«Literaturnaya qazeta»da və «Naşe vremya» jurnalında Mirzə İbrahimov haqqında məqalələr dərc edilmişdir

Beynəlxalq Yazıçılar və Publisistlər Assosiasiyasının mətbu orqanı olan "Naşe vremya" jurnalının dördüncü nömrəsində Azərbaycanın tanınmış yazıçısı Mirzə İbrahimov haqqında geniş məqalə dərc edilmişdir. "Naşe vremya" jurnalı dünyanın 50 ölkəsində yayılır.

Qeyd etmək lazımdır ki, bu günlərdə Azərbaycan Respublikasının Prezidenti İlham Əliyev M.İbrahimovun anadan olmasının 100 illiyi ilə əlaqədar tədbirlər keçirilməsi haqqında sərəncam imzalamışdır.

Tanınmış ictimai xadim, xalq yazıçısı, dramaturq, ədəbiyyatşünas, publisistin 100 illiyinin qeyd edilməsi ərəfəsində "O gün nə vaxt gələcək?" sərlövhəli bu məqalə Moskvada çıxan "Literaturnaya qazeta"da da dərc edilmişdir. Məqalənin müəllifi tanınmış şair, Rəsul Rza adına beynəlxalq mükafat laureatı Nəsib Nəbioğlu M.İbrahimovun Azərbaycan ədəbiyyatında və mədəniyyətində rolu barədə söhbət açır. Məqalədə qeyd edilir ki, Mirzə İbrahimov sovet və Azərbaycan ədəbiyyatının ən parlaq nümayəndələrindən biridir. O, əsl ziyalı, istedadlı yazıçı, Azərbaycan Milli Elmlər Akademiyasını təşkil edənlərin və onu yaradanların biridir. Onun ədəbi irsi müasir Azərbaycan dilinin və mədəniyyətinin qorunub saxlanmasında və inkişafında böyük rol oynamış, milli mənlik şüurunun formalaşmasına kömək etmişdir.

AzərTAc

Azərbaycan.- 2011.- 8 dekabr.- S. 7.