndə heyəti müzakirələrdə fəal
iştirak etmiş və Azərbaycan Respublikasının
qoşulduğu konvensiyaların tələblərinə tam əməl
edilməsi, xüsusilə də bu sahənin daim dövlət
nəzarətində saxlanıldığı, habelə
ölkəmiz tərəfindən audit yoxlanışına
müvafiq hazırlıq işlərinin
görüldüyü assambleyanın, eləcə də
üzv dövlətlərin nümayəndə heyətlərinin
nəzərinə çatdırılmışdır.
Assambleyada
Koreya Respublikasının təmsilçisi kapitan Seog Hae-gyun gəmiyə
hücum edən dəniz quldurlarına qarşı
sağlamlığının itirilməsi ilə nəticələnən
müqavimət göstərilməsi zamanı gəminin və
heyət üzvlərinin xilas edilməsi məqsədi ilə
göstərdiyi cəsarət və igidliyə görə BDT
tərəfindən "Dənizdə göstərilmiş
xüsusi cəsarətə görə" medalı ilə təltif
edilmişdir.
BDT
Assambleyasının 27-ci sessiyasının sonunda üzv
dövlətlər tərəfindən yekdilliklə təşkilatın
növbəti 2 il üçün strateji planı təsdiq
edilmişdir.
Dövlət
Dəniz Administrasiyasının rəisi Qüdrət Qurbanov
assambleya çərçivəsində dəniz nəqliyyatı
sahəsində qabaqcıl dünya dövlətlərinin dəniz
administrasiyalarının başçıları ilə bir
sıra görüşlər də keçirmişdir. Görüşlər zamanı Azərbaycan Prezidenti İlham Əliyevin
diqqət və qayğısı sayəsində
iqtisadiyyatın digər sahələri ilə yanaşı,
ölkəmizdə dəniz nəqliyyatı sahəsində görülmüş işlər də
xüsusilə qeyd edilmiş,
habelə dəniz təhlükəsizliyi istiqamətində
qarşılıqlı əməkdaşlıq məsələləri üzrə fikir
mübadiləsi aparılmış, yaxın günlərdə
tam fəaliyyətə başlaması nəzərdə
tutulan Uzaq Məsafədən
Tanınma və İzləmə (UMTİ/LRİT) Milli Mərkəzinin texniki
imkanları barədə ətraflı məlumat verilmişdir.
Azərbaycan.- 2011.- 1 dekabr.- S. 3.