Azərbaycanın baş ziyarətgahı

Ulu öndərin həyatı hər birimiz üçün örnəkdir

Öz əməli, missiyası ilə tarixdə silinməz izlər qoymuş şəxsiyyətlər azdır. Amma hər xalqın, millətin təkamül tarixində belə şəxsiyyətlər olub. Vətənimiz üçün kifayət qədər mürəkkəb və keşməkeşli bir dönəmdə xalqının imdadına çatan ulu öndər Heydər Əliyev Azərbaycanın inkişaf tarixində silinməz işlər qoymuşdur. Onun titanik zəhməti nəticəsində Azərbaycan dünyanın siyasi meydanında öz sözünü deyə bilən qüdrətli dövlətə çevrildi. Başqa xalqların, millətlərin yüz illərdə elədiyini böyük öndər bir neçə ilə başa vurdu, sanki zamanı az idi, yol üstündəydiE

Ulu öndərin əbədiyyətə qovuşmasından 8 il ötür. Respublikamızın bütün şəhər və rayonlarının nümayəndələri, paytaxt sakinləri, xarici ölkələrdən gəlmiş çoxsaylı qonaqlar bu səhər tezdən Fəxri xiyabana gələrək Azərbaycanın baş ziyarətgahında ümummilli liderin məzarını ziyarət edir, xatirəsini əziz tutur, ruhu qarşısında baş əyirlər. Azərbaycanın özü qədər əbədi olan dahi şəxsiyyət hər bir vətəndaşın qəlbində böyük məhəbbətlə sevilir, anılır, yaşanır və əbədi yaşayacaq da. Çünki millətinin inkişafı üçün onun başladığı dünyəvilik, müasirlik və gənclik siyasəti, eyni zamanda quruculuq işləri bu gün sürətlə davam edir. Bu səhər tezdən insanlar yenə də öz liderlərinə əbədi sevgilərini bildirmək məqsədilə sıralanmışdılar. Gül-çiçəklə, ürəklərində böyük məhəbbətlə.

Solmaz ASLANOVA,

təqaüdçü müəllim:

- Ötən əsrin 60-cı illərindən başlayaraq xalqımızın böyük oğlu Heydər Əliyev uzaqgörənliklə millətimizin gələcəyi üçün, yəni bugünümüz üçün güclü siyasi, iqtisadi intellektual təməl hazırlayırdı. O, bu təməllə, yaratdığı infrastrukturla inkişafımızın əsasını qoymuşdur. Bu gün Azərbaycan ulu öndərin vaxtilə əsasını qoyduğu uğurlu yolla gələcəyə doğru inamla addımlayır. Bu illər ərzində Azərbaycanın dinamik inkişafı davamlı xarakter almış, respublikamızın beynəlxalq aləmdə yeri və nüfuzu daha da möhkəmlənmişdir. Qırx ildən çox iş təcrübəsi olan bir pedaqoq kimi deyə bilərəm ki, yetişən gəncliyin Heydər Əliyevin ideyaları ruhunda tərbiyə olunması, müdrik rəhbərimizin qurub yaratdığı müstəqil dövlətimizin şanlı tarixinin onlara elmi əsaslarla mənimsədilməsi və təbliği vacib məsələdir. Azərbaycan yaşadıqca ulu öndərin adı hər zaman onunla qoşa çəkiləcək. Mən tez-tez ziyarətə gəlirəm, ulu öndərin məzarını ziyarət edib, ruhuna dualar oxuyuram. Çünki 1960-cı illərdən onun çəkdiyi zəhmətlər mənim gözümün önündədir.

Asya İBRAHİMOVA:

- Səkkizinci ildir ki, mən hər dekabrın 12-si səhər tezdən bura gəlirəm, nəvələrimlə. Bir neçə il öncə səhər əlindən tutub gətirdiyim iki nəvəm indi tələbədirlər. Bu gün onlar universitetdən gələcəklər. Bu nəvəmi səhər bağçadan götürüb özümlə ziyarətə gətirdim. Ulu öndərin respublikamıza ilk rəhbərliyi dövrü mənim gənclik yaşlarıma düşüb. Hər şeyi çox gözəl xatırlayıram. Ölkəmizin hər yerində quruculuq, abadlıq işləri aparılır, elmin, təhsilin, mədəniyyətin inkişafına xüsusi diqqət yetirilirdi. Onun gördüyü işləri nə saymaqla qurtarandı, nə sadalamaqla. Ölkəmizin qazandığı bütün uğurlar ulu öndərin adı ilə bağlıdır. Deyərdim ki, dünyanın siyasi sistemində Azərbaycanın müstəqil və get-gedə artan nüfuzlu mövqeyini, dövlətçiliyinin əsaslarını və fəlsəfəsini Heydər Əliyev müəyyənləşdirib. Bu dahi insanın vətən qarşısındaki xidmətləri, həyat və fəaliyyəti hər birimiz üçün örnəkdir. Allahdan ulu öndərə rəhmət diləyirəm, yeri cənnət olsun.

Mirzə TAHİRLİ, hərbçi:

- Yadımdadır, mən bu xəbəri türk kanallarına baxarkən orada gördüm. Ekran qarşısından keçən qara lentdə yazılmışdı ki, Azərbaycanın böyük oğlu Heydər Əliyevin ölümündən sarsıldıq. Tez kanalı dəyişdim, Azərbaycan kanallarında xəbərlər verilirdi. Yerimdəcə donub qaldım. Hər ilin dekabrında o anı yenə yaşayıram. Tək mən deyil, hamı donmuşdu elə bil. Bu gün səkkiz ildir ki, ulu öndərimiz haqq dünyasındadır. Amma onun əməlləri yaşayır, həmişə də yaşayacaq. Bizə qalan odur ki, məzarını ziyarət etməklə, xatirəsini əziz tutmaqla ona öz ehtiramımızı bildirək. Tarix sübut etdi ki, Heydər Əliyevin seçdiyi yol doğru və həqiqətdir. Bütün parametrlərə görə Azərbaycan dünyanın lider dövlətlərindəndir. Mən hərbçi kimi deyə bilərəm ki, xalqımızın hərbi gücü də region dövlətlərindən qat-qat artıqdır. Biz dinc və sülhsevər xalqıq. Lakin məqamı gələndə torpaqlarımızı azad etmək üçün həm canlı qüvvəmiz, həm də hərbi qüvvəmiz yetərincədir. İnşallah, biz o günü gözləyirik. Ümid edirəm ki, torpaqlarımızın azad olacağı gün ulu öndərimizin də ruhu dinclik tapacaq.

Azərbaycanın güclü dövləti, güclü siyasəti və güclü diplomatiyası Heydər Əliyev siyasəti nəticəsində formalaşmışdır. Sevinirik ki, ulu öndərin siyasəti Prezident İlham Əliyev tərəfindən uğurla davam etdirilir. İnsan axınını görürsünüzmü, bu, böyük liderin Azərbaycan qarşısında nə dərəcədə misilsiz xidmətlər göstərdiyini bariz şəkildə göstərir.

Tutuxanım MƏMMƏDOVA,

kitabxanaçı:

- Mən təkcə gəlməmişəm, iş yoldaşlarım da buradadır. Bu, bizim hər birimizin borcudur. Heydər Əliyev Azərbaycanın tarixini həm yaradıb, həm də yazıb. Heydər Əliyev həyatının mənasını xalqına xidmətə həsr etdi, ölkənin parçalanmasının qarşısını aldı, milli qurtuluşunu təmin etdi. Milləti hərtərəfli, sürətli inkişaf yoluna çıxartdı. Heydər Əliyevin Azərbaycan dövləti və xalqı qarşısında xidmətləri əvəzedilməzdir. Həssas bir regionda yerləşən Azərbaycanda dövlətçiliyin yaradılması və bütün bəşəriyyətə örnək olacaq inkişaf modelinin qurulması Heydər Əliyevin tarixi xidmətidir. Ulu öndər sivil, demokratik, dünyəvi dövlət quruculuğu təcrübəsini ortaya qoydu. Onun irsi, dövləti qurmaq və onu irəli aparmaq fəlsəfəsi dünya tərəfindən qəbul edilir. Bu gün ulu öndərimizin anım günüdür. İnsanlar vətənimizin baş ziyarətgahına axışır. Hərə əlində gül-çiçək, ürəklərində sevgi ilə gəlir bura. Biz də onlardan biriyik. Heydər Əliyev bu gün dünyanın hər bir guşəsində yaşayan azərbaycanlı tərəfindən anılır, xatirəsi əziz tutulur. Bu o deməkdir ki, Heydər Əliyev bu an dünyanın hər yerində soydaşlarımız tərəfindən xatırlanır, böyük hörmət və sevgiylə anılır.

Aydın MİRZƏZADƏ,

Milli Məclisin deputatı:

- Ulu öndər Heydər Əliyevin işıqlı xatirəsini yad etmək hər bir Azərbaycan vətəndaşının müqəddəs borcudur. Xalqımızın ümummilli liderinin dövlətçilik tarixindəki müstəsna xidmətlərinin nəticəsi olaraq Azərbaycan bu gün təkcə yerləşdiyi regionun deyil, Avropanın inkişaf etmiş dövlətlərindən biri kimi tanınır. Bütünlüklə həyat və fəaliyyətini xalqına və memarı, eləcə də qurucusu olduğu müstəqil Azərbaycan dövlətinin qorunub saxlanmasına həsr edən ümummilli lider Heydər Əliyev ölkəni iyirminci yüzilliyin sonunda siyasi fəlakətlərdən, vətəndaş qarşıdurmasından xilas etmiş şəxsiyyət kimi yaddaşlarda əbədi yaşayır. Fiziki yoxluğundan qəhərlənsək də, xalqımızın belə xilaskar oğlu olmasından qürurlandığımız ulu öndər Heydər Əliyev qəlbimizdə mənəvi bir əbədiyaşarlıq qazanıb. 2003-cü ilin qarlı dekabr günlərindən ötən səkkiz il ərzində Fəxri xiyabana, baş ziyarətgaha üz tutan insan axını da bunu təsdiqləyir.

Təbii ki, ulu öndərin ideyaları gerçəkləşdikcə Azərbaycan dövləti özünün varlığını bir daha daha geniş şəbəkədə təsdiqləyir. Ümummilli liderin iqtisadi-siyasi kursu bu gün bütün sahələrdə özünü təsdiqləyir. Azərbaycan xalqının qəhrəmanlıqlarla dolu tarixinə, zəngin mənəvi dəyərlərinə və maddi-mənəvi irsinə, eləcə də incəsənətinə qayğı ilə yanaşan ulu öndər özü də yaxşı bilirdi ki, ömrünü və mənalı həyatını həsr etdiyi doğma xalqı onu heç zaman unutmayacaq. Elə buna görə də çıxışlarının birində ümummilli lider bu məqama toxunaraq demişdir: "Bilirəm ki, 30 ildən artıq bir müddətdə Azərbaycana bəxş etdiyim töhfələr - zavodlar, buruqlar, binalar, obyektlər, abidələr, yeni qəsəbələr mən həyatda olmayanda da Heydər Əliyevin işləri kimi yaddaşlarda yaşayacaq".

Bu günlər əziz və parlaq xatirəsi dərin hörmət və ehtiramla yad edilən ümummilli liderin dərin zəkası, uzaqgörən siyasəti nəticəsində Azərbaycan xalqı özünün xilas yolunu müdrik rəhbərin ölməz ideyalarında tapmış, göstərdiyi yolla gedərək çətin siyasi və iqtisadi böhranlardan çıxmışdır.

Ulu öndər xalqımız üçün ən humanist və demokratik ideyaları özündə ehtiva edən və bunu əməllərində təsdiqləyən bir şəxsiyyət kimi xatırlanır və yad edilir. Əslində, belə demək daha doğru olardı ki, ümummilli liderin əməli fəaliyyətinin nəticəsi olaraq müstəqilliyini möhkəmləndirən Azərbaycan dövlətinin vətəndaşı olmaqdan qürur duyur və ulu öndərin müasirləri olduğumuz üçün də fəxr edirik.

Vəli ƏLİYEV,

AMEA-nın müxbir üzvü, professor:

- Azərbaycan dövlətinin inkişaf strategiyası, təbii ki, alternativi olmayan və bu gün də cənab Prezident İlham Əliyev tərəfindən çox uğurla inkişaf etdirilən siyasətidir. İstər daxili, istərsə də xarici siyasət kursunun dövlətimizin bütün sahələr üzrə inkişafını təmin etməsi beynəlxalq təşkilatların hesabatlarında da öz əksini tapır. İftixar hisssi ilə söyləmək olar ki, milli-siyasi məngənələr arasında zaman-zaman sıxılan Azərbaycan məhz ümummilli lider Heydər Əliyevin hər dəfə hakimiyyətə gəlişindən sonra özünün inkişafına nail olmuşdur. Ona görə əbəs yerə demirlər ki, müasir Azərbaycan ulu öndər Heydər Əliyevin şah əsəridir. Təkcə Azərbaycan vətəndaşlarının deyil, dünya azərbaycanlılarının ümummilli liderinə çevrilmiş Heydər Əliyevin dərin zəkası, uzaqgörən siyasəti alternativsizliyini bundan sonra da təsdiqləyəcək və xalqımızın ildən-ilə yüksələn rifahı, sivilizasiyalı bəşəriyyətə iqtisadi, sosial və mədəni inteqrasiyasında bu amil özünü göstərəcəkdir.

Heydər Əliyev Azərbaycan dövlətinin hər qarış torpağını sevdiyini və onun uğrunda mübarizə apardığını bütün fəaliyyəti boyu təsdiqləmişdir. Ulu öndər çox yaxşı bilirdi ki, bütün digər sosial problemlərin həlli yalnız iqtisadi yüksəlişdən, siyasi nüfuzdan keçir. Budur, son səkkiz il ərzində uğurla davam etdirilən həmin siyasət öz nəticəsini verməkdədir.

Rahilə MEHDİYEVA,

"Qadınlar Sülh və Ekologiya Təmizlik Uğrunda" ictimai birliyinin sədri:

- Azərbaycanda qadın hüquq və azadlıqlarının müdafiəsi uğrunda həyata keçirilən siyasət də öz bəhrəsini verməkdədir. Məhz bunun nəticəsidir ki, demokratik dövlətimizdə gender bərabərliyi öz aktuallığını saxlamaqdadır. Azərbaycan ictimaiyyətində qadınların rolu və ictimai fəaliyyətinə diqqət dövlət siyasətinin prioritetlərindən birinə çevrilmişdir.

Ulu öndər doğma xalqına dərin məhəbbətini hələ sovetlər birliyi dövründə müstəqil Azərbaycan dövləti üçün kadrların yetişdirilməsi istiqamətində yürütdüyü siyasətlə təsdiqləmişdir. Həmin kadrlardır ki, bu gün iqtisadi inkişafına görə region dövlətlərini xeyli arxada qoyan Azərbaycanın müxtəlif sahələrinin aparıcı mütəxəssisləri və idarə edənləridir. Qətiyyətlə və əminliklə söyləmək olar ki, ulu öndərin istər keçmiş sovetlər birliyi dövründə, istərsə də dövlət müstəqilliyinin bərpasından sonra yürütdüyü siyasət Azərbaycanın gələcəyinə hesablanmışdır. Ümummilli lider Heydər Əliyevin Fəxri xiyabandakı müqəddəs məzarını ziyarət etməyə axışan insan seli ümumxalq məhəbbətinin parlaq təzahürüdür. Azərbaycançılıq məfkurəsinin mahiyyətini açan ulu öndər demişdir: "Azərbaycana məhəbbət, xalqıma məhəbbət mənim qanımdadır, beynimdədir, varlığımdadır. Heç kəs, heç bir qüvvə bu məhəbbəti məndən ala bilməz".

Bu fikirlərin müəllifi olan ümummilli lider ona görə də ən böyük azərbaycanlı olaraq xalqımızın qəlbinə və tarixinə qızıl hərflərlə həkk olmuşdur. Hər birimizin müqəddəs borcudur ki, müstəqil dövlətimizin banisi, ümummilli lider Heydər Əliyevin təkcə adını deyil, işıqlı əməllərini bundan sonra da yaşadaq ki, gələcək nəsillərə bu nurdan pay düşsün.

Axşamçağı olmasına baxmayaraq, Fəxri xiyabana gələnlərin ardı-arası kəsilmir.

Azərbaycan.-2011.-13 dekabr.-S.6.